A Zeremi 23
23
Koɛɛg nanamb-wẽnsã wɛɛngẽ
1Maam a Sẽn-Ka-Saab yetame: «Toog bee nanambs nins sẽn kɩt tɩ mam nebã sãamdẽ la b sãeegdẽ wã zugu!» 2Woto yĩnga, ad Sẽn-Ka-Saab sẽn yaa Israyɛll Wẽnnaamã sẽn yet nanambs nins sẽn zãad bãmb nebã: «Yaa yãmb n kɩt tɩ mam nebã sãeeg n looge. Yãmb dig-b lame n ka ges b yell ye. La moasã, mam na n gesa yãmb yell y tʋʋm-wẽnsã yĩnga.» Maam a Sẽn-Ka-Saab n yeele. 3«Mam mengã na n kɩtame tɩ m neb nins sẽn ketã yi tẽms nins fãa mam sẽn dig bãmb tɩ b kẽngã n lebg n wa yiri. La bãmb na n doga kamba, la b na n fɩɩgame n lebg wʋsgo. 4Mam na n kõo bãmb nanambs sẽn na n soog-ba, la rabeem ka na n leb n yõk bãmb ye. Ned kõn leb n yɛɛs bãmba, la bãmb ned ba a yembr kõn menem ye.» Maam a Sẽn-Ka-Saab n yeele.
5 #
Zer 33.14-16
Sẽn-Ka-Saab yetame:
«Ade, wakat n wate,
tɩ mam na n kɩt t'a Davɩɩd yageng
a yembr sẽn yaa nin-tɩrg lebg rĩm n dɩ naam,
n soog nebã ne yam,
la a kaood buudã ne zemsg la ne tɩrlem
tẽngã pʋgẽ.
6Yaa yẽnda wakat la Zʋʋda nebã na n paam fãagre,
tɩ Israyɛll nebã zĩnd ne bãane.
B na n boola rĩmã yʋʋr tɩ
Sẽn-Ka-Saab sẽn yaa tõnd tɩrlem.»
7Sẽn-Ka-Saab yeelame tɩ wakat n wate, tɩ nebã ka na n leb n yeel tɩ: «Mam wẽenda ne Sẽn-Ka-Saab sẽn vɩ wã sẽn yiis Israyɛll nebã Ezɩpt tẽngã yʋʋr ye. 8Fo na n yeelame: ‹Mam wẽenda ne Sẽn-Ka-Saab sẽn vɩ wã yʋʋre, soab ning sẽn dag n dig-a Israyɛll nebã tɩ b kẽng rɩtg sẽnẽ ne tẽms a taabã pʋsẽ, n yaool n lebg n tɩ tall bãmb n wa tɩ b zĩnd b tẽngã pʋgẽ wã.› »
Koɛɛg zĩrẽ no-rɛɛsdbã wɛɛngẽ
9Koɛɛg no-rɛɛsdbã yĩnga:
Mam sũur sãamame,
la m kõabã fãa rigdame.
Mam yaa wa ned sẽn tɩg rãam,
la wa ned sẽn yũ reezẽ rãam n tuumdẽ,
Sẽn-Ka-Saab ne b gom-sõamy
wã yĩnga.
10Bala, tẽngã pida ne yoaadba.
Kãab-wẽngã kɩtame tɩ tẽngã be
sũ-sãan-kãseng pʋga.
Rũmsã wãbneg zĩis sẽn be we-raoogã
pʋgẽ wã kʋɩɩme.
Bãmb zoet n dabda wẽng maanego.
Bãmb sũur keemame tɩ maan
sẽn kis bala.
11No-rɛɛsdbã ne maan-kʋʋdbã
rẽgma b mense.
Baa mam doogã pʋga,
mam yãta b tʋʋm-wẽnsã.
Maam a Sẽn-Ka-Saab n yeele.
12Yaa rẽ n kɩt tɩ b sorã na n yɩ
sals ne lika.
