A Zeremi 22
22
Zʋʋda rĩmã zak rãmb sɩbgre
1Ade, Sẽn-Ka-Saab yetame: «Kẽng Zʋʋda rĩmã na-yirã n tɩ togs gom-kãensã. 2Yeel yẽnda yaa: Zʋʋda rĩmã, fo sẽn zao a Davɩɩd naam geerã, foom ne f tʋmtʋmdbã la f nebã sẽn tũud rigno-kãensã n kẽedẽ wã, kelg-y Sẽn-Ka-Saab goamã!» 3Ade, Sẽn-Ka-Saab yetame: «Bʋ-y bʋʋdã tɩrg n fãag b sẽn fãad a soabã namsdã nugẽ. Ra maan-y sãambã ne kɩɩbsã la pʋg-kõapã pãng ye. Ra maan-y-b wẽnga, la y ra raag bʋʋm soab zɩɩm zĩ-kãngã ye. 4Bala, yãmb sã n sɩd sak gom-kãensã, a Davɩɩd yagensã sʋka, rĩm-dãmb ka na n kong sẽn na n zaoond a Davɩɩd naam geerã, n tũud ro-kãngã rignoyã n kẽedẽ, la b zao saar-dãmb ne wiid ye. Bãmba, b tʋmtʋmdbã, ne b nebã. 5#Mat 23.28, Luk 13.35La yãmb sã n ka sak gom-kãensã, mam wẽenda ne m menga, tɩ ro-kãngã na n lebga raboogo. Maam a Sẽn-Ka-Saab n yeele.»
6Ad Sẽn-Ka-Saab sẽn yet Zʋʋda
na-yirã wɛɛngẽ:
«Fo yaa neer wa Galaad ne Libã tãngã.
Mam yaool n na n kɩtame tɩ f lebg we-raoogo,
la m kɩt tɩ f lebg tẽng ned sẽn ka leb
n be a pʋgẽ ye.
7Mam yãka sãamdb tɩ b wat n na n zab ne-yã.
Bãmb ned kam fãa zãada a zab-teoogo.
Bãmb na n kɛɛ yãmb sɛɛdr tɩɩs nins
sẽn ya-b neeb n yɩɩdã n yõog bugum.
8Buud wʋsg na n tũu tẽn-kãngã sɛɛgẽ n looge.» Bãmb na n sokda taaba: Bõe yĩng tɩ Sẽn-Ka-Saab maan tẽn-kãsen-kãngã a woto? 9La b na n leok-b lame n yeele: Yaa tẽn-kãngã nebã sẽn bas Sẽn-Ka-Saab sẽn yaa bãmb Wẽnnaam kaoolã, n wõgemd n waoog buud a taab wẽnnaam-dãmba, la b sak-bã yĩng n kɩt tɩ yaa a woto.
Koɛɛg a Salum wɛɛngẽ
10Ra yãb-y sẽn ki-a wã yĩng ye.
Ra sãam-y y sũur a yĩng ye.
Yãb-y sẽn loogd-a wã yĩnga,
bala, yẽnda ka na n leb n wa,
la a ka na n leb n yãnd a ba-yirã ye.
11 #
2Rĩm 23.31-34, 2Kib 36.1-4 Bala, Sẽn-Ka-Saab goma Zʋʋda rĩm a Zoziyaas biig a Salum wɛɛngẽ, soab ning sẽn dag n led-a a ba wã sẽn loogã zĩigẽ n dɩt naamã n yeele: «Yẽnda ka na n tol n leb n wa ye. 12Bala, yẽnda na n kii tẽng ning b sẽn na n tall-a n kẽngã pʋgẽ. Yẽnda ka na n leb n yãnd tẽn-kãngã abada.»
13Toog bee ned ning sẽn maand wẽgd
n met a roog zugu!
Yẽnda maanda zãmb n met a yĩngr doogo,
la a kɩtdẽ t'a taab tʋmd zaalem,
t'a ka kõt bãmb b yaood ye.
14Yẽnda yetame:
«Mam na n mee ro-kãseng sẽn tar
ro-pʋs sẽn yaa yalems yĩngr doogẽ wã
m mengã yĩnga.»
Yẽnda ningda a roogã peem-leese,
la a ningd-a ne sɛɛdr tɩɩs raado,
la a bolgd-a-la ne goor sẽn yaa miuugu!
