A Zeremi 50
50
Babilond lʋɩɩse, la Israyɛll nebã fãagre
1 #
Eza 13.1—14.23, 47.1-15 Woto yaa koɛɛg Sẽn-Ka-Saab sẽn tũnug no-rɛɛs a Zeremi n togse, Babilond sẽn yaa Kalde rãmbã tẽngã wɛɛngẽ.
2Togs-y buud toay-toayã koe-kãngã!
Kɩt-y tɩ b wʋm-a,
zẽk-y tãb-kaoore!
Kɩt-y tɩ b wʋm-a, la y ra solg-a ye!
Yeel-y tɩ b reega Babilonde!
Yãnd tara a Bɛlle!
A Merodak pɛleng yɩkame!
N-yẽe, yãnd tara yẽnda bõn-naandsã,
b pɛleng yɩkame!
3Bala, buud n yit wĩndg sẽn lʋɩtẽ dɩtgo,
n wat n na n zab ne Babilonde.
B na n kɩtame t'a lebg zĩ-vɩʋʋgo,
tɩ ninsaal bɩ rũng ra leb n zĩnd a pʋgẽ ye.
Bala, b fãa loogame.
4Sẽn-Ka-Saab yetame:
«Badaare, Israyɛll ne Zʋʋda buudã
na n tũu taab n lebg n wa.
Wakat-kãnga, b na n kẽndame
la b yãbd n baood Sẽn-Ka-Saab
sẽn yaa bãmb Wẽnnaamã.»
5Bãmb na n soka Sɩyõ zĩiga,
n wẽnemd b nens n tees beenẽ n yeele:
«Wa-y tɩ d rɩk d mens n kõ Sẽn-Ka-Saabo,
n maan kaool sẽn paad wakat fãa,
ned sẽn kõn tol n yĩm ye!»
6Mam nebã rag n yaa wa piis sẽn meneme.
Bãmb pe-kɩɩmbã rag n kẽesd-b-la moogo,
b rag n basa bãmb tɩ b gilimd tãmsã zutu.
Bãmb dag n kɩtame tɩ b yeebd tãmsã
ne kunkubã zutu,
n wa yĩm b vʋʋsg zĩigã yelle.
7Sẽn seg-a bãmb yõgd-b lame n wãbdẽ,
la b bɛɛbã rag n yetame:
Tõnd ka beeg ye.
La nin-bãmbã maana yel-wẽn n beeg
Sẽn-Ka-Saab sẽn yaa tɩrlem soabã.
Bãmb beega Sẽn-Ka-Saabo,
soab ning bãmb yaab-rãmbã
sẽn dag n teegã.
8 #
Vẽn 18.4
Zoe-y n yi-y Babilonde!
Yi-y n bas-y Kalde nebã tẽnga!
Yi-y wa boees sẽn lʋɩ bʋʋs taoor n zoetẽ!
9Bala, ade, mam kɩtame tɩ bu-kãsems
tigim taab n yi tẽng ning sẽn be nug-rɩtgã,
n wa zab ne Babilond tẽngã.
Bãmb na n teedgame n zab n deeg-a.
Bãmb pɛɛmã na n yɩɩ wa gãndaoog
nug sẽn noom pɛɛmã.
A ka lebgd n kuil zaalem ye.
10B na n fãa Kalde nebã.
Ned ning fãa sẽn na n fã-a bãmb
sũur na n yɩɩ noogo.
Sẽn-Ka-Saab n yeele.
11Yãmb dãmb sẽn fã mam soolmã,
maan-y sũ-noogo! Kɩdm-y-yã!
Yɩg-y n tirs-y wa nag-sãdse!
Kelm-y wa wed-raado!
12Yãn-kãseng tara y ma wã!
Pag ning sẽn dog-a yãmbã zĩi ne paoogre!
Yẽnda n yaa poorẽ tẽmsã fãa sʋka.
A yaa we-raoogo, zĩ-koɛɛnga,
la zĩ-peen-daaga.
13Sẽn-Ka-Saab sũ-puugrã yĩnga,
ned kõn leb n zĩnd Babilond pʋgẽ ye.
B na n kɩtame tɩ tẽngã zãng lebg zĩ-vɩʋʋgo.
Sẽn pɩʋʋgd-a Babilond fãa pɛleng
na n yɩkame.
B na n yɛɛsame n fɩɩle,
a poglgã fãa yĩnga.
14Teedg-y n zab-y ne Babilonde.
Yãag-y y tãbd n gũbg-a!
Tão-y-yã-a n da zoe y pɛɛmã bõn ye!
Bala, yẽnda maana yel-wẽn n beeg Sẽn-Ka-Saabo!
