A Zeremi 51
51
1Ade, Sẽn-Ka-Saab yetame:
«Mam kɩtame tɩ sãoong sob-kẽeng na n yik
n sãam Babilond ne Kalde nebã.
2Mam na n tʋma bu-zẽms tɩ b wa
sãeeg Babilond n bas tẽngã vɩʋʋgo.
Bala, a toogã daar sã n ta,
neb na n yii zĩig fãa n wa zab ne-a.
3Bɩ b yãag tãp n tees sẽn yãag-a a tãpã,
yãag-y n tees-y sẽn yeelg-a a gãntik
n wukd a mengã!
Da bas-y-yã a bi-bɩɩg ba a yembr t'a põs ye!
Kʋ-y-yã a tãb-biisã fãa gilli!
4Bɩ b pogl n lʋɩ n ki Kalde nebã tẽngẽ,
bɩ b kõs-b tɩ b ki n dʋr Babilond soayã zutu.
5Bala, Israyɛll ne Zʋʋda Wẽnnaamã
ka bas-b pʋg-kõt ye.
Saasẽ-Pãng-Soabã ka bas-ba,
baa ne b sẽn pids b tẽngã ne wẽng n
beeg Israyɛll Pʋ-Peelem-Soabã ye.
6Zoe-y n yi-y Babilonde!
Bɩ ned kam fãa zoe n fãag a menga!
Da naag-y Babilond n sãam a kongrã yĩng ye!
Bala, yaa wakat Sẽn-Ka-Saab sẽn dokd b sũuri,
la b na n yaoo Babilond wa sẽn zems a tʋʋmã.
7 #
Vẽn 17.2-4, 18.3 Babilond dag n yaa wa sãnem wamd
sẽn pid ne rãam n be Sẽn-Ka-Saab nugẽ,
tɩ dũniyã nebã fãa yũ tɩ b nens yilimdẽ.
Bu-zẽmsã yũu wamdã pʋg reezẽ rãamã,
tɩ rẽ kɩt tɩ b zʋbsdẽ.
8La tao-tao bala, Babilond lʋɩɩme,
a wãa zãnga!
Yãb-y-yã a yĩnga,
bao-y kaam n sõog a poglgã,
tɩ daarninga, a na sãooge.
9 #
Vẽn 18.5
Tõnd makame n tɩp Babilonde,
la a ka sãoog ye.
Wa-y tɩ d bas-a, tɩ ned kam fãa kuil a tẽngẽ.
Bala, a sɩbgrã yell zẽk n taa saasã,
a zẽkame n tãag sawatã.
10Sẽn-Ka-Saab kɩtame tɩ tõnd tɩrlem puki.
Wa-y tɩ d kẽng Sɩyõ n tɩ togs
bũmb ning Sẽn-Ka-Saab sẽn yaa
tõnd Wẽnnaamã sẽn maanã.»
11Sɩls-y y pɛɛmã n pids y logdo!
Sẽn-Ka-Saab sẽn dat n sãam Babilondã yĩnga,
b neka Medi rĩm-dãmbã yam.
Bala, Sẽn-Ka-Saab sũ-dokr la woto,
yaa sũ-dokr Sẽn-Ka-Saab roogã yĩnga.
12Zẽk-y tãb-kaoor tɩ d zab ne Babilond
n sãam a lalsã!
Paas-y gũudbã sõore.
Kɩt-y tɩ gũudbã yals b zĩigẽ.
Kɩt-y tɩ neb tɩ soond soayã zutu!
Bala, Sẽn-Ka-Saab sẽn yãk yam
tɩ b na n maana bũmb ningã,
b na n maan-a lame.
Yaa b sẽn dag n yeel Babilond nebã wɛɛngẽ wã!
13 #
Vẽn 17.1
Foom a Babilond sẽn dag n be
kʋɩl-kãsems noor n tar arzegs wʋsgã,
fo wakat taame, wa sẽn zems f yão-beedã.
14Saasẽ-Pãng-Soabã wẽena ne b meng
n yeele:
N-yẽe, mam na n kɩtame tɩ bɛɛbã
tãb-biis wʋsg kẽ fo pʋgẽ wa kalwaare,
la b na n kaasa fo zugu,
wa reezẽ wobr wakat kaasgo.
15Sẽn-Ka-Saab naana tẽngã ne b meng pãnga.
Bãmb yamã kɩtame tɩ dũniyã beẽ,
la b yɛdga sa-gãongã ne b bãngrã.