B na n tusa bãmb tɩ b lʋɩ,
bala, yʋʋmd ning b sẽn na n sɩbg bãmbã,
mam na n kɩtame tɩ toog paam-ba.
Maam a Sẽn-Ka-Saab n yeele.
13Mam yãame tɩ
Samaari no-rɛɛsdbã
maana yɛl sẽn ka sakd togsgo:
Bãmb togsa pĩnd-n-bãngr goam
ne a Baall yʋʋre,
bãmb kẽesa Israyɛll sẽn yaa mam nebã moogo.
14 #
Sɩng 18.20, Eze 16.49 La Zeruzalɛm no-rɛɛsdbã nengẽ,
mam yãnda yɛl sẽn yaa wẽng n yɩɩda:
Bãmb yaa yoaadba,
bãmb pʋgda zĩrẽ-beedo.
Bãmb paasda nin-wẽns pãnga,
hal tɩ ned ka be n dat
n bas wẽngã maaneg ye.
Mam geta bãmb fãa wa Sodom nebã,
la Zeruzalɛm nebã yaa
wa Gomoor nebã.
15Woto yĩnga, ad Saasẽ-Pãng-Soabã
sẽn yet no-rɛɛsdbã wɛɛngẽ:
«Mam na n kõo bãmb rɩɩb sẽn yaa
toog liga tɩ b rɩ,
la m kɩt tɩ b yũ koom sẽn tar zẽnem.
Bala, Zeruzalɛm no-rɛɛsdbã kɩtame
tɩ tẽngã fãa pid ne rẽgdo.»
16Saasẽ-Pãng-Soabã yetame:
«Da kelg-y pĩnd-n-bãngr goam nins
no-rɛɛsdbã sẽn togsd yãmbã ye.
Bãmb belgda yãmb ne gom-vɩɩdo.
Bãmb sẽn togsd goam ninsã ka yit
Sẽn-Ka-Saab noorẽ ye.
Yaa bãmb mensã sũy tagsgo.»
17Bãmb tol n yeta neb nins
sẽn paoogd Sẽn-Ka-Saab goamã yaa:
«Bũmb kõn maan yãmb ye!»
Bãmb yeta neb nins fãa
sẽn keng b sũyã yaa:
«Toog kõn paam yãmb ye!»
18Bala, ãnda soab n zĩnd
Sẽn-Ka-Saab tigingã pʋga,
n yãnd la a wʋm b goamã?
Ãnda n kelg b goamã neer la a wʋm-a?
19Ade, yaa Sẽn-Ka-Saab
sobg n fugdi.
Yaa sũ-puug-kãsenga,
a bee nin-wẽnsã zut n gõnemdẽ.
20Sẽn-Ka-Saab sũurã ka na n sigi,
tɩ b ka maan b sẽn dat n maanã,
la b pids b saagrã ye.
Wakatã sã n ta,
yãmb na n wʋma bõn-kãng võore.
21Sẽn-Ka-Saab yetame:
Mam ka tʋm no-rɛɛsdb-kãensã ye,
la b saad n zoetame.
Mam ka kõ-b gomd ye,
la bãmb togsda pĩnd-n-bãngr goamã.
22Bãmb sã n dag n zĩndẽ mam tigingẽ
wã, b rag n na n dɩkẽ-la m goamã
n togs m nebã,
n kɩt tɩ b bas b manesem-wẽnsã
ne b tʋʋm-wẽnsã.
23Sẽn-Ka-Saab sokdame yaa:
«Dẽ yĩnga, mam yaa Wẽnnaam sẽn ne
yambẽ bal n ka ne yɩɩg la?»
24Sẽn-Ka-Saab yetame:
«Rẽ yĩnga, ned tõe n soondame tɩ m ka
yãnd-a sɩda?»
Sẽn-Ka-Saab yetame:
«Mam ka be yĩngr la tẽng sɩda?
