A Zeremi 48
48
Sẽn-Ka-Saab koɛɛg Moaab yĩnga
1 #
Eza 15.1—16.14, 25.10-12, Eze 25.8-11, Amo 2.1-3, Sof 2.8-11 Koɛɛg Moaab yĩnga.
Saasẽ-Pãng-Soabã sẽn yaa Israyɛll
Wẽnnaamã yetame:
«Toog paama Nebo tẽngã!
B sãam-a lame!
Yãnd tara Kiriyatayim tẽngã,
bala, b zab n deeg-a lame!
Yãnd tara Misgaab nebã,
la b pɛleng yɩkame.
2Moaab ziirã sɛɛme!
Neb bee Hɛsbõ n segend n na n
wa maan-a wẽnga.
Wa-y tɩ d kɩt tɩ Moaab menem
buud a taabã sʋka!
Madmen tẽng nebã,
zabr sʋʋg na n kɩtame tɩ b
ka leb n wʋm yãmb me rãamd ye.
B rigda yãmb ne zabr sʋʋga.
3B wʋmda kelems sẽn yit Horonayim!
Yaa sabaab ne sãoon-kãsenga!
4Moaab sãamame!
B wʋmda a kambã kelemse.
5Bala, kelemsã zẽkdame
n tũud Luyit tãngã rʋʋdga,
la b wʋmda neb nins sũy sẽn sãam
tɩ b yãbdã bɛɛb kelemse,
Horonayim tãngã sigdgẽ.
6Zoe-y n fãag-y y mense,
n yɩ wa we-bõanga.
7Bala, yãmb sẽn dɩk y teegrã
n teeg y tʋʋmã ne y arzegsã yĩnga,
b na n zab n tõoga yãmb me,
la b na n talla wẽn-naandg a Kemoos
ne a maan-kʋʋdbã la a nanambsã,
n kẽng yembdo.
8Sẽn sãamd-a fãa wã na n sãama
tẽmsã fãa,
tẽng ba a yembr ka na n põs ye.
B na n sãama tãn-longã ne tẽn-nabdrã.
Yaa Sẽn-Ka-Saab n yeele.»
9Kõ-y Moaab nebã pɩgs
tɩ b yɩk n zãage!
A tẽmsã na n lebga zĩ-vɩɩdo,
la ned ka na n leb n zĩnd b pʋsẽ ye.
10Kãab-wẽng bee ned ning
sẽn maand Sẽn-Ka-Saab tʋʋmdã
ne rok-m-zugẽ wã zugu!
Ned ning sʋʋg zɩɩm sẽn ka madã
na n paama kãab-wẽnga!
11Sẽn-Ka-Saab yeelame:
Hal Moaab nebã yãadem wakate,
b rag n zĩi ne bãane,
tɩ b rag nan ka tall bãmb n kẽng
yembd ye.
B rag n yaa wa reezẽ rãam
b sẽn bas t'a tisgi.
B ka ning-a teoog a to pʋgẽ,
la a noorã ne a yũugã me ka tek ye.
12Yaa woto tɩ maam a Sẽn-Ka-Saab yetẽ:
Wakat n wate, tɩ mam na
n kɩt tɩ neb rɩk-a n kiig laok a to pʋgẽ.
B na n zuka a lagdã la
b sãam a ko-waoosã.
13Wẽn-naandg a Kemoos
yãnd na n yõka Moaab nebã,
wa Israyɛll nebã sẽn dag
n teeg Betɛll n paam yãndã.
14Moaab nebã,
maana a wãn tɩ yãmb yetẽ
tɩ y yaa gãndaad n mi zabre?
15Moaab sãamame,
bug-zõos n dukd a tẽmsã pʋsẽ.
B tɛta a ra-sãmbã n dabd kʋʋbo.
Rĩm ning yʋʋr sẽn boond
tɩ Saasẽ-Pãng-Soabã n yeele.
16Sabaab n wat Moaab tẽngã zugu,
Toog na n paam-a-la tao-tao.
17Yãmb fãa sẽn gũbg Moaab tẽngã,
yãmb fãa sẽn mi a yʋʋrã,
yãb-y-yã-a yĩng n yeele:
«Kayto! A naam dasaarã
sẽn tar pãng la ziirã kaoome.
18Diyõ tẽn-neerã nebã,
Sig f ziirã geer zugu!
Sig n zĩnd tẽn-koɛɛngã zugu,
bala Moaab sãamdã yika zabr ne foom,
a sãamda fo pãng zĩisã.
19Arowɛɛr nebã,
Yals-y sorã noor n gũusi!
Sok-y zoɛtbã ne sẽn põs-bã n gese,
yaa bõe n maane?
20Yãnd tara Moaab nebã:
B pɛleng yɩkame.
Kaas-y-yã, kelm-y-yã!
Kẽng-y Arno kʋɩlgã noore,
n moon n yeel tɩ Moaab sãamame!
21Bʋ-kaoor waa tẽng ning sẽn yaa tẽn-nabdrã zugu, ne tẽn-bãmba fãa zutu: yaa Holon, Yatsa, Mefaate, 22Diyõ, Nebo, Bɛt-Diblatayim, 23Kiriyatayim, Bɛt-Gamulli, Bɛt-Meyõ, 24Keriyote, Bosra, ne Moaab soolem tẽmsã fãa, sẽn pẽ-b la sẽn zãr-ba.»
25Moaab pãngã sɛɛme,
a kangã kaoome.
Maam a Sẽn-Ka-Saab n yeele.
