A Zeremi 3
3
Pʋg-yoodr sũur sẽn diglme
1Maam a Sẽn-Ka-Saab yetame:
«Ned sã n dig a pag tɩ ned a to rɩk-a,
a sɩdã tõe n leb n peeg-a lame sɩda?
A sã n leb n peeg-a,
a ka na n dẽgem tẽngã zãng sɩda?
La yãmb a Israyɛll nebã,
yãmb maana wa pʋg-yoodr
sẽn tar dolsen-dãmb wʋsgo.
Yãmb na n lebg n waa mam nengẽ sɩda?
2Zẽk-y y nens n ges tãn-bɛɛlã zutu.
Rẽ yĩnga, tãng bee bãmb sʋkã
yãmb sẽn ka maan wa yoaadb a zug sɩda?
Yãmb yasa sor noor n gũud y rolsen-dãmba,
wa Araab sẽn gũud neb we-raoog pʋgẽ.
Yãmb dẽgma tẽngã ne y yoobã,
la ne y wẽngã maanego.
3Yaa woto n kɩt tɩ saag ka ni sigri,
la sẽoog me ye.
La baoosgo, yãmb nensã yaa wa
pʋg-yoodr nenga.
Yãnd ka tar yãmb ye.
4La moasã, yãmb saag n boonda maam tɩ y ba,
la y zoa meng hal y yãadem wakate,
5la y yetẽ: Bãmb na n pa b
sũ-yikrã pʋg wakat fãa bɩ?
Bãmb sũur na n kell n yika
ne tõnd n ka basdẽ bɩ?
Yaa woto la yãmb dag n gomda,
la y baas n ket n maand wẽnga,
la y sɩd tõogame me!»
Israyɛll ne Zʋʋda maana wa pʋg-yoodre
6 #
2Rĩm 22.1—23.30, 2Kib 34.1—35.27 Rĩm a Zoziyaas zamaanẽ, Sẽn-Ka-Saab yeela maam yaa: «Fo yãnda Israyɛll nebã sẽn maan wa pʋg-yoodrã bɩ? Bãmb basa maam n dʋ tãms nins fãa sẽn yaa lug-lugã zutu, la b kẽng tɩɩs nins fãa sẽn tar maasmã tẽngre, n tɩ maan yoobo. 7La mam dag n tagsame tɩ b sã n maan yõwã fãa n sɛ, b na n lebgame n wa mam nengẽ, la bãmb ka lebg n wa ye. La bãmb saam-biisã sẽn yaa Zʋʋda nebã sẽn yaa zãmb dãmbã yãnda bãmba. 8Baa ne mam sẽn dig Israyɛll nebã b yoobã fãa yĩng n kõ-b basg sebrã, mam yãame tɩ Zʋʋda nebã sẽn yaa bãmb saam-biisã sẽn yaa zãmb dãmbã ka tol n zoe rabeem ye. Bãmb me kẽnga be n tɩ maan yoobo. 9Bãmb maana yoob ne kug la raad tɩ yaa n loog nugu, n dẽgem tẽngã. 10La ne rẽ fãa, Zʋʋda nebã sẽn yaa Israyɛll nebã saam-biisã sẽn yaa zãmb dãmbã ka lebg n wa mam nengẽ ne b sũyã fãa ye. B rag n ka be sɩdã pʋg ye. Maam a Sẽn-Ka-Saab n yeele.» 11Sẽn-Ka-Saab yeela maam yaa: «Baa ne Israyɛll nebã sẽn yaa yoaadbã sẽn bas maamã, bãmb tɩrlem n baas n yɩɩd Zʋʋda nebã sẽn yaa zãmb dãmbã.» 12Bãmb yeela maam tɩ m kẽng n zẽk m koɛɛg n tees rɩtg sẽnẽ, n togs gom-kãensã:
«Israyɛll nebã sẽn yaa yoaadba,
lebg-y n wa-y-yã!
Bala, mam ka na n leb n gãnem
m neng ne yãmb ye.
Mam yaa nonglem soaba.
Mam sũur ka na n yik n ka sigd ye.
