A Zeremi 49
49
Sẽn kẽed ne Amo nebã wɛɛngẽ
1 #
Eze 21.33-37, 25.1-7, Amo 1.13-15, Sof 2.8-11 Sẽn kẽed ne Amo nebã wɛɛngẽ:
Sẽn-Ka-Saab yetame:
Israyɛll nebã ka tar kom-dibli la?
Bãmb ka tar kom-dibli sẽn na n
wa soog b tẽngã la?
La yaa bõe tɩ wẽnnaam a Milkom
reeg Gaad buudã tẽng n sooge,
t'a nebã soog Gaad tẽmsã?
2Bõn-kãng yĩnga,
maam a Sẽn-Ka-Saab yetame:
Wakat n wate, tɩ mam na n kɩt
tɩ b wʋm zabr kelems Raba
sẽn yaa Amo nebã na-tẽngã.
A na n sãamame n lebg tom dʋya,
la a tẽn-kɩremsã na n dɩɩ bugum.
Dẽ, Israyɛll nebã na n leb n deega
b tẽngã neb nins sẽn dag n dig
bãmb n deeg-a wã nugẽ.
Maam a Sẽn-Ka-Saab n yeele.
3Hɛsbõ nebã, wiis-y tɩ Ayi sãamame!
Raba kom-pugli, kelm-y-yã!
Sẽgen-y bot n yãb-a,
la y yeeb goabg la rɩtgo!
Bala b yõka bãmb dĩmã
ne a maan-kʋʋdbã la a nanambsã,
n dabd yembdo.
4Raba tẽn-neere,
bõe yĩng tɩ f wukd f meng f
tãn-londã sẽn kõt bɩle
sõama wã yĩnga?
Fo rag n teega f paoongã n yetẽ
tɩ ãndã n tõe n wa zab ne foom?
5Beneere, Saasẽ-Pãng-Soabã yetame:
Mam kɩtame tɩ rabeem yit zĩigã fãa,
n wat n na n yõk yãmba.
B na n diga yãmba,
tɩ ned kam fãa zoe n bao a menga,
la ned ka na n kell sẽn na n tigs zoɛtbã ye.
6La rẽ poore,
mam na n kɩtame tɩ Amo nebã
leb b tẽngẽ wã.
Maam a Sẽn-Ka-Saab n yeele.
Koɛɛg Edom wɛɛngẽ
7 #
Eza 34.5-17, 63.1-6, Eze 25.12-14, 35.1-15, Amo 1.11,12, Abd 1.1-14, Mal 1.2-5 Koɛɛg Edom wɛɛngẽ.
Ade, Saasẽ-Pãng-Soabã sokdame yaa:
Teman nebã ka leb n tar yam la?
Sẽn tar-b bãngrã ka leb n kõt sagls la?
Bãmb yamã menemame la?
8Dedan nebã,
lebg-y n zoe-y-yã!
Kẽng-y n tɩ bao-y zĩig n soonde!
Bala, mam na n tʋma sãoong
a Ezayu yagensã yĩnga.
Wakat taame tɩ mam na n sɩbg bãmba.
9Reezẽ-woabdb sã n wa fo nengẽ,
bãmb ka na n bas bũmb ned sẽn tõe
n wa paam n yiis ye.
Wagda sã n wa fo nengẽ ne yʋngo,
bãmb na n sãama b sẽn tõe n sãame.
10Sɩd me, mam wʋka a Ezayu
yagensã paoong gilli.
Mam sãama a zĩ-solgdsã,
t'a ka leb n tõe n soond ye.
B na n basame tɩ b sãam a yagensã,
ne a saam-biisã la a yagsã.
B ka na n leb n zĩnd ye.
11Bas-y y kɩɩbsã,
tɩ maam n na n sõng-b tɩ b vɩɩmde,
la bɩ y pʋg-kõapã teeg maam!
