A Zeremi 7
7
Israyɛll nebã sẽn belgd b mense
(Zer 26.1-19)
1Ad koɛɛg ning Sẽn-Ka-Saab sẽn yeel a Zeremi: 2Kẽng n tɩ yals Sẽn-Ka-Saab roogã zak rignoor n moon n yeel yaa: Yãmb fãa sẽn yaa Zʋʋda neb sẽn tũud rigno-kãensã n kẽed n wõgemded n waoogd Sẽn-Ka-Saabã, kelg-y-yã! 3Saasẽ-Pãng-Soabã sẽn yaa Israyɛll Wẽnnaamã yetame: «Maneg-y y yel-manesmã ne y tʋʋmã, tɩ m bas-y tɩ y zĩnd zĩ-kãngã. 4Ra teeg-y zĩrẽ goamã nebã sẽn togsdã ye. B yetame tɩ Sẽn-Ka-Saab roogã la woto, Sẽn-Ka-Saab roogã la woto!» 5Yãmb sã n maneg y yel-manesmã ne y tʋʋmã, la y maan wa sẽn zems ne taaba, 6la y ka nams sãambã ne kɩɩbsã la pʋg-kõapã, yãmb sã n ka raag bʋʋm dãmbã zɩɩm zĩ-kãngã, la y ka pʋg bu-zẽms wẽnnaam-dãmb n wa ne toog y meng zugu, 7mam na n kɩtame tɩ y kell n zĩnd zĩ-kãngã, tẽng ning mam sẽn dag n kõ y yaab-rãmbã kʋdem-wẽndẽ tɩ b soog zamaan woo zamaanã. 8La gese, yãmb teega zĩrẽ goam sẽn ka yõodo. 9Rẽ yĩnga, yãmb tõeeme n zuud la y kʋʋda, la y yooda, la y wẽend zĩrẽ wẽenego, la y yõogd wisd n kõt wẽn-naandg a Baalle, la y waoogd bu-zẽms wẽnnaam-dãmb yãmb sẽn ka mi, 10n yaool n wat n yas mam taoor do-kãngã mam yʋʋrã sẽn be-a pʋgẽ wã pʋg n maand yel-be-kãensã, n yetẽ tɩ yãmb paama fãagre? 11#Mat 21.13, Mark 11.17, Luk 19.46Rẽ yĩnga, yãmb geta ro-kãngã b sẽn boond mam yʋʋrã a pʋgẽ wã wa wagda soondg zĩig la? Mam nee fãa. Maam a Sẽn-Ka-Saab n yeele. 12#Zoz 18.1, Yɩɩn 78.60, Zer 26.6M kot-y lame tɩ y kẽng Sɩlo sẽn yaa mam zĩigã, zĩig ning mam sẽn dag n kɩt tɩ m yʋʋrã zĩnd kʋdem-wẽndẽ wã. Tɩ ges-y mam sẽn maan-a bũmb ninga, wẽng ning Israyɛll sẽn yaa mam nebã sẽn maanã yĩnga. 13Maam a Sẽn-Ka-Saab yetame: «Yãmb sẽn maan bõn-kãens fãa wã yĩnga, mam sẽn gom ne yãmb n leb n gom n ka tol n bas tɩ yãmb ka kelgã, mam sẽn bool yãmb tɩ y ka sakã yĩnga, 14ad mam sẽn na n maan ro-kãngã b sẽn boond mam yʋʋrã a pʋgẽ wã, roog ning yãmb sẽn teeg-a wã, la zĩig ning mam sẽn dag n kõ yãmb ne y yaab-rãmbã to-to: Mam na n maan-a-la wa m sẽn dag n maan Sɩlo wã. 15Mam na n diga yãmb tɩ y zãag ne-ma, wa m sẽn dag n dig y saam-biisã sẽn yaa Efrayiim buudã fãa wã.»
Pʋʋsg sẽn ka noom Sẽn-Ka-Saabo
16La foom a Zeremi, ra pʋʋs maam nin-kãensã yĩng ye. Ra zẽk f koɛɛg wall f yõk maam sɛɛg ye. Bala, mam ka na n kelg-f ye. 17Fo ka ne bãmb sẽn maand bũmb nins Zʋʋda tẽmsã pʋs ne Zeruzalɛm soayã zutã la? 18#Zer 44.17-19Kambã wʋkda raado, tɩ ba-rãmbã tugund bugum, tɩ pagbã nagd zom n maand miisd saasẽ dĩm-poakã yĩnga. La bãmb toogda reezẽ rãam n kõt wẽnnaam-dãmb a taab n sãamd mam sũuri. 19La maam a Sẽn-Ka-Saab yetame: Rẽ yĩnga, yaa mam sũur la b sãamd sɩda? Ka b mensã sũy la b sãamd n ningd b mens yãnd sɩda? 20Bõn-kãng yĩng kɩtame tɩ maam a Sẽn-Ka-Saab sẽn yaa Zu-soabã yetẽ: «Ade, mam sũ-puug-kãsengã na n siga zĩ-kãngã zugu, la a sig nebã ne rũmsã, la tɩɩsã ne pʋtã la tẽngã bɩle zugu. A na n dɩɩ wa bugum sẽn ka kiida.»
