A Zeremi 10
10
1Israyɛll nebã, kelg-y Sẽn-Ka-Saab sẽn yet-yã!
2Sẽn-Ka-Saab yetame:
«Ra bao-y tɩ zãms buud a taabã minindã ye.
La ra yɛɛs-y ne bãn nins sẽn be yĩngrã
wa buud a taabã ye.
3Bala, bu-bãmb minindã yaa zaalem.
B kɛɛgda raoog kãgrẽ tɩ tʋʋm-mit
rɩk a lar n pees-a.
4B nagsd-a-la ne wanzuri la ne sãnem
n bao zãar ne kaadg n ka-a t'a ra lʋɩ ye.»
5Bõn-naands-kãens yaa wa b sẽn dɩk zug
peoog n fõgen da-giuug pʋʋg pʋgẽ.
Bãmb ka gomd ye.
Yaa tɩlɛ tɩ b zãad-ba,
b sẽn ka tõe n kẽn b toorã yĩnga.
Ra zoe-y bãmb ye.
Bala, bãmb ka tõe n maan wẽng bɩ neer ye.
6Sẽn-Ka-Saabo, yãmb to ka be ye.
Yãmb yaa kãsenga, la y yʋʋrã yaa
kãseng n tar pãnga.
7 #
Vẽn 15.4
Buudã fãa rĩmã,
ãnda soab n ka na n zoe yãmba?
Yãmb seka zoeese.
Bala, buud toay-toayã fãa yam dãmbã sʋka,
ne b soolem-dãmbã fãa pʋse,
yãmb ka tar to ye.
8Bãmb fãa yaa yalemb la zɩtba.
Bãmb bõn-naandsã yaa raad bala,
b ka tõe n wilg ned bũmb ye!
9Wanzuri yita Tarsɩɩse,
la sãnem yita Ufaaze.
Tʋʋm-mitbã rɩkd-b lame,
la yõak bond-b lame,
la b yeelgd-b-la fu-moaama ne fu-miidu.
Bõn-kãens fãa yaa ninsaalb minim tʋʋm bala.
10La Sẽn-Ka-Saab n yaa sɩd Wẽnnaam.
Bãmb n yaa Wẽnnaam sẽn vɩ.
Bãmb n yaa rĩm wakat fãa.
Tẽngã rigimdida bãmb sũ-yikrã yĩnga.
Buud ba a yembr ka tõe n yals bãmb
sũ-puugrã pʋgẽ ye.
11Yeel-y bãmb tɩ wẽnnaam-dãmb
nins sẽn ka naan yĩngr la tẽngã
na n menema dũniyã zugu.
12Sẽn-Ka-Saab naana tẽngã ne b meng pãnga.
Bãmb yamã kɩtame tɩ dũniyã beẽ,
la b yɛdga sa-gãongã ne b bãngrã.
13Bãmb sã n zẽk b koɛɛgã,
koomã sẽn be yĩngrã tigimda taaba.
Bãmb kɩtdame tɩ sawat zẽk n ta dũniyã
kɩremsã fãa.
Bãmb kɩtdame tɩ sa-yãgb sikd sa-koom,
la b kɩtdẽ tɩ sebgã yit a sẽn beẽ wã n fugda.
14Nebã fãa lebga zɩtba,
n ka tar bãngr ye.
Yõak bõn-naandg yãnd tar-a lame.
Bala, bãmb yaa zĩrẽ bõn-naandse,
la vɩɩm ka be bãmb pʋgẽ ye.
15Bãmb yaa zaalem.
Bãmb yaa zĩrẽ tʋʋmã.
Wakat ning Sẽn-Ka-Saab
sẽn na n wa ges b yellã,
b na n sãamame.
16A Zakoob yagensã Wẽnnaam
ka woto ye.
Bala, bãmb n yaa bũmb fãa naanda,
la bãmb yãka Israyɛll buudã
n maan b nebã.
Bãmb yʋʋr la Saasẽ-Pãng-Soaba.
Zʋʋda sãoongo
17Zeruzalɛm nebã,
wʋk-y y teed tɩ y bɛɛbã gũbg-y-lame!
18Bala, Sẽn-Ka-Saab yetame:
«Mam na n lobga tẽngã nebã
wa loaabg kugr tɩ b zãage.
Mam na n dɩdg-b lame
tɩ b ka tõog n põs ye.»
19Zeruzalɛm nebã yetame:
Toog paama tõndo.
Tõnd poglgã ka maagd ye.
Tõnd dag n tagsame tɩ d toogã tɛk la woto,
la d sak n deegame.
20Tõnd fu-roogã sãamame.
B tõsa a wĩyã.
Tõnd ka leb n tar kamb ye,
b fãa loog n basa tõndo.
Bãmb ka leb n be ye.
Ned ka be sẽn na n leb n tilg d fu-roogã
n yɛdg a pɛɛlã ye.
A Zeremi
21Bala, tõnd nebã nanambs yaa zɩtba.
Bãmb ka sok n bãng Sẽn-Ka-Saab yam ye.
Yaa woto n kɩt tɩ bãmb ka tar bãngre,
la woto me n kɩt tɩ b nebã fãa sãeege.
22Kelg-y bʋrg rãamde! A kolgdame!
Bʋr-kãseng n yit tẽng ning
sẽn be nug-rɩtgã.
A tãb-biisã na n kɩtame tɩ Zʋʋda
tẽmsã lebg raboodo,
la we-baas gãas zĩisi.
A Zeremi pʋʋsg a nebã yĩnga
23Sẽn-Ka-Saabo, mam miime tɩ ninsaal
ka tar noor ne a vɩɩm sẽn na n yɩ
bũmb ning ye.
Ninsaal ka so a meng vɩɩm yell ye.
24Sẽn-Ka-Saabo, rems-y tõnd wa
sẽn zems y tɩrlmã, la y ra rems tõnd wa
sẽn zems y sũ-yikrã ye.
Sã n ka rẽ, tõnd na n menema zãnga.
25Pʋdg-y y sũ-yikrã bu-zẽmsã
sẽn ka mi yãmbã zutu,
la buud nins sẽn ka pʋʋsd
ne yãmb yʋʋrã zutu.
Bala, bãmb dɩ a Zakoob yagensã
zãnga, n sãam b yiyã.
Currently Selected:
A Zeremi 10: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
