A Zeremi 4
4
1Maam a Sẽn-Ka-Saab yetame:
«Israyɛll nebã, yãmb sã n lebg n wa mam nengẽ,
yãmb sã n yiis bõn-naands nins mam
sẽn kisã mam taoore,
la y ka leb n saad n yeebdẽ,
2yãmb sã n wẽen ne maam a Sẽn-Ka-Saab
sẽn vɩ wã yʋʋr ne sɩd la tɩrlem ne zemsgo,
buud a taabã na n kosa maam tɩ m ning-b barka,
la b na n pẽga maam.»
3 #
Ooz 10.12
Sẽn-Ka-Saab yeela Zʋʋda ne Zeruzalɛm
nebã yaa: «Kãas-y y pʋtã la y ra bʋd gõos sʋk ye.
4Zʋʋda ne Zeruzalɛm nebã,
Kẽes-y y mens bãong Sẽn-Ka-Saab yĩnga,
la y yiis y sũurã rẽgdã,
tɩ m sũurã ra wa n puug n wɩng wa bugum,
n dɩ yãmb y tʋʋm-wẽnsã yĩnga,
tɩ ned ka be n na n kiis-a ye.»
Bɛɛb sẽn wat n na n zab ne Zʋʋda nebã
5«Moon-y Zʋʋda nebã koe-kãngã
la y kɩt tɩ Zeruzalɛm nebã wʋme.
Peeb-y baorg tẽngã pʋgẽ,
zẽk-y y koees n yeel nebã yaa:
‹Zoe-y n tɩ tigm-y tẽms nins
sẽn gũbg ne lalsã pʋsẽ!
6Zẽk-y tãb-kaoor n tees Sɩyõ sẽnẽ!
Zoe-y la y ra yals ye!
Bala, mam kɩtame tɩ toog ne sãan-kãseng
yi wĩndg sẽn lʋɩtẽ dɩtg tẽngã n watẽ.
7Gɩgemd fão n yi a gãagẽ,
sẽn sãamd-a soolem-dãmbã
yi a zĩigẽ n watẽ.
A na n sãama y tẽngã,
a na n kɩtame tɩ y tẽmsã lebg raboodo.
Ned ka na n tol n leb n zĩnd b pʋsẽ ye.› »
8Woto yĩnga, bɩ y sẽgen bot n yãb n wiisi!
Bala, Sẽn-Ka-Saab sũur ket n puuda
ne tõnd n ka basdẽ ye.
9Sẽn-Ka-Saab yetame: «Wakat-kãnga,
rĩm-dãmbã ne nanambsã raood na n sɛɛme.
Maan-kʋʋdbã pelens na n yɩkame,
la Wẽnnaam no-rɛɛsdbã na n yɛɛsame.»
10La mam yeelame:
«Kayto! Zu-soabã Sẽn-Ka-Saabo,
yãmb belga nin-bãmbã!
Yãmb belga Zeruzalɛm nebã zãnga.
Yãmb yeela bãmb tɩ b na n zĩnda ne bãane,
la sʋʋg yaool n zoe n bee koakoayẽ!»
11Wakat-kãnga, b na n yeela Zeruzalɛm
nebã yaa:
«Sob-tʋʋlg yita we-raoogã pʋg
ne tãn-bɛɛlã zutu, n wat b nin-nongdsã zutu.
A ka wat n na n yelg-ba,
a ka wat n na n kãag-ba.
12Sob-toaag ning maam a Sẽn-Ka-Saab
sẽn kɩt tɩ watẽ wã yɩɩda bũmb a woto.
Moasã, mam meng n na n kao bãmb bʋʋdo.»
13Ade, bɛ wã wata wa sawato!
A saar-dãmbã tʋʋlem wẽnda wa sob-kãsenga.
A wiidã zoees tʋʋlem yɩɩda sɩlse.
Ad toog paam tõndo!
Tõnd sãam n sɛɛme!
14Zeruzalɛm nebã, yiis-y wẽngã y sũyã pʋsẽ,
n paam fãagre.
Yãmb na n kell n pa y tags-wẽnsã
pʋg hal tɩ ta dabʋre?
15Bala, koɛɛg n yit Dan n togsd bõn-kãnga,
la d wʋmda koe-beed sẽn yit Efrayiim soolmã
sẽn be tãms sʋkã sẽnẽ.