12Bala, Sẽn-Ka-Saab yetame: «Neb nins sẽn dag n ka segd ne sɩbgrã sã n paam sɩbgre, b na n basa foom a Edom n ka sɩbg bɩ? Ayo! B ka na n bas foom ye, b na n sɩbga foom me.» 13Bala, maam a Sẽn-Ka-Saab yetame: «Mam wẽenda ne m mengã, tɩ b na n basame tɩ b sãam Bosra, t'a lebg raboogo, n paam paoogre, la kãab-wẽnga. Yẽnda tẽmsã fãa na n lebga rabood wakat sẽn ka sɛt yĩnga.»
14Mam wʋma koɛɛg Sẽn-Ka-Saab nengẽ,
la b tʋma ned bu-zẽmsã nengẽ
ne koɛɛg t'a tɩ yeele:
«Tigm-y taab n wa zab ne Edom!
Yik-y zabr ne-a!
15Edom, mam na n kɩtame tɩ f lebg bilf
bu-zẽmsã fãa sʋka,
la ninsaalbã na n paooga foom wʋsgo.
16Fo sẽn be pĩisã bogdẽ wã,
fo sẽn tɩ be kunkubã zutã,
bãng tɩ f sẽn dag n kẽesd nebã rabeemã
ne f tɩtaamã kẽes-f-la moogo.
Ade, baa fo sã n tɩ tɩʋ f tʋkã
yĩngr n lug wa pa-nand-tugri,
mam na n sika foom beenẽ.
Maam a Sẽn-Ka-Saab n yeele.»
17Edom na n sãamame.
A toodã yĩnga,
so-loaadbã fãa na n yãnd-a lame
tɩ b pɛleng yɩke.
Bãmb na n yɛɛsame n fɩɩle.
18 #
Sɩng 19.24,25 Sẽn-Ka-Saab yetame:
Ade, na n yɩɩ wa Sodom ne Gomoor la b tẽn-kɩremsã sãoongã.
Ned ka na n leb n zĩnd Edom ye.
Ninsaal kõn leb n zĩnd be yɛs ye.
19Mam na n waa wa gɩgemd sẽn yit
Zʋrdẽ kʋɩlgã noor weoogã pʋgẽ,
n dig Edom nebã tɩ b fão n yi n bas
b tẽngã wakat-yɛng pʋgẽ.
La mam na n kɩtame tɩ m sẽn yãk-a
soabã soog Edom.
Bala, ãnda soab n zem maam?
Ãnda soab n tar noor ne maam?
La na-bʋg n tõe n yals mam taoore?
20Woto yĩnga, kelg-y saagr
ning Sẽn-Ka-Saab sẽn saagd
Edom nebã wɛɛngẽ,
la b sẽn segend n dat n maan
Teman nebã bũmb ninga!
Sɩd me, b na n tɛ-b lame n loog
wa rũm-bãoonego!
B na n sãama b soolmã.
21Bãmb lʋɩɩsã bʋrg kɩtame
tɩ dũniyã rigimdi.
B sũ-sãangã kelems zẽkd n tata
hal rʋdem ko-kãsengã sẽnẽ.
22Bɛ wã yɩkame n laand wa pa-nand-tugri, n fõt n dat n sig Bosra tẽngã zugu, la badaare, Edom gãndaadã sũy na n kiuusa wa pag sẽn kũmd rogem.
Koɛɛg Damaas wɛɛngẽ
23 #
Eza 17.1-3, Amo 1.3-5, Zaka 9.1 Koɛɛg Damaas wɛɛngẽ.
Yãnd tara Hamat ne Arpaad nebã,
bala b wʋma koe-beedo,
tɩ b gĩin maage.
B yaa wa ko-kãsengã koom sẽn lengde,
n ka leb n tõe n yals sɩɩ ye.
24Damaas nebã raood boogame,
tɩ b wẽnemd n zoetẽ.
Rabeem yõka bãmb tɩ b rigda.
Yel-pakr ne toog tara bãmba,
wa pag sẽn kũmd rogem.
