A Zeremi 12
12
1Sẽn-Ka-Saabo, yãmb yaa tɩrg wʋsg
ne m wa yet tɩ m tara yell ne yãmba.
La baoosgo, mam dat n goma ne yãmb
tɩrlem bʋ-kaoor yelle.
Yaa bõe tɩ nin-wẽns paamd tõogre,
tɩ sẽn zãmbd-b yãmbã me zĩ bãane?
2Yãmb sela bãmb wa tɩɩse,
tɩ b kɩ yẽg n bɩ n wom biisi.
Bãmb gomda yãmb yell wʋsgo,
la b sũyã yaool n zãra ne yãmba.
3La yãmb a Sẽn-Ka-Saabo,
yãmb mii maam, yãmb nee maam.
Yãmb feesa maam n yãnd tɩ m sũurã
tagsg bee ne yãmba.
Yiis-y nin-wẽnsã kɛɛng wa piis b
sẽn yõg n na n tɩ kʋ.
Welg-y bãmb toor kʋʋbã daar yĩnga.
4Warã na n zĩnda tẽngã pʋg hal tɩ ta dabʋre? Pʋtã mood na n kʋɩta a woto hal tɩ ta dabʋre? Rũmsã ne bõn-yɩgdɩ wã kiime, tẽn-kãng nebã sẽn maan wẽng n yeel tɩ Wẽnnaam ka na n yãnd b manesmã yĩnga.
5Sẽn-Ka-Saab yetame:
«Fo sã n ka tõe n tũ sẽn zoet-b ne nao n zoe,
fo na n maana wãn n tõog n wags ne wiidi?
Fo sã n be tẽng sẽn gãe bãan pʋgẽ
tɩ f yam gãe,
fo na n maana a wãn moasã Zʋrdẽ kãgrã pʋgẽ?
6Sɩd me, baa fo ba-biisã, fo buud meng zãmbda foom, n naagd f bɛɛbã n zabd ne-fo. B sã n wa gomd no-noom goam ne foom, bɩ f ra tẽ bãmb ye.»
Wẽnnaam basa b roogã ne b nebã
7Mam basa m doogã,
mam basa neb nins sẽn yaa mam soolmã.
Mam basa m nin-nongdsã m bɛɛbã nugẽ.
8Mam nebã sẽn yaa mam soolmã
yik n zabda ne maam wa gɩgemd
sẽn be kãgrẽ.
Bãmb zẽkda b koɛɛg ne maam.
Yaa woto n kɩt tɩ mam kisg-ba.
9Dẽ yĩnga, mam nebã sẽn dag n yaa
mam soolmã lebga wa luiin-gʋlem
tɩ sɩlsã laand n dat n wẽ-a bɩ?
Tigm-y we-rũmsã fãa gilli!
Tigm-y-b n tall-b n wa tigrã zĩigẽ!
10Rũm-kɩɩmb wʋsg tabda mam reezẽ
pʋʋgã n sãamdẽ.
Bãmb kɩtame tɩ pʋʋg ning mam
sẽn nongã lebg we-raoogo,
b kɩtame t'a lebg zĩ-vɩʋʋgo.
11B kɩtame tɩ tẽngã lebg zĩ-vɩʋʋgo.
Tẽngã bee sũ-sãang pʋga.
A sãamame n be mam taoore.
Tẽngã fãa sãamame,
la ned kae n yãbd-a ye.
12Sẽn sãamd-b fãa wã bee we-raoogã
soayã fãa zut n watẽ.
Bala, Sẽn-Ka-Saab sʋʋgã sãamda
tẽngã zĩisã fãa,
tɩ ned ba a yembr ka leb n tõe n
vɩɩmd bãan yɛs ye.
13Bãmb dag n bʋda bɩle,
la b na n kẽeba gõose.
B namsa b meng zaalem bala,
Yãmb koodã yãnd tar-y lame,
Sẽn-Ka-Saab sũ-puug-kãsengã yĩnga.
Sẽn-Ka-Saab goma ne Israyɛll yagsã
14Ad Sẽn-Ka-Saab sẽn yet mam yag-wẽnsã fãa sẽn sãamd tẽng ning mam sẽn pʋɩ n kõ Israyɛll buudã sẽn yaa mam nebã wɛɛngẽ. Woto yĩnga, mam na n diga bãmb n yiis-b b tẽngẽ wã, la m na n yiisa Zʋʋda nebã bãmb sʋka. 15La m sã n yiis bãmb n sɛ, m na n leb n zoee bãmb nimbãanega, n kɩt tɩ ned kam fãa leb n leb a soolmẽ, la a tẽngẽ. 16Bãmb sã n togs m nebã n maan wa bãmba, la b sã n wẽen ne maam a Sẽn-Ka-Saab sẽn vɩ wã yʋʋr wa b sẽn dag n zãms m nebã tɩ b wẽen ne Baallã, bãmb me na n paama zĩig m nebã sʋka. 17La b sã n ka sak n kelge, mam na n dig-b lame n yiisi, la m na n menes-b lame. Maam a Sẽn-Ka-Saab n yeele.
Currently Selected:
A Zeremi 12: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