26Yũnug-y-yã-a t'a tɩge, bala, yẽnda yik n zabda ne Sẽn-Ka-Saabo! Kɩt-y tɩ Moaab bilim a wʋbdẽ wã, tɩ nebã yaal yẽnda me! 27Fo me rag n yaala Israyɛlle! Rẽ yĩnga, Israyɛll dag n bee wagda sʋk sɩda, tɩ fo gõmsd f zug n gomd n paoogd yẽnda?
28Moaab nebã,
bas-y tẽmsã n yi n tɩ zĩnd piisã sʋka!
Maan-y wa wall sẽn gãndgd
bog-zulung n tʋɩt a tʋkã!
29Tõnd wʋma Moaab
nebã tɩtaamã yelle.
Bãmb tɩtaamã ya n looga nugu.
Bãmb dag n wukda b
mens la b zẽkd b mense,
n tẽed tɩ b seka b mense.
30Maam a Sẽn-Ka-Saab yetame: Mam mi b tɩtaamã tiiri, la rẽ fãa yaa zaalem. Bãmb wuk-m-mengã yaa zaalem. 31Yaa woto n kɩte, tɩ mam wiisd Moaab nebã yĩnga, mam yãbda Moaab nebã yĩnga. M maanda yɩɩr Kɩr-Herɛɛs yĩnga.
32Sibma nebã,
mam yãbda yãmb n yɩɩd
Yazɛɛr nebã.
Yãmb dag n yaa wa reezẽ tɩɩga,
tɩ y wilã tẽ n gãndg
yamsem kʋɩl-kãsengã,
hal n ta Yazɛɛre,
la sãamdã wa n sãama
y koodã ne y reezẽ biisã.
33Sũ-noog ne kɩdeng ka leb n be
Moaab tẽngã ne a pʋtã pʋsẽ ye.
Mam kɩtame tɩ reezẽ rãam sɛ sĩmsã pʋse.
B ka leb n tabd reezẽ la b kilsdẽ ye.
B ka leb n kilsd reezẽ wobr wakat ye.
34Hɛsbõ nebã kelems zẽkd n tata Eleyale ne Yahaatse, la sẽn sɩng ne Sowaar tɩ ta Honorayim, hal n tãag Eglat-Selisiya. Baa Nimrim koomã kʋɩɩme. 35Sẽn-Ka-Saab yetame: Mam dat n sãama Moaab zãnga. Mam dat n sãama neb nins sẽn dʋʋd maoong kʋʋb zĩis n yõogd wisd Moaab wẽnnaam-dãmbã yĩngã. 36Yaa woto tɩ m sidgd Moaab yĩng wa ned sẽn peebd wɩɩga. Mam sidgda Kɩɩr-Haresɛt nebã yĩng wa ned sẽn peebd wɩɩga, bala arzegs nins bãmb sẽn dag n paamã loogame. 37Bãmb ned kam fãa põnga a zug ne a toɛɛnga, la a bog a nusi, la a sẽgen boto. 38Moaab nebã rot zut ne raasã pʋsẽ yaa wiisgu, bala mam wãa Moaab wa b sẽn wã rʋk tɩ ned ka leb n dat-a ye. Maam a Sẽn-Ka-Saab n yeele. 39Kayto! Moaab wãame! Ges-y-yã a nebã sẽn wiisdi! B lebgd n zoeta ne yãnde! Moaab lebga bɛɛb laada, la rabeem-kãseng a yagsã fãa nifẽ. 40Bala, Sẽn-Ka-Saab yetame: Ade, bɛ wã yɩkda wa pa-nand-tugri, n laand Moaab tẽngã zugu.
41B reega Moaab tẽmsã,
b reega a pãng zĩisã.
Badaare, gãndaadã na n lebga rabɛɛmba,
wa pag sẽn kũmd dogem.
42Moaab na n sãamame,
a ka na n leb n zĩnd n yɩ buud ye.
Bala, a wuka a meng ne Sẽn-Ka-Saabo.
43Moaab nebã,
Pelen-yɩk ne bog-zulung la bẽdg
wata fo yĩnga.
Maam a Sẽn-Ka-Saab n yeele.
44Sẽn zoet-a n dat n põs pelen-yɩkã
na n lʋɩɩ bog-zulungã pʋga,
la bẽdg na n yõka sẽn tõog-a
n yi bog-zulungã pʋgẽ wã.
Bala, mam na n kɩtame tɩ bõn-kãensã
fãa paam Moaab nebã,
yʋʋmd ning mam sẽn na n sɩbg
bãmbã pʋgẽ.
Maam a Sẽn-Ka-Saab n yeele.
45Zoɛtbã pãng sɛɛme,
tɩ b yalsd Hɛsbõ n dat n soonde.
La bugum zẽkda Hɛsbõ tẽngã pʋga.
Bug-vɩlens yita Sɩhon na-yirã
sẽn beẽ wã,
n dɩt Moaab tãmsã seese,
la a rɩt neb nins sẽn nong zabrã.
46Yãmb sẽn yaa Moaab nebã,
toog bee yãmb zugu!
Yãmb a neb nin sẽn dag n waoogd
wẽnnaam a Kemoosã menemame!
Bala, b yõga y kom-dibli wã
ne y kom-pugli wã n tall n loog yembdo.
47La maam a Sẽn-Ka-Saab yetame:
Wakat n wate,
tɩ m na n lebs Moaab nebã
b pĩnd zĩigẽ wã.
Maam a Sẽn-Ka-Saab yeta.»
Moaab sɩbgrã tɛk la a woto.
Currently Selected:
A Zeremi 48: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