Neb sẽn ka kelgd b Wẽnnaam
21Saasẽ-Pãng-Soabã sẽn yaa Israyɛll Wẽnnaamã yetame: «Y sã n dat bɩ y naag-y maand sẽn yõogd bugmã ne y maand a taabã nemd n wãbe! 22Bala, wakat ning mam sẽn yiis y yaab-rãmbã Ezɩptã, mam ka yeel bãmb tɩ bũmbu, la m ka kõ-b noor sẽn kẽed ne maand sẽn yõogd bugum ne maand a taab wɛɛngẽ ye.» 23Ad mam sẽn kõ bãmb noor ninga: «Sak m koɛɛgã tɩ m na n yɩɩ yãmb Wẽnnaam, tɩ yãmb yɩ mam nebã. Sak-y n maan-y bũmb nins fãa mam sẽn yeel bãmb tɩ y maanã tɩ y vɩɩm yɩ noogo.» 24La bãmb ka sak n kelge, bãmb yẽda b tʋba. Bãmb maana wa sẽn zems b sũ-keglmã, n tõdg b na ges maam n tud b kudga. 25Hal sẽn sɩng ne wakat ning y yaab-rãmbã sẽn yi Ezɩptã n tãag rũndã, mam tʋma m tʋmtʋmdbã fãa sẽn yaa m no-rɛɛsdbã yãmb nengẽ wakat fãa n ka bas ye. 26La bãmb ka sak n kelg ye, bãmb yẽda b tʋba. Bãmb kenga b sũur n maan sẽn yaa wẽng n yɩɩd b yaab-rãmbã. 27Zeremi, baa fo sã n togs bãmb gom-kãensã fãa, b ka na n kelg ye. Fo sã n bool-ba, b ka na n leok-f ye. 28Dẽ, bɩ f yeel-ba: «Bu-kãngã ka sak n kelg maam a Sẽn-Ka-Saab sẽn yaa bãmb Wẽnnaamã, la b reeg m demsgã ye. Sɩdã ka leb n be ye, bãmb noy ka leb n togsd sɩd ye.»
Neb kʋʋb longo
29Zeruzalɛm nebã, põng-y y zutã
n lob y pʋleng zoobdã!
Rʋ-y tãn-bɛɛlã zut n yãb n wiisi!
Bala, Sẽn-Ka-Saab basa buud ning
sẽn kɩt tɩ b sũurã yikã, la b zãgs-a.
30Maam a Sẽn-Ka-Saab yetame yaa: «Zʋʋda nebã beega maam. Bãmb dɩka b bõn-naands nins mam sẽn kisã n ning roog ning b sẽn boond mam yʋʋrã a pʋgẽ wã pʋga, n dẽgm-a. 31#2Rĩm 23.10, Zer 32.35, Mk 18.21Bãmb mee maoong kʋʋb zĩisi, zĩig ning b sẽn boond tɩ Tofɛtã sẽn be Bɛn-Hinom longã pʋgẽ wã, n dɩk b kom-pugli la b kom-dibli n maan maand n yõog bugum b zutu. Bõn-kãng yaa bũmb mam sẽn ka yeel bãmb tɩ b maan ye. M nan zɩ n tags bũmb a woto yell meng ye.» 32Maam a Sẽn-Ka-Saab yetame: «Bõn-kãng yĩnga, wakat n wate, tɩ b ka na n leb n bool-a tɩ Tofɛt bɩ Bɛn-Hinom ye. B na n bool-a lame tɩ kʋʋb longo. Bala, b na n mumda kũum Tofɛte, weer sẽn ka be yĩnga. 33Nin-kãensã kũum na n lebga yĩngr bõn-yɩgdɩ ne we-rũms rɩɩbo, tɩ ned ka be n na n dig bãmb ye. 34#Zer 16.9, 25.10, Vẽn 18.23Mam na n kɩtame tɩ kɩdeng ne sũ-noog yɩɩla, la pʋg-paal ne pʋg-paal sɩd yɩɩl sɛ Zʋʋda soolem tẽmsã pʋse, ne Zeruzalɛm soayã zutu: tẽngã na n lebga vɩʋʋgo.»
Currently Selected:
A Zeremi 7: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