15Fo tagsdame tɩ yaa f sẽn maneg
f roogã ne sɛɛdr tɩɩs raadã yĩng n kɩt
tɩ fo yaa rĩm bɩ?
Fo ba wã rag n tar n dɩtame la a yũuda,
la ne rẽ fãa, yẽnda rag n maanda sẽn zemse,
la sẽn yaa tɩrga,
tɩ bũmb baa fɩ ka paoog-a ye.
16Yẽnda rag n kaooda naong rãmb ne nimbãan-dãmb
bʋʋd tɩrga.
Maam a Sẽn-Ka-Saab bãngr yɩɩda a woto la?
17La foom, fo gesg la f tagsg pʋgẽ,
fo sẽn baood yaa f meng nafr bala,
f baood n daaga sẽn ka tar-a yell zɩɩm,
la f wõr neb n maan-b pãnga.
18 #
2Rĩm 23.36—24.6, 2Kib 36.5-7 Woto yĩnga, ad Sẽn-Ka-Saab sẽn yeta, Zʋʋda rĩm a Zoziyaas biig a Yoyakim wɛɛngẽ:
«B ka na n yãb a yĩng ye.
B ka na n yeel tɩ ‹toogo, m saam-biiga›,
wall ‹toogo, m tão-poak ye!
B ka na n yãb a yĩng ye.
B ka na n yeele:
Toogo, m soaala›, wall ‹toogo, m dĩm› ye!
19B na n muma yẽnda wa bõang bala,
b na n vuu yẽnda n yiis Zeruzalɛm n tɩ lobe.
20Zeruzalɛm nebã, rʋ-y Libã tãngã zug n yãbe!
Kɩt-y tɩ y koees sãd Basã tãngã zugu!
Rʋ-y Abarim tãngã zug n kelme!
Bala, b sãama f rolsen-dãmbã fãa.
21Maam a Sẽn-Ka-Saab rag n goma ne yãmb
wakat ning y sẽn dag n zĩ bãanã,
la yãmb yeelame tɩ y kõn deeg ye.
Yãmb yel-manesem la a woto
hal y bi-bɩɩlem wakate,
la y ka kelg maam ye.
22Sebg na n dɩka y nanambsã,
la b na n wʋka neb nins sẽn nong
yãmbã n tɩ maan yembse.
La yãmb na n paama yãnd ne paoogr
y wẽngã fãa yĩnga.
23Yãmb sẽn be Libã wã,
yãmb sẽn maan y tʋgdã sɛɛdr tɩɩsã zutã,
toog sã n wa yãmb zutu, y na n wõosame.
Yãmb na n kũsa wa pag sẽn kũmd dogem.»
Koɛɛg a Yoyakim biig a Koniya wɛɛngẽ
24 #
2Rĩm 24.8-15, 2Kib 36.9,10 Maam a Sẽn-Ka-Saab sẽn vɩ wã wẽendame n yetẽ tɩ baa Zʋʋda rĩm a Yoyakim biig a Koniya sã n dag n yaẽ mam nug tikr bãnd n be mam dɩtg nugẽ wã, mam dag n na n pidgẽ-yã-a lame n lobe. 25Mam na n basa foom neb nins sẽn dat n kʋ foomã nugẽ, la fo sẽn zoet-b rãmbã nugẽ, sẽn dat n togs tɩ Babilond dĩm a Nebukatnedzaar ne Kalde nebã. 26Mam na n diga foom ne f ma-roakã tɩ y kẽng tẽng yãmb sẽn ka rog a pʋgẽ n tɩ ki be. 27Bãmb kõn tol n lebg n wa tẽn-kãngã bãmb sẽn dat n yãnd ne b sũur fãa wã pʋgẽ ye. 28Rẽ yĩnga, a Koniya yaa wa bõn-zaok tɩ ned ka leb n dat-a la? Bõe tɩ b rig yẽnda ne a kambã tɩ b kẽng tẽng bãmb sẽn ka mi? 29Tẽnga! Tẽnga! Tẽnga! Kelg Sẽn-Ka-Saab goamã! 30Sẽn-Ka-Saab yetame: «Gʋls-y rao-kãng wa ned sẽn ka paam biiga, la wa ned sẽn ka na n tol n paam tõogr a vɩɩmã pʋgẽ ye. Bala, yẽnda ka na n tol n paam yageng sẽn na n zaoond a Davɩɩd naam geerã n soog Zʋʋda ye.» Maam a Sẽn-Ka-Saab n yeele.
Currently Selected:
A Zeremi 22: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
