A Zeremi 8
8
1Maam a Sẽn-Ka-Saab yetame yaa: «Wakat-kãnga, b na n vaaga Zʋʋda rĩm-dãmbã ne a nanambsã la maan-kʋʋdbã ne no-rɛɛsdbã, la Zeruzalɛm nebã fãa kõabã b yaadã pʋse, 2n dʋʋg wĩndgã ne kiuugã la yĩngr ãdsã bãmb sẽn dag n nong la b waoogdẽ la b pʋgd la b baoodẽ la b wõgemded b taoor n waoogd-bã vẽenemẽ. B ka na n naag-b taaba, la b ka na n mum-b me ye. B na n lebga birg tẽn-gãongã yĩnga. 3La bu-wẽn-kãng neb nins fãa sẽn ket n be dũniyã zugã, zĩis nins fãa mam sẽn na n dig-b tɩ b tɩ kẽngã, b na n yeelame tɩ b sẽn kiid n são. Saasẽ-Pãng-Soabã n yeele.»
Sũ-keglem sẽn loog nugu
4Yeel-b tɩ maam a Sẽn-Ka-Saab
sokdame yaa: «Ned lʋɩtame n ka yik bɩ?
Bɩ ned sã n bʋdge,
a ka lebgd n wa sor zugu?
5La yaa bõe tɩ Zeruzalɛm nin-kãensã
bas maam n kɩɩsd maam wakat fãa?
Bãmb kẽngda taoor ne zãmbã maanego,
bãmb ka sak n na n lebg n wa mam nengẽ ye.
6Mam maaga m meng n kelge,
la sɩd ka be bãmb goamẽ wã ye.
Bãmb ned ba a yembr ka maand a bãngẽ
ne wẽng ning a sẽn maanã ye.
Bãmb ka sokde:
«Bõe la d maan sẽn yaa wẽnga.»
Ned kam fãa maanda wa a sẽn date,
wa wed-moaag sẽn zoet n kẽed zabr pʋgẽ.
7Baa raong sẽn yɩgd yĩngrã
mi a sẽn na n toeem tẽng wakate,
la wall ne sɩlaall la kʋɩl-peosg me
mi b sẽn tog n lebg wakat ninga.
La mam nebã ka mi maam
a Sẽn-Ka-Saab no-tũudsã ye.»
Seb-gʋlsdbã teka Sẽn-Ka-Saab tõogã
8Yãmb yetame tɩ y yaa yam dãmba,
y sẽn tar Sẽn-Ka-Saab tõogã yĩnga.
Yaa sɩda, la maana a wãn tɩ gʋlsdbã gʋlsd n
tekd tõogã t'a lebgd zĩrẽ?
9Yam dãmbã ninga b mens yãnde.
Bãmb yɛɛsame n ka leb n mi b sẽn dabdẽ ye.
Bãmb sẽn zãgs Sẽn-Ka-Saab goamã,
bõe yam la bãmb tara?
Sɩd soab ka be ye
10Yaa woto yĩnga,
tɩ mam na n dɩk b pagbã n kõ neb a taaba,
la neb a taab na n deega bãmb pʋto.
Bala, kom-bãoonegã ne nin-kẽembã
fãa baooda b mens nafr bala.
No-rɛɛsdbã ne maan-kʋʋdbã fãa yagda zĩrẽ.
11 #
Eze 13.10
Bãmb ka tɩpd mam nin-nongdsã poglg sõama ye.
Bãmb yetame tɩ laafɩ beeme,
tɩ laafɩ yaool n ka beẽ ye.
12 #
Zer 6.12-15
Bãmb sẽn maan yel-beedã yãnd tar-b lame bɩ?
Baa bilfu!
Bãmb ka mi yãn-zoeer ye.
Woto yĩnga, bãmb na n naaga neb nins
sẽn lʋɩtã n lʋɩ.
Mam sã n wa sɩbg-ba, b na n lʋɩɩme.
Maam a Sẽn-Ka-Saab n yeele.
Tẽeb sẽn vaale
13Maam a Sẽn-Ka-Saab yetame:
«Mam na n woba b biisã fãa,
la reezẽ biis ka na n leb n zĩnd reezẽ tɩɩg zug ye.
Kankam ka na n leb n zĩnd kankang zug ye.
Hal ba b vãadã na n kʋɩɩme.
Bũmb ning mam sẽn dag n kõ bãmbã loogame.»
14Nebã yeelame: «Yaa bõe tɩ d zĩ zaalem?
Wa-y tɩ d lagem taab n yik n kẽng tẽms nins
sẽn gũbg ne lalsã n tɩ kẽ be n ki,
bala Sẽn-Ka-Saab sẽn yaa tõnd
Wẽnnaamã na n kɩtame tɩ tõnd ki.
Bãmb yũnuga tõnd koom sẽn tar zẽnem,
tõnd sẽn beeg bãmbã yĩnga.
15Tõnd dag n gũuda vɩ-bãane,
la bõn-sõng ka wat ye.
Tõnd dag n gũuda maagre,
la rabeem bal n tar tõndo.
16Tõnd wʋmda d bɛɛbã wiidi sɛsg Dan sẽnẽ.
B wed-raadã sã n kelme,
tẽn-gãongã fãa rigimdidame.
Bãmb watame n na n sãam tẽngã
ne bũmb nins fãa sẽn be a pʋgẽ wã,
la tẽngã nebã fãa.»
17Bala, maam a Sẽn-Ka-Saab yetame:
«Mam na n tʋma wiis la wag-toose,
la ka wiis b sẽn tõe n nanem#8.17 Nanengo: Yaa manesem buud neb kẽer sẽn maand n kɩtdẽ tɩ rũng lebg naana n ka maand wẽnga, ba a sã n dag n yaa rũm-toaaga. ye.
B na n kɛ-y lame.»
A Zeremi yẽgengo
18Mam toogã yɩɩda maam,
mam sũur sãama hal wʋsgo.
19Mam wʋmda m nebã m sẽn nongã
sẽn be tẽn-zãrgẽ n kelemd n yetẽ:
«Sẽn-Ka-Saab ka leb n be Sɩyõ la?
Sɩyõ rĩmã ka leb n beẽ la?»
La Sẽn-Ka-Saab sokdame:
«Bõe yĩng tɩ b waoogd b bõn-naandse,
ne bu-zẽmsã yel-yoodã n sãamd m sũuri?»
20Tigsg wakat loogame,
tʋʋlg wakat rabda a sɛɛbo,
la tõnd ket n nan ka paam fãagr ye.
21Mam sũur sãamame,
mam nebã m sẽn nongã sãoong yĩnga.
Mam bee lik pʋgẽ,
la sãoong rɩta maam.
22Tɩɩm ka leb n be Galaad la?
Tɩp ka leb n be beenẽ la?
Bõe yĩng tɩ m nebã m sẽn nongã
bãag ka sãoogdẽ?
23Mam sã n dag n tõeẽ tɩ m zugã yɩ wa bulga,
tɩ m ninã bul nintãm wa bulg ko-nini,
m dag n na n yãbẽ-la wĩntoog ne yʋngo,
mam nebã m sẽn nongã sẽn ki wã yĩnga!
Currently Selected:
A Zeremi 8: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
