A Zeremi 18
18
A Zeremi kẽnga yagb nẽngẽ
1Sẽn-Ka-Saab yeela a Zeremi yaa: 2Yik n kẽng yagbã yir tɩ yaa beenẽ la m na n gom ne-fo. 3Dẽ, mam kẽnga yagbã yir n tɩ yã t'a zĩ a yagd-doogẽ n yagdẽ. 4Rʋk ning yagbã sẽn yagdã sãamame, la yẽnda rɩk a yagdã n leb n maan rʋk a to sẽn ta a yam. 5La Sẽn-Ka-Saab soka maam yaa: 6Israyɛll nebã, dẽ yĩnga, mam ka tõe n maan yãmb wa yagbã sẽn maandã sɩda? Yagdã sẽn yaa bũmb ning yagbã nugẽ wã, yãmb me yaa a woto mam nugẽ. Maam a Sẽn-Ka-Saab n yeele. 7Mam sã n gom buud bɩ soolem yelle, n yeel tɩ m na n viig-a lame, la m siig-a, n kɩt t'a meneme, 8t'a tek yam n bas wẽng ning a sẽn dag n maandã, mam me na n teka yam n bas wẽng ning m sẽn dag n saagd a yĩngã. 9Mam sã n gom buud bɩ soolem yelle, n yeel tɩ m na n me-a lame la m tilg-a, 10t'a kɩɩs n maan sẽn ka noom maam, mam me na n teka yam n bas maan-neer ning m sẽn dag n saagd n dat n maanã. 11La moasã, mam kota foom tɩ f yeel Zʋʋda ne Zeruzalɛm nebã yaa: Ade, Sẽn-Ka-Saab yetame: «Mam segenda toog y yĩnga, mam saagda zabr y yĩnga. Dẽ, bɩ yãmb ned kam fãa tek yam n bas a manesem-wẽnsã. Tek-y y manesmã ne y tʋʋmã!» 12La nebã na n yeelame: «Ra nams-y y meng ye! Tõnd ned kam fãa na n maana wa a sẽn tagsde, d na n maana wa sẽn zems d sũ-keglmã.»
Israyɛll nebã yĩma b Wẽnnaamã yelle
13Woto yĩnga, Sẽn-Ka-Saab yeelame:
«Sok buud a taabã n gese,
ãndã n wʋm bũmb a woto?
Israyɛll nebã maana wẽng wʋsgo.
14Pĩisã sẽn be weoogẽ wã koom
sɛtame sɩda?
Libã tãmsã kʋɩls koom sẽn yaa maasgã
kʋɩtame sɩda?
15Mam nebã yaool n yĩma mam yelle.
Bãmb yõogda wisd n kõt belgr wẽnnaam-dãmba.
B belga bãmb tɩ b bʋdg n bas b kʋdem-wẽndẽ soayã,
n kɩt tɩ b tũ so-bugsi, la soay sẽn ka kõoge.
16B kɩtame tɩ bãmb tẽngã lebg zĩ-vɩʋʋgo.
B kɩtame t'a lebg yɛɛsg bũmb wakat fãa.
Neb nins fãa sẽn tũud be n loogdẽ wã sã n yãnd-a,
b pɛleng yɩkdame tɩ b gird b zutu.
17Mam na n kɩtame tɩ b bɛɛbã rig-b
tɩ b sãeeg wa sobg sẽn yi yaang n dɩkd bũmbu.
B sãoongã wakate,
mam na n wẽnemda m neng n bas-ba.»
Nebã set n dat n sãama a Zeremi
18Nebã yeelame: «Wa-y tɩ d sɩɩg taab noor n kɩt t'a Zeremi meneme! Bala, tõnd ka na n kong maan-kʋʋdb sẽn na n zãms tõndo, wall yam dãmb saglgo, wall Wẽnnaam no-rɛɛs koɛɛg ye. Wa-y tɩ d kãneg-a, la d ra kelg a sẽn togsd goam ninsã fãa ye!»
A Zeremi pʋʋsa Wẽnnaam
19Sẽn-Ka-Saabo, kɩll-y y tʋbr n kelg-ma!
Kelg-y bũmb nins m bɛɛbã sẽn yetã!
20Yel-sõmd yaood yaa beem la?
Bãmb tuu bok n dat tɩ m lʋɩ a pʋgẽ.
Tẽeg-y tɩ mam dag n yalsa yãmb taoore,
n yõk yãmb sɛɛg bãmb yĩnga,
tɩ y sũurã ra wa puug ne-b ye.
21Woto yĩnga, kɩt-y tɩ kom ne zabr
sʋʋg kʋ b kambã.
Kɩt-y tɩ b kambã ki,
la y kɩt tɩ b pagbã lebg pʋg-kõapa.
Kɩt-y tɩ bã-longds kʋ b raopã,
tɩ b ra-sãmbã pa tãpẽ.
22Kɩt-y tɩ b wʋm b kelems b yiyã pʋsẽ,
wakat ning b bɛɛbã sẽn na n wa ling
bãmb n wʋk b teedã.
Bãmb tuu bok n dat n bẽd maam,
bãmb dɩgla bẽdg mam naoã sẽn na n tabgẽ wã.
23Sẽn-Ka-Saabo, yãmb mii saagr nins fãa
b sẽn saagd n dat n kʋ maamã.
Ra kõ-b sugr b yel-wẽnã yĩng ye.
Ra yẽes-y bãmb yel-wẽnã ye!
Bas-y tɩ b lʋɩ y nifẽ!
Sɩbg-y bãmb y sũ-yikrã pʋgẽ!
Currently Selected:
A Zeremi 18: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