15Kaas-y zabr kaasg n gũbg-a n zab ne-a!
A rʋʋga a zab-teedo.
A gãsdã rʋʋgdame,
t'a lalsã sirgdẽ:
Yaa Sẽn-Ka-Saab n dokd b sũuri!
Rok-y y sũur ne-a!
Maan-y-yã-a wa yẽnda me sẽn dag n maanã!
16Menes-y neb nins sẽn bʋt la b kẽebd
Babilond tẽngã pʋgẽ bõn-bɩʋʋng wakatã!
Sãamdã zabr sʋʋg yĩnga,
bɩ ned kam fãa leb a buudẽ.
Bɩ ned kam fãa zoe n kẽng a tẽngẽ.
17Israyɛll yaa wa pe-menemdg
gɩgmã sẽn digi.
Sẽn yɩ-a pipi n wãb yẽnda yaa Asiiri rĩmã, la sẽn yɩ-a yaoolem n kao yẽnda kõabã yaa Babilond dĩm a Nebukatnedzaare. 18Woto yĩnga, Saasẽ-Pãng-Soabã sẽn yaa Israyɛll Wẽnnaamã yetame: Ade, mam na n sɩbga Babilond dĩmã ne a tẽngã, wa m sẽn dag n sɩbg Asiiri rĩmã.
19Mam na n talla Israyɛll nebã
n lebg n wa b tẽngẽ wã.
Bãmb na n dɩɩ Karmell ne Basã koodã,
la b na n dɩɩ Efrayiim soolem ning
sẽn be tãms sʋkã ne Galaadã bɩle n tɩge.
20Badaare, la wakat-kãnga,
b na n baoo kongr Israyɛll nebã nengẽ,
la b ka na n yãnd ye.
B na n baoo Zʋʋda nebã yel-wẽnã,
la b kõn tol n yãnd ye.
Bala, mam na n kõo neb nins mam
sẽn na n bas n ka kʋ wã sugri.
Sẽn-Ka-Saab n yeele.
21Kẽng-y n tɩ zab-y ne Meratayim
ne Pekood tẽmsã nebã!
Kʋ-y bãmb n sãam-b zãnga!
Maan-y-b wa mam sẽn yeel yãmbã!
Sẽn-Ka-Saab n yeele.
22Zabr bʋrg ne sãoon-kãseng n be tẽngã pʋgẽ.
23Maana a wãna? Zãarã sẽn dag n wãad
dũniyã fãa wã kaoogame, a wãame.
Babilond lebga zĩ-vɩʋʋg buudã fãa sʋka!
24Babilonde, mam dɩgla bẽdg fo yĩnga,
la fo lʋɩɩ a pʋgẽ n ka bãng ye.
B yãnda foom n yõke,
bala, fo baoo Sẽn-Ka-Saab noore.
25Sẽn-Ka-Saab paka b zab-teedã
bĩngr zĩig n yiis b sũ-puugr zab-teedã.
Zu-soabã sẽn yaa Saasẽ-Pãng-Soabã rat n maana
tʋʋmd Kalde rãmbã tẽngẽ.
26Yi-y dũniyã kɩremsã fãa n wa zab ne-a!
Fõgs-y-yã a baoã,
wʋk-y-yã a teedã n zam wa koodo!
Sãam-y bãmb zãng n da bas b ned
ba a yembr tɩ kell ye!
27Kʋ-y bãmb gãndaadã wa lols
b sẽn tar n dabd kʋʋb zĩigẽ.
Toog bee bãmb zugu!
Bãmb daarã taame,
bãmb sɩbgrã daar taame.
28Neb sẽn yi Babilond tẽng n zoe n põsã
wilgda Sɩyõ pʋgẽ tɩ Sẽn-Ka-Saab
sẽn yaa tõnd Wẽnnaamã rokda b sũuri.
Bãmb dokda b sũur b roogã yĩnga.
29 #
Vẽn 18.6
Bool-y tãb-tãoodbã tɩ b wa zab ne Babilonde!
Bool-y neb nins fãa sẽn mi tãp tãoobã
tɩ b wa zab ne-a!
Tilg-y y tãb-sikã n gũbg-a,
n da bas ned ba a yembr t'a põs ye!
Yao-y-yã-a wa sẽn zems a tʋʋmã,
maan-y-yã-a wa a sẽn dag n maanã,
bala, yẽnda wuka a meng ne Sẽn-Ka-Saab
sẽn yaa Israyɛll Pʋ-Peelem-Soabã.
30Yaa rẽ n kɩte, tɩ b na n kʋ a kom-bɩɩsã
soayã zutu.
Badaare, b na n kʋʋ yẽnda tãb-biisã fãa.