25Mam wʋma bũmb nins no-rɛɛsdbã sẽn yetã. Bãmb yagda zĩrẽ, n yetẽ tɩ yaa ne mam yʋʋr la b gomda. Bãmb yetame tɩ b zãmsa zãmsdo, tɩ b paama vẽnegre. 26Zãmb na n zĩnda no-rɛɛsdbã sũy pʋsẽ tɩ b togsd zĩrẽ pĩnd-n-bãngr goam hal tɩ ta dabʋre? 27Bãmb togsda taab b zãmsdã n dat tɩ m nebã yĩm m yʋʋrã wa b yaab-rãmbã sẽn dag n yĩm mam yell a Baall yĩngã. 28Bɩ no-rɛɛs ning sẽn paam-a zãmsd togs a zãmsdã, la bɩ ned ning sẽn tar-a mam goamã togs m goamã vẽenega! Bõe lagem-n-taar n be wudg ne ki sʋka? Maam Sẽn-Ka-Saab n yeele.»
29Sẽn-Ka-Saab yetame: Mam goamã ka wẽnd bugum sɩda? A ka wẽnd wa zãar sẽn wãad pĩig kugr sɩda? 30Sẽn-Ka-Saab yetame: «Ade, mam na n zaba ne no-rɛɛsdb nins sẽn zuud mam goamã taab nengẽ n yetẽ tɩ yaa maam n gomã.» 31Sẽn-Ka-Saab yetame: «Ade, mam na n zaba ne no-rɛɛsdb nins sẽn gomd b mens goam n yaool n yetẽ tɩ yaa maam n gomã.» 32Sẽn-Ka-Saab yetame: «Mam na n zaba ne no-rɛɛsdb nins sẽn togsd zĩrẽ zãmsdo, n tudgd mam nebã ne b zĩrẽ wã, la ne b gom-vɩɩdã, tɩ yaool n ka maam n tʋm-ba, la m ka kõ-b noor me ye. Bãmb ka tar yõod ne m nebã ye.» 33Sẽn-Ka-Saab yetame: «Zeremi, nin-bãmbã wall no-rɛɛs bɩ maan-kʋʋd sã n sok foom tɩ Sẽn-Ka-Saab sɩbgr koɛɛgã yaa bʋgo, la zɩɩbã yaa bʋgo, bɩ f yeel-b tɩ yaa bãmb mensã la zɩɩbã, la f yeel-b tɩ mam na n dig-b-lame tɩ b zãag ne maam. 34La no-rɛɛs wall maan-kʋʋd bɩ ned a to sã n yeel tɩ Sẽn-Ka-Saab sɩbgr koɛɛgã la woto, mam na n sɩbga yẽnda ne a zakã rãmb fãa.» 35Dẽ, bɩ ned kam fãa sok a to ne a saam-biig a woto: «Sẽn-Ka-Saab leokame tɩ bõe? Sẽn-Ka-Saab yeelame tɩ bõe?» 36La y ra tol n leb n gom Sẽn-Ka-Saab sɩbgr koɛɛgã yell ye. Bala, yaa ned kam fãa gomd n na n yɩ a sɩbgr koɛɛga, yãmb sẽn golemd Wẽnnaam sẽn vɩ sẽn yaa Saasẽ-Pãng-Soabã sẽn yaa tõnd Wẽnnaam goamã yĩnga.› 37Sok no-rɛɛsdbã yaa: ‹Sẽn-Ka-Saab leokame tɩ bõe? Sẽn-Ka-Saab yeelame tɩ bõe?› 38La yãmb sã n ket n yetẽ tɩ Sẽn-Ka-Saab sɩbgr koɛɛga, maam a Sẽn-Ka-Saab yetame: «Yãmb sẽn gom a woto tɩ mam yaool n kɩt tɩ b yeel yãmb tɩ y ra yeel a woto wã, 39mam na n yĩma yãmb yelle. Mam na n basa yãmba, la m bas tẽng ning m sẽn dag n kõ yãmb ne y yaab-rãmbã. 40Mam na n kɩtame tɩ y paam paoogr wakat fãa tɩ yɩ yãnd ned sẽn kõn tol n yĩm ye.»
Currently Selected:
A Zeremi 23: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