16Bãmb sã n zẽk b koɛɛgã,
koomã sẽn be yĩngrã tigimda taaba.
Bãmb kɩtdame tɩ sawat zẽk n ta dũniyã
kɩremsã fãa.
Bãmb kɩtdame tɩ sa-yãgb sikd sa-koom,
la b kɩtdẽ tɩ sebgã yit a sẽn beẽ wã n fugda.
17Nebã fãa lebga zɩtba,
n ka tar bãngr ye.
Yõak bõn-naandg yãnd tar-a lame.
Bala, bãmb yaa zĩrẽ bõn-naandse,
la vɩɩm ka be bãmb pʋgẽ ye.
18Bãmb yaa zaalem.
Bãmb yaa zĩrẽ tʋʋmã.
Wakat ning Sẽn-Ka-Saab
sẽn na n wa ges b yellã,
b na n sãamame.
19A Zakoob yagensã Wẽnnaam
ka woto ye.
Bala, bãmb n yaa bũmb fãa naanda,
la bãmb yãka Israyɛll buudã
n maan b nebã.
Bãmb yʋʋr la Saasẽ-Pãng-Soaba.
Babilond baoosgo
20Fo yɩɩ mam zãar ne m zab-teoogo.
Yaa foom la m tall n beds buud toay-toaya,
la m sãam soolem toay-toaya.
21Foom la m tall n beds weefã ne a rʋʋdã,
la a saarã ne a soabã.
22Foom la m tall n beds pagbã ne raopã,
la nin-kẽembã ne kom-bɩɩsã,
la ra-sãmbã ne kom-pugli wã.
23Mam talla foom n beds pe-kɩɩmb ne b piisi,
la ka-koaad ne a niigi,
la gʋvɛrneer-dãmb ne taoor dãmba.
24Mam na n lebsa Babilond ne Kalde nebã fãa
wẽng ning bãmb sẽn maan Sɩyõ pʋgẽ wã
yĩng y nifẽ.
Sẽn-Ka-Saab n yeele.
25Sãoong tãnga,
fo sẽn dag n sãamd dũni wã gillã,
mam zabda ne foom!
Mam na n tẽega m nug n tus foom,
tɩ f yi pĩisã zut n bilim n lʋɩ.
Mam na n kɩtame tɩ f lebg wa tãng
sẽn dɩ bugum.
Sẽn-Ka-Saab n yeele.
26Ned kõn tõog n yãk roog soakẽ kugri,
wall roog yẽbgr kugr fo zug ye.
Bala, fo na n lebga zĩ-vɩʋʋg wakat fãa.
27Zẽk-y tãb-kaoor tẽngã pʋgẽ n peeb
baorg buud toay-toayã sʋka!
Kɩt-y tɩ buud toay-toayã teedg
n zab ne Babilonde.
Kɩt-y tɩ Ararat ne Minimi la Askenaaz
soolem-dãmbã tigim taab n zab ne-a.
Yãk-y tãb-biis nanambs tɩ b zab ne-a.
Kɩt-y tɩ wiidã wa wa kalwaare.
28Kɩt-y tɩ buud toay-toay ne Medi
rĩm-dãmbã la a gʋvɛrneer-dãmbã
ne a taoor-dãmbã fãa la tẽngã
fãa bãmb sẽn so wã teedg n zab ne-a!
29Tẽngã rigimdame, a miima
wakat ning Sẽn-Ka-Saab sẽn pids b saagrã
sẽn kẽed ne Babilond wɛɛngẽ wã.
Bãmb kɩtame tɩ Babilond lebg zĩ-vɩʋʋgo,
tɩ ned ba a yembr ka leb n be a pʋgẽ ye.
30Babilond gãndaadã basa zabr
n zĩ b pãng zĩisẽ wã pʋsẽ.
Bãmb pãng sɛɛme tɩ b lebg wa pagba.
B ninga bãmb dotã bugum,
b kaoo tẽngã rignoy kʋɩlen-kũyã.
31Koeesã yõsemda taaba,
koe-toagsdbã zoet n yõsda taaba,
n na n tɩ togs Babilond rĩmã
tɩ bɛɛbã reega a tẽngã n yãmb-a zĩig zãnga,
32tɩ b reega zĩ-rʋʋgdsã la b ning bãtã bugum,
tɩ zab-zabdbã pelens yɩke.