25Kayto! B basa tẽng ning
sẽn dag n kõt maam waoogrã,
tẽng ning sẽn dag n kõt maam sũ-noogã.
26Sɩd me, badaare,
a ra-sãmbã lʋɩta a soayã zutu,
la b kʋ a raop nins fãa sẽn tõe
n kẽng zabrã.
Maam a Sẽn-Ka-Saab n yeele.
27Mam na n ninga Damaas lalgã bugum,
la bugmã na n dɩ a Bɛn-Hadaad na-yiyã.
Koɛɛg araab-rãmbã wɛɛngẽ
28Sẽn kẽed ne Kedaar la Hatsoor soolem-dãmbã, Babilond dĩm a Nebukatnedzaar sẽn zab ne n tõogã wɛɛngẽ.
Ade, Sẽn-Ka-Saab yetame:
Yik-y n zab-y ne Kedaar nebã.
Sãam-y buud sẽn be yaangã!
29Reeg-y bãmb fu-rotã ne b rũmsã,
yãk-y b pɛɛlã ne b teedã fãa
la ne b yʋgma wã.
Kaas-y b zug n yeel tɩ toog yita
zĩigã fãa n wat b zutu!
30Sẽn-Ka-Saab yetame:
Hatsoor nebã,
zoe-y tao-tao n tɩ bao zĩig n soonde!
Bala, Babilond dĩm a Nebukatnedzaar
saagd n dat n wa zaba ne yãmba.
A segendame n dat n wa zab ne-yã!
31Sẽn-Ka-Saab yetame:
Yik-y n zab-y ne buud ning
sẽn zĩ bãane, tɩ b pɛlg yaa kɛgengã!
A ka tar dignoy la kʋɩlen-kuy ye.
A vɩɩ a yembre.
32B na n fãa bãmb yʋgma wã
ne b rũmsã sẽn yaa wʋsgã.
Mam na n kɩtame tɩ nin-kãens
sẽn põng b zutã sãeeg zĩigã fãa.
Mam na n kɩtame tɩ sabaab yi zĩigã
fãa n wa sãam-ba.
Maam a Sẽn-Ka-Saab n yeele.
33Hatsoor na n lebga we-baas yiri,
a na n yɩɩ zĩ-vɩʋʋg wakat sẽn ka sɛta.
Ned ka na n leb n zĩnd tẽn-kãng ye.
Ninsaal kõn leb n zĩnd be yɛs ye.
Koɛɛg Elam wɛɛngẽ
34Ad koɛɛg Sẽn-Ka-Saab sẽn kõ no-rɛɛs a Zeremi, sẽn kẽed ne Elam wɛɛngẽ, Zʋʋda rĩm a Sedesiyaas naamã sɩngr wakate.
35Saasẽ-Pãng-Soabã yetame:
Mam na n kaoo Elam nebã tãpã
sẽn yaa b pãngã yẽgrã.
36Mam na n kɩtame tɩ sebd a naas yi
saasẽ kɩrems a naasã n wa fug Elam.
Mam na n kɩtame tɩ sob-bãmb fãa sãeeg-ba, la buud ka be tɩ Elam neb nins b sẽn digã ka na n kẽng ye.
37Mam na n kɩtame tɩ Elam nebã
rig rabeem b bɛɛbã taoore.
Bãmb na n diga rabeem
neb nins sẽn baood n kʋ bãmbã taoore.
Mam sũ-puugrã pʋga,
mam na n kɩtame tɩ toog paam bãmba.
Maam a Sẽn-Ka-Saab n yeele.
Mam na n kɩtame tɩ b rig bãmb
ne zabr sʋʋga,
hal n kʋ bãmb zãnga.
38Mam na n ninga m naamã geer Elam,
la m na n menesa Elam dĩmã ne a nanambsã.
Maam a Sẽn-Ka-Saab n yeele.
39La wakat sẽn wate,
mam na n lebs n manega Elam nebã yelle.
Maam a Sẽn-Ka-Saab n yeele.
Currently Selected:
A Zeremi 49: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