Maam a Sẽn-Ka-Saab n yeele.
13Sak-y n deeg-y bal tɩ y kongame.
Yaa Sẽn-Ka-Saab sẽn yaa yãmb
Wẽnnaamã la y zãgs yã.
Yãmb kẽngame n tɩ waoog bu-zẽms
wẽnnaam-dãmb tɩɩs sẽn tar maasem tẽngre,
n ka kelg mam goamã ye.
Maam a Sẽn-Ka-Saab n yeele.»
Zeruzalɛm tigingu
14Maam a Sẽn-Ka-Saab yetame yaa: «Kom-wegemse, lebg-y n wa-y-yã, bala yaa maam la y soaala. Mam na n yãka nin-yɛng-yɛng tẽng fãa pʋgẽ, la neb a yiib-yiib buud fãa pʋgẽ, n tall n kẽng Sɩyõ. 15Mam na n kõo yãmb taoor dãmb sẽn ta m yam tɩ b soog-y ne bãngre, la ne yam-sõngo.» 16Maam a Sẽn-Ka-Saab yetame yaa: «Yãmb sã n lebg wʋsg n dog kamb tẽn-kãng pʋgẽ wakat-kãense, b ka na n leb n gom y kaoolã koglgã yell ye. Bãmb ka na n tags a yelle, wall b tẽeg a yell ye. B ka na n bao-a, wall b maan a to ye. 17Wakat-kãnga, b na n boola Zeruzalɛm tɩ ‹Sẽn-Ka-Saab naam geere.› Bu-zẽmsã fãa na n tigma be ne mam yʋʋre, la b na n basa b sũ-keglmã.
18Wakat-kãense, Zʋʋda buudã na n naaga Israyɛll buudã, tɩ b tũ taab n yi tẽng ning sẽn be rɩtgã, n kẽng tẽng ning mam sẽn dag n kõ b yaab-rãmbã.»
19Mam dag n nongẽ lame n geelg
yãmb n naag m kambã,
n kõ-y tẽng sẽn tar bõn-sõamyã,
tẽng sẽn yaa buud toay-toayã fãa tẽn-neere.
Mam dag n tagsame tɩ y na n boolẽ-la
maam tɩ y ba, n ka wẽnemd n bas maam ye.
20La yãmb a Israyɛll nebã zãmba maam
wa pag sẽn zãmb a sɩdã.
Maam a Sẽn-Ka-Saab n yeele.»
21B wʋmda Israyɛll neb yãbre,
la b se-yõkr tãn-bɛɛlã zutu.
Bala, bãmb bʋdgame n bas sorã,
n yĩm Sẽn-Ka-Saab sẽn yaa bãmb Wẽnnaamã.
22Maam a Sẽn-Ka-Saab yetame:
«Yãmb a nin-tõtse, lebg-y n wa-y
tɩ m kɩt tɩ y lebg sɩd dãmba.»
Bãmb yeelame:
«Ad-y tõndo, d wata yãmb nengẽ,
bala, yãmb a Sẽn-Ka-Saab n yaa
tõnd Wẽnnaam.»
23Sɩda, pʋʋsg ning sẽn maand kunkubã zutã,
ne bʋrg ning sẽn yit tãmsã zutã yaa zĩrẽ bala.
Sɩd-sɩdã, Israyɛll nebã fãagr yita Sẽn-Ka-Saab
sẽn yaa tõnd Wẽnnaamã nengẽ.
24Hal tõnd yãadem wakate,
yãndã sẽn yaa Baallã rɩɩ arzɛk ning d yaab-rãmbã
sẽn dag n tʋm n paamã.
A rɩɩ b piisã ne b niigã la b kambã.
25Bɩ d gãand d yãndã zugu,
la bɩ d paoogrã pil-du.
Bala, tõnd ne d yaab-rãmbã maana
yel-wẽn n beeg
Sẽn-Ka-Saab sẽn yaa tõnd Wẽnnaamã
hal d yãadem wakat tɩ ta rũndã.
Tõnd ka sak n deeg bãmb koɛɛgã ye.
Currently Selected:
A Zeremi 3: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