Sẽn-Ka-Saab n yeele.
31Saasẽ-Pãng-Soabã yetame:
Tẽng sẽn yaa wuk-m-meng soaba,
mam zabda ne foom,
bala, fo daarã taame.
Wakat ning mam sẽn na n sɩbg foomã taame.
32Tẽng sẽn yaa wuk-m-meng soabã
na n lak n lʋɩɩme,
tɩ ned ka be n na n sõng-a t'a yik ye.
Mam na n ninga a tẽmsã bugum,
t'a rɩ a tẽn-kɩremsã fãa.
33Ad Saasẽ-Pãng-Soabã sẽn yeta:
B namsa Israyɛll ne Zʋʋda nebã.
Neb nins fãa sẽn yõg bãmb n maan yembsã
ka rat n bas-b tɩ b loog ye.
34La bãmb fãagdã tara pãnga.
Bãmb yʋʋr la Saasẽ-Pãng-Soaba.
Yaa fãagd-kãng n na n zab n sõng bãmba,
n kɩt tɩ vɩ-bãan wa tẽngã pʋga,
la b kɩt tɩ Babilond nebã rig ne rabeem.
Sẽn-Ka-Saab rat n zaba ne Babilonde
35Sẽn-Ka-Saab yetame:
Bɩ zabr sʋʋg kʋ Kalde nebã!
Bɩ a kʋ Babilond nebã ne a nanambsã
la a yam dãmbã.
36Bɩ zabr sʋʋg kʋ pẽg-m-mens rãmbã!
Bɩ b lebg yalemba!
Bɩ zabr sʋʋg kʋ gãndaadã!
Bɩ b pelens yɩke!
37Bɩ zabr sʋʋg kʋ a wiidã ne a saar-dãmbã,
la sãamb nins fãa sẽn be bãmb sʋkã!
Bɩ b lebg wa pagba!
Bɩ zabr sʋʋg sãam-a tɩ b wʋk a paoongã!
Bɩ b fã bãmb gilli!
38Bɩ war kʋɩɩs b kʋɩlsã!
Bɩ b kʋɩ zãnga!
Bala, a tẽngã pida ne bõn-naandse.
Pelen-yɩgrã kɩtame tɩ b zʋbsdẽ.
39 #
Vẽn 18.2
Yaa rẽ n kɩte,
tɩ beenẽ na n lebg we-yũus ne kata,
la naneend gãag zĩiga.
Na n maana zamaan-dãmba,
tɩ ned ka leb n zĩnd beenẽ ye.
40 #
Sɩng 19.24,25 Na n yɩɩ wa Sodom ne Gomoor
la b tẽn-kɩremsã sãoongã.
Ned wall rũng kõn leb n zĩnd be ye.
Sẽn-Ka-Saab n yeele.
41Ade, neb n yit tẽng ning
sẽn be nug-rɩtgã n watẽ.
Yaa bu-kãseng ne rĩm-dãmb sẽn tar pãng
n yi dũniyã zĩ-zãrsẽ n watẽ.
42Bãmb zẽgsda b tãbdo, la b zãad kãna.
Bãmb yaa nin-toos sẽn ka tar nimbãan-zoeer ye.
Bãmb bʋrgã wẽnda ko-kãsengã bʋrgo.
Bãmb zomba wiidi,
bãmb tonga taab wa nin-yende,
n wat n na n zab ne foom a Babilond tẽn-neerã.
43Babilond dĩmã wʋma b kibar t'a raood booge.
Yel-pakr paam-a lame
toog tar-a-la wa pag sẽn kũmd dogem.
44Mam na n waa wa gɩgemd
sẽn yit Zʋrdẽ kʋɩlgã noor kãgrã pʋgẽ,
n dig Babilond nebã tɩ b fão n yi n bas
b tẽngã wakat-yɛng pʋgẽ.
La mam na n kɩtame tɩ m sẽn yãk-a
soabã soog Babilonde.
Bala, ãnda soab n zem maam?
Ãnda soab n na sok maam tɩ bõe la m maanda?
La na-bʋg n tõe n yals mam taoore?
45Woto yĩnga, kelg-y saagr ning
Sẽn-Ka-Saab sẽn saagd Babilond
ne Kalde nebã wɛɛngẽ,
la b sẽn segend n dat n maan
Kalde nebã bũmb ninga!
Sɩd me, b na n tɛ-b lame n loog
wa rũm-bãoonego!
B na n sãama b soolmã.
46Babilond lʋɩɩme tɩ tẽn-gãongã rigimdi,
la buud a taabã wʋma Babilond nebã kelemse.
Currently Selected:
A Zeremi 50: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
