A Zeremi 20
20
A Zeremi namsgo
1A Imeer biig a Pasewʋʋr sẽn yaa maan-kʋʋda, la Sẽn-Ka-Saab roogã gũudbã naabã wʋma pĩnd-n-bãngr gom-kãensã a Zeremi sẽn togsã. 2La a Pasewʋʋr yõka a Zeremi n pãbe, n balg-a Sẽn-Ka-Saab roogã zak rignoor ning sẽn boond tɩ Benzame digno-kãsengã. 3La vẽkembeoogo, a Pasewʋʋr baaga a Zeremi t'a Zeremi yeele: «Sẽn-Ka-Saab ka pʋd y yʋʋr t'a Pasewʋʋr ye. B pʋd-y lame t'a Magoor-Misaabe, sẽn dat n togs tɩ ‹yɛɛsg n be zĩigã fãa.› 4Bala, Sẽn-Ka-Saab yetame: Mam na n kɩtame tɩ yãmb ne y zo-rãmbã fãa yɛɛse. Y bɛɛbã na n kʋʋ yãmb ne zabr sʋʋs y nifẽ. La mam na n kɩtame tɩ Babilond dĩmã wa yõg Zʋʋda nebã fãa n tall n kẽng Babilonde, la b kʋ bãmb ne zabr sʋʋga. 5La bãmb na n kɩtame tɩ b bɛɛbã wʋk arzegsã fãa ne b paoongã la b te-sõamy wã fãa sẽn be tẽn-kãngã pʋgẽ wã, ne Zʋʋda rĩm-dãmbã paoongã fãa n kẽng Babilonde. 6La foom a Pasewʋʋre, foom ne f zakã rãmb fãa na n kẽnga Babilond n tɩ yɩ yembse, n ki tɩ b mum yãmb be. Na n yɩɩ yãmb ne y zo-rãmb nins yãmb sẽn dag n togs zĩrẽ pĩnd-n-bãngr goamã.»
A Zeremi yẽgengo
7Sẽn-Ka-Saabo, yãmb belga maam,
la mam deega belgrã.
Yãmb wõra maam n tõoge.
Nebã laada maam daar fãa.
Nebã fãa yaanda maam.
8Bala, wakat fãa, mam sã n gomda,
mam zẽkda m koɛɛg n yetẽ:
«Wẽnga! Sãoongo!»
Yãmb goamã yĩnga,
mam paamda paoogr ne yaalg wakat fãa.
9Mam sã n yeel tɩ m ka na n leb
n togs Sẽn-Ka-Saab yelle,
wall m gom ne bãmb yʋʋre,
a lebgda wa bugum m sũurã pʋgẽ,
a bee m kõabã pʋsẽ.
Mam maoodame n dat n sĩndi,
la m ka tõe ye.
No-rɛɛsã basa a meng Wẽnnaam nugẽ
10Mam wʋmda neb wʋsg sẽn wɩt
maam n yetẽ:
«A ‹Yɛɛsg-n-be-zĩigã-fãa!› »
Wilg-y-yã a sẽn beẽ!
Wilg-y-yã a zĩiga!
Mam zo-rãmbã fãa geta maam n gũud
m lʋɩɩse.
Bãmb yetame:
«Wa-y tɩ d belg-a tɩ daarning bɩ d tõog
n dok d sũur ne-a.
11La Sẽn-Ka-Saab bee ne maam wa
gãndaoog sẽn tar pãnga.
Rẽ n kɩt tɩ mam namsdbã na n lak n lʋɩ.
Bãmb ka na n tõog maam ye.
Bãmb na n dɩɩ yãnde, b sẽn ka tõogã yĩnga.
Na n yɩɩ yãnd sẽn ka na n sɛ abada,
hal tɩ b ka leb n tõe n yĩm a yell ye.
12Saasẽ-Pãng-Soaba, yãmb n feesd nin-tɩrga,
yãmb n mi sẽn be ninsaal tagsgẽ
la a sũurẽ.
Bas-y tɩ m yãnd y sẽn na n dok y sũur
ne-b to-to.
Bala, mam basa m yɛlã fãa ne yãmba.
13Yɩɩl-y Sẽn-Ka-Saab yĩnga,
pẽg-y bãmba!
Bala, bãmb fãagda nimbãan-ned
nin-wẽns nugẽ.
14 #
Zoob 3.1-19
Bɩ kãab-wẽng zĩnd daar ning m ma
sẽn dog maamã zugu!
Bɩ raarã ra zĩnd bark ye!
15Bɩ kãab-wẽng zĩnd ned ning
sẽn dag n kẽng m ba nengẽ n tɩ togs-a
t'a paama bi-ribla, tɩ kiba-kãng kõ-a
sũ-noogã zugu!
16Bɩ nin-kãng yɩ wa tẽms nins Sẽn-Ka-Saab
sẽn sãam n ka zoe b nimbãanegã!
Bɩ a wʋm toog kelems yibeoogo,
la zabr kelems wĩnto-sʋka.
17Bõe t'a ka kʋ maam tɩ
m ket m ma pʋgẽ?
M ma wã pʋg n dag na n yɩẽ mam yaoogo,
tɩ m kell n pa be wakat fãa.
18Bõe tɩ m yi m ma pʋgẽ n na n yãnd toog
ne sũ-sãanga, la m na n ki ne yãnde?»
Currently Selected:
A Zeremi 20: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