Sẽn-Ka-Saab na n doka b nebã sũuri
33Bala, Saasẽ-Pãng-Soabã sẽn yaa Israyɛll
Wẽnnaamã yetame:
«Babilond sẽn dag n yaa tẽn-neerã lebga
wa zɛɛg ki pãbr wakate.
Sã n yɩ bilfu, a tigsgã wakat na n taame.
34Babilond dĩm a Nebukatnedzaar
beesa maam n wãbe.
Yẽnda kɩtame tɩ m lebg wa la-vɩʋʋgo.
Yẽnda vela maam wa wag-bɛɛga.
Yẽnda pidsa a pʋgã ne bõn-sõamy nins
mam sẽn dag n tarã,
n yaool n wʋk maam.»
35Sɩyõ nebã na n yeelame:
«Bɩ wẽng ning Babilond sẽn maan
tõndã lʋɩ a zugu!
Zeruzalɛm nebã na n yeelame:
Bɩ tõnd zɩɩmã raagr yell zĩnd
Kalde nebã zugu!»
36Woto yĩnga, Sẽn-Ka-Saab yetame:
«Mam na n zaba fo zabre,
mam na n doka fo sũuri.
Mam na n kʋɩɩsa Babilond ko-kãsengã
ne a ko-bundsã.
37Babilond na n lebga kug-rʋre,
a na n lebga we-baas yiri,
la zĩ-vɩʋʋgo.
A na n lebga bõn-yɛɛsdga,
la ned kõn leb n zĩnd a pʋgẽ ye.
38Babilond nebã naagda taab
n yãbd wa gɩgem-poala,
bãmb wũusda wa gɩgem-bi.
39Yão-beed sã n wa tar bãmba,
mam na n maana tigr b yĩnga,
n kɩt tɩ b yũ rãam tɩ b nens yilim
tɩ b maan sũ-noogo,
n gũs wakat fãa gõeem n ka leb n nek abada.
Sẽn-Ka-Saab n yeele.
40Mam na n kɩtame tɩ b yɩ wa
pe-bi b sẽn tar n dabd kʋʋb zĩigẽ,
la wa pe-raad ne boeese.»
Wiisg Babilond yĩnga
41Maana a wãn tɩ b tõog n deeg Sesake?
Dũniyã gill sẽn dag n pẽgd-a soabã ziir sɛɛme!
Maana a wãn tɩ Babilond lebg zĩ-vɩʋʋg
buud toay-toayã fãa sʋka?
42Ko-kãsengã rɩɩ Babilonde,
a ko-wĩ-kãsemsã lim-a lame.
43A tẽmsã lebga raboodo,
tẽngã lebga zĩ-koɛɛnga,
la tẽn-nabd-koɛɛnga.
Lebga tẽng ned sẽn ka leb n be-a pʋgẽ ye.
Ninsaal buud ka leb n tũud be n loogdẽ yɛs ye.
44Mam na n sɩbga Babilond nebã
wẽnnaam a Bɛlle,
n kɩt t'a wʋk a sẽn dag n velã.
Bu-zẽmsã ka na n leb n sũ taab a nengẽ yɛs ye.
Baa Babilond lalgã lʋɩɩme!
45Mam nebã, zoe-y n yi-y tẽn-kãng pʋga!
Bɩ yãmb ned kam fãa zoe n fãag a menga,
n zãag ne maam a Sẽn-Ka-Saab
sũ-puug-kãsengã,
46tɩ y raood da wa booge, la tɩ rabeem da wa yõk-yã, koees nins b sẽn na n wa togs tẽngã pʋgẽ wã yĩng ye. Bala, rõandã, b yetame tɩ woto, vẽere, n yet tɩ woto. Tẽngã zĩig fãa lebga wẽnga, naab fãa zabda ne a to!
47Woto yĩnga, ade, wakat n wate,
tɩ mam na n sɩbg Babilond bõn-naandsã.
La tẽngã nebã fãa na n paama yãnde.
Sẽn ki-bã fãa kũumã na n pida tẽngã.
48 #
Vẽn 18.20
Saasẽ la tẽngã ne bũmb nins fãa
sẽn be b pʋsẽ wã na n kaasa ne sũ-noogo,
bũmb nins sẽn paam Babilondã yĩnga.
Sɩd me, sãamdb na n yii nug-rɩtg sẽnẽ,
n wa zab ne-a.
Sẽn-Ka-Saab n yeele.
49 #
Vẽn 18.24
Babilond kɩtame tɩ b kʋ neb dũniyã fãa pʋgẽ,
la moasã, b na n kʋʋ Babilond nebã,
b sẽn kʋ Israyɛll nebã yĩnga.
