A Zeremi 14
14
A Zeremi pʋʋsg war wakate
1Sẽn-Ka-Saab goma ne a Zeremi warã wakat n yeel-a yaa:
2Zʋʋda nebã bee sũ-sãang pʋga.
Bãmb tẽmsã sãamdame.
Bãmb nebã gãee tẽng ne sũ-sãanga.
Zeruzalɛm kelemsã zẽkd n kuiisa saasẽ.
3Nanambsã tʋma neb nins b sẽn so wã
tɩ b tɩ bao koom n wa.
Bãmb kẽnga kʋɩlsẽ wã,
la b ka yã koom ye.
Bãmb lebg n waa ne yʋ-vɩɩdo.
Yãnd tar-b lame tɩ b sulg b zutu.
4Tẽngã sẽn pusã yĩnga,
la saag me sẽn ka leb n niid tẽngã
pʋgẽ wã yĩnga,
yãnd tara koaadbã tɩ b sulg b zutu.
5Baa walg sẽn be weoogẽ wã sã n doge,
a basda a biigã n zoe,
yamd kaalem yĩnga.
6We-bõensã yasa tãn-bɛɛlã zutu,
n sesd wa we-baase, tɩ b ninã yiigi,
bãmb sẽn baood yamd n ka paamdẽ wã yĩnga.
Nebã
7Sẽn-Ka-Saabo, tõnd kongrã sã n kɩt kaset
tɩ tõnd ka tar bʋʋm, bɩ y maan y sẽn na n maanega,
y yʋʋrã yĩnga.
Tõnd kɩɩsgã yaa wʋsgo, tõnd beega yãmba.
8Sẽn-Ka-Saab sẽn yaa Israyɛll tẽebo,
la Israyɛll fãagd yel-pakr wakate,
bõe yĩng tɩ y maand wa sãan
tẽn-kãngã pʋgẽ,
la wa so-toagd sẽn tũ tẽngẽ
n na n yõg gãag-sobendo?
9Yaa bõe tɩ y maand wa ned b
sẽn yɛɛse,
la wa gãndaoog sẽn ka tõe n sõng
neb a taaba?
Sẽn-Ka-Saabo, yãmb yaool n bee tõnd sʋka,
la d boonda yãmb yʋʋrã d sʋka.
Da bas-y tõnd ye!
Wẽnnaam ka leok a Zeremi pʋʋsgã ye
10Sẽn-Ka-Saab gomda nin-kãensã wɛɛngẽ n yetẽ: «Bãmb nong n saada zĩig fãa, n ka zĩ zĩ-yend ye! Woto, bãmb ka ta maam a Sẽn-Ka-Saab yam ye. Moasã m na n tẽega b yel-wẽnã yell n sɩbg-ba.» 11Sẽn-Ka-Saab yeela maam yaa: «Da pʋʋs n kos sõngr nin-bãmbã yĩng ye. 12Ba b sã n loe noore, mam ka na n kelg b sũ-sãang kelemsã ye. Ba b sã n wa ne maand sẽn yõogd bugum ne bõn-koaadl kũuni, mam ka na n deeg ye. Mam na n kʋ b fãa gill ne zabr sʋʋga, la ne kom la bã-longdse.»
13La mam leokame: «Kayto! Zu-soabã Sẽn-Ka-Saabo, no-rɛɛsdbã yet-b lame tɩ b ka na n yãnd zabr bɩ kom ye, la yãmb na n kõo bãmb vɩ-bãan sɩd-sɩd zĩ-kãnga.»
14Sẽn-Ka-Saab yeela maam yaa: «No-rɛɛsdbã yagda zĩrẽ n yetẽ tɩ yaa ne mam yʋʋr la b gomda. Mam ka tʋm-ba, m ka kõ-b noor tɩ b gome, m ka gom ne-b me ye. B sẽn togsd yãmbã yaa zĩrẽ vẽnegre, ne bagre, la zĩrẽ pĩnd-n-bãngr gom-zaala, la belgr bõn-naandse! 15No-rɛɛsdb nins sẽn gomd ne mam yʋʋr n yetẽ tɩ zabr bɩ kom ka na n zĩnd tẽn-kãngã pʋgẽ, tɩ mam yaool n ka tʋm-bã, ad maam a Sẽn-Ka-Saab sẽn yet bãmb wɛɛngẽ: ‹Zabr sʋʋg ne kom n na n kʋ no-rɛɛsdb-kãens zãnga. 16La neb nins bãmb sẽn togsd pĩnd-n-bãngr goamã me, zabr sʋʋg ne kom na n kʋʋ bãmb n lob Zeruzalɛm soayã zutu, tɩ ned ka be n na n mum bãmb ne b pagbã la b kom-dibli wã ne b kom-pugli wã ye. Mam na n kɩtame tɩ wẽng ning bãmb sẽn maandã leb-ba.› »
A Zeremi togsda a nebã kongre
17Ad fo sẽn na n togs bãmb koɛɛg ninga:
Mam nintãm daagda wĩntoog
ne yʋng n ka sɛtẽ ye.
Bala, yãmb kɩtame tɩ to-kãseng paam
mam nin-nongdsã.
18Mam sã n yi n kẽng weoogẽ,
mam yãta neb sẽn pa tãp pʋgẽ.
Mam sã n kẽ tẽngã pʋgẽ,
yaa komã sẽn koms-b rãmbã la m yãta.
No-rɛɛsdbã ne maan-kʋʋdbã saagda tẽngã,
b ka wʋmd yellã võor ye.
19Sẽn-Ka-Saabo, yãmb basa Zʋʋda la?
Yãmb yam yii Sɩyõ?
Yaa bõe tɩ y pogl tõnd hal tɩ d
sãmpogrã ka tõe n maage?
D dag n tẽedame tɩ yɛlã na n wa
zemsame,
la bõn-sõng ka be ye.
D dag n tẽeda maagre,
la yaa pelen-yɩk bal la d zĩ ne.
20Sẽn-Ka-Saabo,
d miime tɩ d maana sẽn ka neere,
d deegame tɩ d ba-rãmbã kongame.
Tõnd fãa beega yãmba.
21Yãmb yʋʋrã yĩnga,
ra bas-y tɩ y naam geerã
sẽn pid ne ziirã paam paoogr ye.
Tẽeg-y y kaool ning y sẽn dag n maan
ne tõndã yelle, la y ra sãam-a ye.
22Bu-zẽmsã zĩrẽ wẽnnaam-dãmbã sʋka,
bʋg n tõe n kɩt tɩ saag ni?
Yaa sa-gãongã n kɩtd tɩ saagã niid bɩ?
Ka yãmb a Sẽn-Ka-Saab sɩda?
Yãmb la d teeg yã!
Bala, yãmb la bõn-kãens fãa naanda.
Currently Selected:
A Zeremi 14: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
