A Zeremi 13
13
Kur-wĩir bãnde
1Sẽn-Ka-Saab yeela maam yaa: «Kẽng n tɩ ra kur-wĩir sẽn wʋg ne gĩsi, n sẽbg f sɛɛga, la f ra los-a koomẽ ye.» 2Dẽ, mam kẽngame n tɩ ra kur-wĩirã wa Sẽn-Ka-Saab sẽn yeel maamã, n sẽbg m sɛɛga.
3Sẽn-Ka-Saab goma ne maam naoor a yiibẽ soaba, n yeele: 4«Rɩk kur-wĩirã fo sẽn dag n da n sẽbg f sɛɛgã, n kẽng Efrat kʋɩlgã noor n tɩ solg-a pĩig kugr bokẽ.» 5Mam sɩd kẽnga Efrat kʋɩlgã noor n tɩ solg kur-wĩirã, wa Sẽn-Ka-Saab sẽn yeelã. 6La rasem wʋsg loogr zugẽ, Sẽn-Ka-Saab yeela maam tɩ m kẽng Efrat kʋɩlgã noor n tɩ rɩk kur-wĩirã bãmb sẽn dag n yeel maam tɩ m tɩ solgã n wa. 7Dẽ, mam leb n kẽnga Efrat kʋɩlgẽ wã n tɩ bao zĩig ning mam sẽn dag n tɩ solg kur-wĩirã. La mam tɩ mikame t'a sãamame n ka leb n yaa sõama yɛs ye.
8Dẽ, Sẽn-Ka-Saab goma ne maam n yeele: 9Maam a Sẽn-Ka-Saab yetame yaa: «Yaa woto me la m na n sãam Zʋʋda ne Zeruzalɛm nebã b tɩtaam-kãsengã yĩnga. 10Bãmb yaa nin-wẽns sẽn ka sakd n kelg mam goamã ye. B maanda wa sẽn zems b sũ-keglmã, la b zoet n pʋgda bu-zẽms wẽn-naands n wõgemded b taoor n waoogd-ba. Woto yĩnga, bɩ b lebg wa kur-wĩ-kãngã sẽn ka leb n tar yõodã. 11Mam dag n dɩka Israyɛll ne Zʋʋda buudã n sẽbg m menga, wa ned sẽn dɩk sẽbdg n sẽbg a sɛɛga, tɩ b tõe n yɩ mam neba, n lebg mam zu-zẽkr ne m pẽgr la m ziiri, la bãmb ka kelg ye. Maam a Sẽn-Ka-Saab n yeele.»
Wẽnnaam sũ-puugri
12Yeel bãmb tɩ maam a Sẽn-Ka-Saab sẽn yaa Israyɛll Wẽnnaamã yetame: «Ko-waoosã fãa maana reezẽ rãam suiib yĩnga.» La b sã n yeele: «Tõnd n ka mi tɩ ko-waoosã fãa maana reezẽ rãam suiib yĩng bɩ?» 13Bɩ f yeel-b tɩ Sẽn-Ka-Saab yeelame yaa: «Ade, mam na n tɩgsa tẽn-kãngã nebã fãa ne rĩm-dãmbã sẽn zĩ a Davɩɩd naam geerã zugã, la maan-kʋʋdbã ne no-rɛɛsdbã, la Zeruzalɛm nebã fãa reezẽ rãam tɩ b nens yilme. 14Mam na n kɩtame tɩ ba-rãmb ne b kamb fão taaba. Maam a Sẽn-Ka-Saab n yeele. Mam ka na n bas-b ba a yembr ye, mam ka na n zoe ned ba a yembr nimbãaneg ye. Bũmb kõn tõog n gɩdg maam tɩ m ka sãam-b ye.»
Kelgr wakate
15Kelg-y-yã, yok-y y tʋba!
Da leb-y n wuk-y y mens ye!
Yaa Sẽn-Ka-Saab n gomda.
16Waoog-y Sẽn-Ka-Saab sẽn yaa yãmb Wẽnnaamã,
tɩ b ra wa kɩt tɩ lik bida wa,
tɩ y naoor wa lak tãmsã zĩ-sobdã pʋg ye.
Yãmb na n gũu vẽenem,
la b na n kɩtame tɩ vẽenem lebg lika.
B na n kɩtame t'a lebg lik bida.
17Yãmb sã n ka kelge,
mam na n yãba m yembr y tɩtaamã yĩnga.
Mam nintãm na n daagame.
Mam na n yãba nintãm,
b sẽn na n tall Sẽn-Ka-Saab nebã
n kẽng yembdã yĩnga.
Sẽn-Ka-Saab koɛɛg rĩmã zak rãmb yĩnga
18Togs rĩmã ne a ma wã yaa:
«Zĩnd-y tẽnga, bala yãmb naamã pugl lʋɩɩme,
yãmb naam maanfã sẽn yaa neerã fõk n lʋɩɩme.
19B paga Negɛɛv tẽmsã rignoy tɩ ned
ka tõe n pak-b ye.
B yõga Zʋʋda tẽngã neb fãa n tall
n kẽng yembdo.
B talla b fãa n tɩ kẽes yembdo.
Ned ba a yembr ka pa ye.»
Zeruzalɛm paama paoogre
20Zeruzalɛm nebã, zẽk-y y neng n gese.
Ges-y neb nins sẽn yi tẽng ning sẽn be
wĩndg sẽn lʋɩtẽ nug-rɩtg n watẽ wã.
Neb nins mam sẽn kõ yãmb tɩ y gʋʋl
wa piis tɩ rag n yaa y waoogrã bee yɛ?
21Fo sẽn kɩt tɩ neb nins minim foom
n lebg fo sõsd-n-taasã sã n wa yik n dat
n soog foom,
fo na n yeelame tɩ bõe?
Yaa toog bal n na n wʋm foom wa pag
sẽn kũmd dogem.
22La fo sã n wa sokd f meng tɩ
maana a wãn tɩ yel-kãngã wa lʋɩt f zugu,
bɩ f bãng tɩ yaa fo kongrã sẽn yaa
wʋsgã yĩngã
la b sẽn kool fo fuugã la b yõg-fã.
23Kuus ned tõe n teka a yĩn-gãong bɩ?
Ãbg tõe n teka a kõbg bɩ?
Woto sã n dag n tõeẽ,
rẽnd yãmb sẽn minim wẽngã maanegã,
y ka tõe n maan neere?
24Mam na n kɩtame tɩ b sãeege,
wa we-raoog sobg sẽn dɩkd moodo.
25Maam a Sẽn-Ka-Saab yetame:
«Fo pʋɩɩr la woto, pʋɩɩr ning mam
sẽn kõ foomã la woto, fo sẽn yĩm mam yelle,
n tẽ zĩrẽ wã yĩnga.
26Mam na n pilga fo fuugã n lud f nenga,
tɩ nebã yãnd fo yãndã.
27Fo yoobã tʋʋmã ne f sẽn kaasd wa
wed-raoog sẽn kelemd to-to n baood wed-yãangã,
la f sẽn maand yoob n ningd f meng yãndã,
mam yãnda bõn-kãens fãa gilli.»
Mam yãnda f bõn-naands nins mam
sẽn kisã tãmsã zutu, la wetã pʋse!
Kayto! Zeruzalɛm,
bõe yĩng tɩ f ka rat n yɩlg f meng ne f rẽgdã?
Na n yɩ a woto n ta dabʋre?
Currently Selected:
A Zeremi 13: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