16Keoog-y buud toay-toayã,
la y moon n togs Zeruzalɛm nebã yaa:
«Bɛɛb n yi tẽn-zãrgẽ n watẽ.
Bãmb zẽkda b koees n tãsd Zʋʋda soolem tẽmsã.
17B na n gũbga Zeruzalɛm wa gũudb
sẽn gũbg pʋʋgo,
b sẽn kɩɩs maam a Sẽn-Ka-Saab yĩnga.
Maam a Sẽn-Ka-Saab n yeele.
18Yaa y manesmã ne y tʋʋmã
n kɩt tɩ bõn-kãng na n paam-yã.
Yaa tʋʋm-wẽnsã y sẽn maanã
n kɩt tɩ to-kãngã na n paam yãmba,
n kẽ yãmb n tãag y sũyã.»
A Zeremi sũur sãama toogã yĩnga
19M pʋg zabda! M pʋg zabda!
M sũur zabdame n dat n pusgi!
Mam sũur digdame tɩ m ka tõe
n sĩnd m noor ye.
Bala, mam wʋmda baorg peebgo,
la zabr kaasgo!
20Bãmb gomda sãoong woo sãoong yell bala!
Tẽngã fãa sãam n sɛɛme!
B na n sãama d sik zĩisã wakat-yɛnga,
b na n sãama d fu-rotã nif kamsg pʋgẽ.
21Mam na n yãta tãb-kaoore,
la m wʋmd baorg peebg hal tɩ ta dabʋre?
Wẽnnaam na n kaoo bʋʋdo
22Sẽn-Ka-Saab yetame:
«Sɩd-sɩdã, mam nebã ka tar yam ye.
Bãmb ka mi maam ye.
Bãmb yaa yalemba,
b ka tar bãngr ye.
Bãmb sẽn mi yaa wẽng maaneg bala,
b ka tol n mi neer maaneg ye.»
23Mam gesa dũniyã,
la ade, a ka tar yalẽ ye,
a yaa vɩʋʋgo.
Mam gesa saasẽ,
la m yãame t'a ka leb n tar a vẽenemã ye.
24Mam gesa tãmsã
la ade, b rigimdame,
la kunkubã fãa miimdame.
25Mam gesame la ade, ned ka be ye,
la yĩngr bõn-yɩgdɩ wã fãa yɩgame n looge.
26Mam gesame la ade,
zĩig ning sẽn dag n tar tɩɩsã lebga zĩ-peen-daaga.
La Sẽn-Ka-Saab sũ-puugrã yĩnga,
zĩ-kãng tẽmsã fãa sãamame.
27Ade, Sẽn-Ka-Saab yetame yaa:
«Tẽngã fãa na n lebga raboogo,
la m yaool n ka na n sãam-a zãng ye.
28Bõn-kãng yĩng kɩtame tɩ tẽngã fãa
be sũ-sãang pʋga, tɩ saasẽ lebg lik bida.
Yaa maam n yeele, la m yam-yãkr la a woto.
Mam ka maand m bãngẽ,
la m kõn lebs m noor poorẽ me ye.»
29Sɩyõ nebã sẽn wʋm saar-dãmbã
ne tãb-tãoodbã rãamdã,
b fãa zoeeme.
B zoe n tɩ soonda tuudẽ,
b zoe n tɩ rʋʋ pĩis zutu.
Tẽmsã lebga vɩɩdo,
ned ka leb n be b pʋsẽ ye.
30La yãmb a Zeruzalɛm nebã,
yaa bõe tɩ y yeelg fu-miidu,
la y ning sãnem fan-teedo,
la y ning y nin kɩrʋ?
Yãmb sẽn nags y mens n yaa neerã yaa zaalem.
Yãmb dolsen-dãmbã ka leb n dat-y ye,
b sẽn baood yaa y kũum.
31Mam wʋmda kelems sẽn wẽnd pag
sẽn kũmd dogem kelemse.
Yaa kelems sẽn wẽnd pag sẽn kũmd
a pʋg-sadem dogem kelemse.
Yaa Sɩyõ tẽn-neerã koɛɛga.
A tẽega a nus n yãbd n sesd n yetẽ:
«Toog paam maam!
M lʋɩɩ nin-kʋʋdb nusẽ!»
Currently Selected:
A Zeremi 4: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
