A Zeremi 19
19
Yʋʋr sẽn wãage
1Sẽn-Ka-Saab yeela maam yaa: «Kẽng n tɩ ra yʋʋre, la f kɩt tɩ kãsem-dãmb kẽer ne maan-kʋʋdbã nin-kẽemb kẽer yãag-fo. 2#2Rĩm 23.10, Zer 7.30-32, 32.34,35Yi n kẽng Bɛn-Hinom longã sẽn be sa-peesã rignoorẽ wã, n tɩ togs goam nins bãmb sẽn na n kõ maamã. 3Yeel Zʋʋda rĩm-dãmbã ne Zeruzalɛm nebã, tɩ Saasẽ-Pãng-Soabã sẽn yaa Israyɛll nebã Wẽnnaamã yetame: Mam na n kɩtame tɩ to-kãseng paam zĩ-kãngã tɩ ned sã n wʋm bɩ a pɛleng yɩke. 4Bala, bãmb basa maam n yõogd wisd n kõt buud a taab wẽnnaam-dãmb bãmb ne b yaab-rãmbã la Zʋʋda rĩm-dãmbã sẽn ka mi, n dẽgem zĩ-kãngã. Bãmb pidsa zĩ-kãngã ne bʋʋm dãmb zɩɩm. 5#Mk 18.21Bãmb mee maoong kʋʋb zĩis Baall yĩnga, n dɩk b kamb n maan maand n yõogd bugum tẽn-kugã zut n kõ Baalle. Mam yaool n ka kõ-b noor bɩ tõog tɩ b maan woto ye, la a nan ka wa m yamẽ tɩ m yeel bãmb tɩ b maan bũmb a woto ye. 6Woto yĩnga, mam yeelame tɩ wakat n wate, tɩ b ka na n leb n bool zĩ-kãngã tɩ Tofɛt wall Bɛn-Hinom long ye. B na n bool-a lame tɩ nin-kʋʋb longo. Maam a Sẽn-Ka-Saab n yeele. 7Mam na n kɩtame tɩ bũmb nins Zʋʋda nebã ne Zeruzalɛm nebã sẽn dat n maanã lebg zaalem zĩ-kãngã pʋgẽ. La bãmb mensã, zabr sʋʋg n na n kʋ b nebã. B bɛɛb na n tõog-b lame tɩ b pa tãp pʋgẽ. La mam na n kɩtame tɩ b lebg yĩngr bõn-yɩgdɩ ne we-rũms rɩɩbo. 8Mam na n kɩtame tɩ tẽn-kãngã lebg bõn-yɛɛsdga. So-loaadbã fãa na n yãnda a poglgã tɩ b pɛleng yɩke. Bãmb na n yɛɛsame n fɩɩle. 9B bɛɛbã sẽn baood bãmb n dat n kʋ wã na n wa gũbga b tẽngã. La bãmb na n zĩnda yɩɩr ne pelen-yɩk pʋga, halɩ tɩ b wa wãbd b mensã kambã, la b wãbd taaba.» 10La Sẽn-Ka-Saab yeela maam yaa: «Wãag yʋʋrã neb nins sẽn tũ foomã nifẽ, 11n yeel-b tɩ Saasẽ-Pãng-Soabã yetame: Woto me, mam na n wãa nin-kãensã ne tẽn-kãngã wa rʋk b sẽn wã tɩ ka tõe n leb n maneg abada. Neb na n muma b kũum Tofɛte, zĩig a to sẽn ka be wã yĩnga. 12Mam na n maana zĩ-kãngã ne a nebã a woto. Mam na n kɩtame tɩ tẽn-kãngã lebg wa Tofɛte. Maam a Sẽn-Ka-Saab n yeele. 13Zeruzalɛm dotã ne Zʋʋda rĩm-dãmbã rotã, rot nins fãa b sẽn dag n yõogd wisd b zut yĩngr ãds yĩngã, la b pʋdgd bõn-yũudl b zut buud a taab wẽnnaam-dãmbã yĩngã, na n dẽgma wa Tofɛt zĩigã.» 14A Zeremi yii Tofɛte, zĩig ning Sẽn-Ka-Saab sẽn dag n tʋm-a t'a tɩ togs pĩnd-n-bãngr goamã, n kẽng n tɩ yals Sẽn-Ka-Saab zakã pʋgẽ n yeel nebã fãa yaa: 15Ad Saasẽ-Pãng-Soabã sẽn yaa Israyɛll Wẽnnaamã sẽn yeta: Mam na n kɩtame tɩ mam sẽn gom toog ning yellã paam tẽn-kãngã ne a tẽn-kɩremsã fãa. Bala, bãmb nebã kɩɩsa maam n ka reeg m goamã ye.
Currently Selected:
A Zeremi 19: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
