A Ezekɩyɛlle 24

B maka Zeruzalɛm ne rʋk sẽn kẽ tẽngempiisim

1B sẽn kẽ yembdã yɩ tɩ yʋʋm-wɛɛlẽ, kiuug piig soabã rasem piig daare, Sẽn-Ka-Saab goma ne maam n yeele:

2 # 2Rĩm 25.1, Zer 52.4 «Ninsaala, gʋls rũndã daarã sebr pʋg fo mengã yĩnga. Bala, yaa rũndã daarã bal la Babilond dĩmã na n wa gũbg Zeruzalɛm n zab ne-a. 3Wẽ buud ning sẽn yaa tõatã yel-bũnd n yeel-a tɩ Zu-soab a Sẽn-Ka-Saab yetame:

‹Bao rʋko, rʋgl-a,

la f ning koom a pʋga.

4Wʋk nemdã sẽn beesã n los rʋkẽ wã,

yaa nem-sõama wã fãa,

gɛy wã ne bãgdã.

Pids rʋkã ne kõb-sõamã wã.

5Yãk pe-nobdsã, n zam kõabã rʋkã tẽngre.

Rʋg-a t'a kɛ sõama tɩ kõabã

sẽn be a pʋgã fãa bɩ.› »

6Woto yĩnga, ade, maam a Zu-soab a Sẽn-Ka-Saab yetame: «Toog bee tẽng ning sẽn daagd zɩɩmã zugu, fo yaa wa rʋk sẽn kẽ tẽngempiisim, t'a tẽngempiismã ka leb n tõe n yi ye. Vaag nemdã sẽn be rʋkẽ wã, sags-b yembr-yembr n da bao n maan poeer ye. 7Bala, zɩɩm ning yẽndã sẽn daagã keta a pʋgẽ. Yẽnda raag-a-la pĩig zugu, a ka raag-a tẽng n bus-a ne tom ye. 8Mam sũ-yikrã pʋga, mam doka m sũur n daag yẽnda zɩɩm pĩig zug tɩ b ra tõog n bus-a ye.»

9Woto yĩnga, maam a Zu-soab a Sẽn-Ka-Saab yetame: «Toog bee tẽng ning sẽn daagd zɩɩmã zugu! Ade, mam me na n zama bugum daado. 10Zam daad wʋsg n yõgen bugum, n dʋg nemdã, n ning-a zõodo, hal t'a kõabã fãa kãbe. 11La f yaool n dɩk rʋg-vɩʋʋgã, n dogl bug-saalã zug t'a wɩnge, tɩ bugmã yõog zũudã tɩ rẽgdã fãa sẽn be a pʋgẽ wã yẽnege. 12Modgrã fãa yaa zaalem, bugmã ka na n tõog tɩ tẽngempiismã sẽn pid-a wã yi ye! 13Zeruzalɛm, fo rẽgdã pʋga, yãn-tʋʋm n be beenẽ. Mam dag n dat n yɩlga foom, la fo sẽn kell n ka lebg yɩlemdã, fo kõn leb n paam f rẽgdã yɩlgre, hal tɩ mam wa sik m sũ-puugrã fo zugu. 14Yaa maam a Sẽn-Ka-Saab n yeele. Bõn-kãng na n waame, maam n na n pids-a. Mam kõn tol n bas tɩ bũmb ba a yembr vaale, mam kõn maan nimbãan-zoeere, la m kõn maan m bãngẽ ye. B na n kaoo fo bʋʋd wa sẽn zems f manesmã ne f tʋʋmã. Maam a Zu-soab a Sẽn-Ka-Saab n yeele.»

A Ezekɩyɛll sũ-sãanga

15Sẽn-Ka-Saab goma ne maam n yeele: 16«Ninsaala, mam na n deega fo sẽn nong a soab n yɩɩd fãa wã wakat a ye pʋgẽ. Ra wiisi, ra yãbe, la f ra bas tɩ f nintãm dʋʋg ye. 17Sidg f sũurẽ, da maan wa ned n ki ye, vil f zu-vindga, wid f neooda, ra lud f no-kõbdã, la f ra rɩ neb a taab rɩɩb ye.»

18Mam goma ne nebã yibeoogo, la zaabre, mam pagã kiime. La a vẽkembeoog yibeoogo, mam maana wa b sẽn dag n yeel maamã. 19Nebã soka maam yaa: «Bilg tõnd fo sẽn maand woto wã võore.» 20La mam leok-b lame tɩ Sẽn-Ka-Saab n gom ne maam n yeele: 21«Yeel Israyɛll buudã tɩ Zu-soab a Sẽn-Ka-Saab yetame: ‹Mam dẽgemda m zĩig ning sẽn welg toorã, zĩig ning sẽn yaa yãmb zu-zẽkre, n yaa y pãngã, la yãmb sẽn get a soab tɩ noom yãmbã, tɩ y yam loe ne a soabã. Yãmb kom-dibli wã ne y kom-pugli nins yãmb sẽn loog n bas Zeruzalɛmã na n kii ne zabr sʋʋga. 22Dẽ, yãmb me na n maana wa maam. Yãmb ka na n lud y no-kõbdo, la y ka na n dɩ ned a to rɩɩb ye.› » 23Yãmb na n vila y zu-vindga, la y wid y neooda, la y ka na n wiisi, y ka na n yãb ye. La yãmb na n wõosa y kongrã pʋga, n sidg ne taaba. 24A Ezekɩyɛll na n lebga bãnd yãmb yĩnga. Yãmb na n maana wa yẽnda sẽn maanã kɛpɩ. Woto, bõn-kãng sã n wa maane. Yãmb na bãng tɩ mam yaa Zu-soab a Sẽn-Ka-Saabo.

25Sã n yaa ne foom a ninsaala, sɩd hakɩɩka, daar ning mam sẽn na n sãam bãmb zu-zẽkrã sẽn yaa bãmb pãngã, bãmb sẽn get a soab tɩ noom bãmbã, tɩ b yam loe ne a soabã, la m sẽn na n sãam bãmb kom-dibli wã ne b kom-pugli wã daare, 26ned ning sẽn na n põs-a wã na n waa fo nengẽ, n wa togs foom bõn-kãnga. 27Badaare, fo zelemdã na n lakame tɩ f gom ne sẽn põs-a wã, la f kõn leb n yɩ muk ye. Fo na n yɩɩ bãnd bãmb yĩnga, woto, bãmb na bãng tɩ mam yaa Sẽn-Ka-Saabo.

Currently Selected:

A Ezekɩyɛlle 24: MPBU

Highlight

Copy

Compare