A Zeremi 21
21
Sẽn-Ka-Saab leoka rĩm a Sedesiyaase
1Ad goam nins Sẽn-Ka-Saab sẽn kõ a Zeremi, wakat ning rĩm a Sedesiyaas sẽn tʋm a Malkiya biig a Pasewʋʋr ne a Maseya biig a Sofoni sẽn yaa maan-kʋʋdã t'a tɩ yeele: 2#2Rĩm 25.1-11, 2Kib 36.17-21D kotame tɩ y sok Sẽn-Ka-Saab n kõ-do. Bala, Babilond dĩm a Nebukatnedzaar zabda ne tõndo. Daarninga, Sẽn-Ka-Saab na n maana bõn-bãnd tõnd yĩng n kɩt t'a lebg n looge. 3La a Zeremi yeela bãmb tɩ b tɩ yeel a Sedesiyaas yaa: 4«Sẽn-Ka-Saab sẽn yaa Israyɛll Wẽnnaamã yetame: ‹Mam na n kɩtame tɩ tãb-biisã ra leb n zab ne Babilond dĩmã, la Kalde nebã sẽn gũbg yãmbã ye. Mam na n tigim-b-la tẽngã pʋga. 5La mam mengã n na n tẽeg m nug sẽn tar pãngã n zab ne yãmb ne sũ-yikri, la sũ-puugri ne sũ-kãbr wʋsgo. 6Mam na n kɩtame tɩ bã-loangdg sẽn yaa kɛgeng kʋ tẽn-kãngã nebã ne a rũmsã fãa.› » 7Sẽn-Ka-Saab yetame: «Dẽ poore, mam na n basa Zʋʋda rĩm a Sedesiyaas ne a tʋmtʋmdbã, la neb nins sẽn põs bã-longdsã ne komã la zabr sʋʋgã, Babilond dĩm a Nebukatnedzaar ne bãmb bɛɛb nins sẽn baood bãmb n dat n kʋ wã nugẽ. Babilond dĩmã na n kʋʋ bãmb ne sʋʋs n ka bas bãmb tɩ b põse, wall b zoe b nimbãaneg ye.» 8Sẽn-Ka-Saab yeela a Zeremi t'a yeel nebã yaa: «Ade, mam ninga vɩɩm sor ne kũum sor yãmb taoore. 9Ned sã n pa tẽn-kãngã pʋgẽ, zabr sʋʋg wall kom bɩ bã-loangdg n na n kʋ a soaba. La soab ning sẽn na n yi n dɩk a meng n kõ Kalde neb nins sẽn gũbg Zeruzalɛm tẽngã, b ka na n kʋ a soab ye, a na n vɩɩmdame. 10Bala, mam wẽnemdeda m neng n tees tẽn-kãngã, la ka a neer yĩng ye, yaa sẽn na n yɩlẽ tɩ toog paam-a. B na n basa tẽngã Babilond dĩmã nugẽ, t'a ning-a bugum.» Sẽn-Ka-Saab n yeele.
Koɛɛg Zʋʋda rĩmã zak yĩnga
11Ad koɛɛg Zʋʋda rĩmã zak yĩnga:
Kelg-y Sẽn-Ka-Saab koɛɛga!
12A Davɩɩd yagense,
Sẽn-Ka-Saab yetame:
Bʋ-y bʋʋdã tɩrg yibeoog fãa.
Fãag-y b sẽn fãad a soabã namsdã nugẽ,
tɩ y tʋʋm-wẽnsã ra wa kɩt tɩ m sũurã yik wa bugum,
tɩ ned ka be sẽn na n kiis-a ye.
13Sẽn-Ka-Saab yetame:
«Yãmb dãmb fãa sẽn be longẽ wã
ne tẽn-nabdrẽ, pĩigã zugã, mam zabda ne-yã!
Yãmb dãmb sẽn yete:
Ãnda n na n sig n wa zab ne tõndo?
Ãnda n na n tõog n kẽ tõnd zĩ-solgdsẽ wã?
14Mam na n sɩbga yãmb wa sẽn zems y tʋʋmã.
Mam na n ninga y kãgrã bugum,
tɩ bugmã rɩ zĩis nins fãa sẽn gũbgã.»
Maam a Sẽn-Ka-Saab n yeele.
Currently Selected:
A Zeremi 21: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