50Yãmb dãmb fãa sẽn põs zabr sʋʋgã,
da yals-y ye!
Zĩnd-y yɩɩg n tẽeg maam a Sẽn-Ka-Saab yelle,
la y ra yĩm Zeruzalɛm yell ye!
51Yãnd yõka tõndo,
d sẽn wʋm paoogr goamã yĩnga.
D nens pida ne yãnde,
bala, bu-zẽms wa n kẽe Sẽn-Ka-Saab
roogã zĩ-sõamẽ wã.
52Yaa woto tɩ Sẽn-Ka-Saab yetẽ:
«Wakat n wate, tɩ mam na n sɩbg
Babilond bõn-naandsã.
A tẽngã fãa pʋgẽ, b na n wʋma
sẽn paam-b sãmpoagã fãa wõosgo.
53Baa Babilond sã n dʋ yĩngr n me
lalg sẽn tar pãng beenẽ,
la ba a sã n kogl a pãng zĩisã
tɩ ned ka tõe n ta beenẽ,
mam na n tʋma neb tɩ b tɩ sãam-a.
Maam a Sẽn-Ka-Saab n yeele.»
54B wʋmda kelems Babilond tẽngã pʋgẽ.
Sãoong kãseng bʋrg yita Kalde nebã tẽngẽ.
55Yaa Sẽn-Ka-Saab n sãamd Babilonde,
n kɩt tɩ b ka leb n wʋmd a rãamd ye.
A bɛɛbã wata ne bʋr-kãseng wa ko-kãsengã
sẽn guglumd to-to wã.
56N-yẽe! Sẽn sãamd-a fãa wã watame
n na n zab ne Babilonde!
B yõga a tãb-biisã, b kaoo a tãbdã,
bala, Sẽn-Ka-Saab yaa Wẽnnaam sẽn sɩbgda,
la b yaooda ned kam fãa wa sẽn zems a tʋʋmde.
57Mam na n yũnuga yẽnda nanambsã, a yam dãmbã, a gʋvɛrneer-dãmbã, ne a taoor dãmbã la a gãndaadã rãam tɩ b gũs wakat fãa gõeem n ka leb n nek abada. Rĩm ning yʋʋr sẽn boond tɩ Saasẽ-Pãng-Soabã n yeele.
58Saasẽ-Pãng-Soabã yetame:
«B na n luba Babilond lal-tagdã,
la b yõog a tẽngã rignoy kʋɩlen-zãntlsã bugum.
Nebã namsda b mens zaalem,
tɩ tẽmsã yaool n na n dɩ bugum.
La bãmb namsgã yaa zaalem bala.»
B loba sebrã Efrat kʋɩlgẽ wã
59Woto yaa koɛɛg no-rɛɛs a Zeremi sẽn kõ a Maaseya biig a Neriya biig a Seraya. Yaa wakat ning a Seraya sẽn tũ Zʋʋda rĩm a Sedesiyaas n na n kẽng Babilondã, la rẽ tɩ yaa rĩm a Sedesiyaas sẽn deeg a naamã tɩ yʋʋm naaslẽ wã. A Seraya rag n yaa sõgen-kãsenga. 60A Zeremi gʋlsa sebr n wilg tood nins fãa sẽn na n paam Babilondã, la goam nins fãa sẽn kẽed ne Babilond wɛɛngẽ wã. 61A Zeremi yeela a Seraya yaa: «Fo sã n ta Babilonde, bɩ f mao n karem gom-kãensã fãa. 62Karem-b n yeel yaa: ‹Sẽn-Ka-Saabo, yãmb meng n gom zĩ-kãngã wɛɛngẽ, n yeel tɩ b na n sãam-a lame n kɩt t'a lebg zĩ-vɩʋʋg wakat fãa, tɩ ninsaalb wall rũms ra leb n zĩnd a pʋgẽ ye.› 63#Vẽn 18.21Fo sã n karem seb-kãngã n sɛ, bɩ f loe-a ne kugr n tɩ lob Efrat kʋɩlgẽ wã, 64la f yeel tɩ yaa a woto la Babilond na n lis n ka leb n duk yĩngri, toog ning mam sẽn na n kɩt tɩ wa yẽnda zugã yĩnga.› »
«La bãmb namsgã yaa zaalem bala.» A Zeremi goamã baoosg la woto.
Currently Selected:
A Zeremi 51: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
