A Ezekɩyɛlle 25

Pĩnd-n-bãngr goam Amo nebã yĩnga

1 # Zer 49.1-6, Eze 21.33-37, Amo 1.13-15, Sof 2.8-11 Sẽn-Ka-Saab yeela maam yaa:

2«Ninsaala, wẽnemd n tees Amo nebã sẽnẽ n togs pĩnd-n-bãngr goam b wɛɛngẽ. 3Yeel Amo nebã tɩ b kelg Zu-soab a Sẽn-Ka-Saab koɛɛga! Ade, Zu-soab a Sẽn-Ka-Saab yetame: ‹Yãmb laa ha, ha, ha›, b sẽn dẽgem m sɛk zĩigã, la b sãam m tẽngã n tall Zʋʋda nebã n kẽng yembdã yĩnga. 4Bõn-kãng yĩnga, mam na n basame tɩ buud nins sẽn be yaangã soog yãmba. Bãmb na n tilga b rot y tẽnga pʋgẽ n zĩnd be n dɩ y koodã la b yũ y tẽngã bĩisim. 5Mam na n kɩtame tɩ Raba lebg yʋgma bãgre, tɩ Amo nebã tẽng lebg rũm-bãooneg bãgre. Woto, yãmb na bãng tɩ mam yaa Sẽn-Ka-Saabo.» 6Ad Zu-soab a Sẽn-Ka-Saab sẽn yeta: «Yãmb wẽe nug-poak n yɩg n tirs ne sũ-noog n maan y toor kae ne toog ning sẽn paam Israyɛllã. 7Bõn-kãng yĩnga, bãng-y tɩ mam na n wilga yãmb m pãngã. Mam na n basame tɩ bu-zẽmsã fã yãmba. Mam na n yiisa yãmb buud a taabã sʋka, mam na n menesa yãmb tẽms pʋse, mam na n sãama yãmba. Woto, yãmb na bãng tɩ mam yaa Sẽn-Ka-Saabo.»

Pĩnd-n-bãngr goam Moaab nebã yĩnga

8 # Eza 15.1—16.14, 25.10-12, Zer 48.1-47, Amo 2.1-3, Sof 2.8-11 Zu-soab a Sẽn-Ka-Saab yetame: «Moaab nebã ne Seyɩɩr nebã yeelame tɩ Zʋʋda buudã me yaa wa buud a taabã fãa. 9Woto yĩnga, mam na n kɩtame tɩ b wa zab ne tẽms nins sẽn be Moaab toadgẽ wã. Bãmb na n zaba ne a tẽmsã, a tẽms nins sẽn yaa neeb n yɩɩdã. Yaa Bɛt-Yesimote, Baall-Mewõ ne Kiriyatayim. 10Mam na n naaga bãmb ne Amo nebã n kõ buud nins sẽn be yaangã tɩ b sooge, sẽn na n yɩlẽ tɩ b ra leb n tẽeg Amo nebã sẽn be buud a taabã sʋkã yell ye. 11Mam na n sɩbga Moaab nebã. Woto, b na bãng tɩ mam yaa Sẽn-Ka-Saabo.»

Pĩnd-n-bãngr goam Edom yĩnga

12 # Eza 34.5-17, 63.1-6, Zer 49.7-22, Eze 35.1-15, Amo 1.11,12, Abd 1.1-14, Mal 1.2-5 Zu-soab a Sẽn-Ka-Saab yetame: «Edom nebã sẽn dok b sũur ne Zʋʋda buudã yĩnga, bãmb ninga b meng taale. 13Bõn-kãng yĩnga, Zu-soab a Sẽn-Ka-Saab yetame: ‹Mam na n tẽega m nug n zab ne Edom, mam na n menesa ninsaalbã ne rũmsã, mam na n kɩtame t'a lebg raboogo, sẽn sɩng ne Teman n tɩ tãag Dedan tẽngã. Bãmb na n paa tãpẽ. 14Mam na n tũnuga Israyɛll sẽn yaa mam nebã n dok m sũur ne Edom. Israyɛll na n maana bãmb wa sẽn zems mam sũ-puugrã ne m sũ-kãbrã. Woto, bãmb na bãng mam sũ-dokrã sẽn yaa bũmb ninga. Maam a Zu-soab a Sẽn-Ka-Saab n yeele.› »

Pĩnd-n-bãngr goam Filistẽ-dãmbã yĩnga

15 # Eza 14.29-31, Zer 47.1-7, Zow 4.4-8, Amo 1.6-8, Sof 2.4-7, Zaka 9.5-7 Zu-soab a Sẽn-Ka-Saab yetame: «Filistẽ-dãmbã sẽn maan sũ-dokre, n dok b sũur ne kisgri, la ne b sũur fãa, n dat n sãamã yĩnga, la beem ning bãmb sẽn tar wakat fãa wã yĩnga, 16Zu-soab a Sẽn-Ka-Saab yetame: ‹Mam na n tẽega m nug Filistẽ-dãmbã zugu. Mam na n yiisa Kerɛt nebã, la m kɩt tɩ sẽn be-b ko-kãsengã noorã meneme. 17Mam na n doka m sũur ne bãmba, ne sũ-puug-kãsemse. Mam sã n wa rok m sũurã ne bãmb n sɛ, la b na n bãng tɩ mam yaa Sẽn-Ka-Saabo.› »

Currently Selected:

A Ezekɩyɛlle 25: MPBU

Highlight

Copy

Compare