A Ezekɩyɛlle 23

Samaari koos-m-menga

1Sẽn-Ka-Saab goma ne maam n yeele:

2«Ninsaala, pagb a yiib n dag n be n yaa ma-biisi. 3Bãmb koosa b mens Ezɩpt tẽnga, bãmb koosa b mens b pʋg-sademdã wakate. B wẽbsa bãmb bĩis Ezɩpt tẽnga, b saaga bãmb pʋg-sademdẽ yãoogã beenẽ. 4Kãsmã yʋʋr dag n boondame t'a Ohola, tɩ yao wã yʋʋr boondẽ t'a Oholiba. Bãmb b yiibã rag n yaa mam pagba, la b roga kom-dibli la kom-pugli. Sã n yaa ne bãmb yʋyã wɛɛngẽ, a Ohola yaa Samaari, t'a Oholiba yaa Zeruzalɛm.

5La baa ne a Ohola sẽn dag n yaa mam pagã, a koosa a menga. Yẽnda rag nonga Asiiri nebã sẽn yaa a rolsen-dãmba, la a yagsã. 6Asiiri nebã rag n yera fut sẽn yaa miidu la moaama, bãmb dag n yaa gʋvɛrneer-dãmb la bʋ-kaoodba. Bãmb fãa rag n yaa kom-poal sẽn tar da-sãnde, n yaa wed-rʋʋdb sẽn zao wiidi. 7Yaa ne nin-bãmbã la yẽnda koos a menga. Yẽnda koosa a meng ne Asiiri nebã zu-raadã fãa. Yẽnda rẽgma a meng ne neb nins fãa yẽnda sẽn dag n nongã, a rẽgma a meng ne b wẽn-naandsã fãa. 8Yẽnda kell n ka bas a koos-m-mengã yẽnda sẽn dag n maand Ezɩpt tẽngã ye. Bala, nin-bãmbã rag n gãanda yẽnda a pʋg-sademdã wakate, b saaga yẽnda yãoogã t'a nan ka mi rao ye. La b kẽesa yẽnda koos-m-meng pʋga. 9Yaa woto n kɩt tɩ mam bas yẽnda Asiiri nebã sẽn yaa a rolsen-dãmbã yẽnda sẽn dag n nongã nugẽ. 10Bãmb n yees a futã n bas-a a zaala. Bãmb n yõg a kom-dibli wã ne a kom-pugli wã, la b kʋ yẽnda mengã ne zabr sʋʋga. Yẽnda yɩɩ mamsg pagb a taabã yĩnga. Bãmb sɩbga yẽnda.»

Zeruzalɛm tẽngã koos-m-menga

11Yẽnda tão-poak a Oholiba yãnda bõn-kãense, la yẽnda sẽn dag n nong a rolsen-dãmbã to-to wã yɩɩga a kẽema. Yẽnda koos-m-mengã yɩɩga a kẽemã rẽndã. 12Yẽnda yam kẽe Asiiri nebã sẽn yaa a yagse, n yaa gʋvɛrneer-dãmb la bʋ-kaoodb sẽn yer fu-neeba, n yaa wed-rʋʋdb sẽn zao wiidi, tɩ b fãa yaa kom-poal sẽn tar da-sãndã. 13Mam yãndame tɩ yẽnda rẽgma a menga, tɩ b yiibã fãa yel-manesmã yaa bũmb a yembre. 14A Oholiba tol n paasa a koos-m-mengã pãnga. Yẽnda yãnda b sẽn gʋl raop naana lalg zugu, sẽn yaa Kalde raop wẽoneg b sẽn gʋl tɩ yaa miidu. 15Bãmb seesã rag n sẽba ne sẽbdse, tɩ b zutã vil ne peen-neeba. Bãmb fãa wẽonegã yaa nanambs wẽonego, n yaa wa Babilond nebã. B yaa wa neb sẽn yit Kalde. 16A Oholiba sẽn ges bãmbã bala, a yamã kẽ-b lame, t'a tʋm neb bãmb nengẽ Kalde tẽngã. 17Babilond-dãmbã waa yẽnda nengẽ n wa gãand ne-a n dẽgm-a ne b yoobã tʋʋmã. Yẽnda rẽgma a meng ne bãmb n yaool n lak a meng ne-ba. 18Yẽnda puka a koos-m-mengã, la a bas a mengã zaal tɩ b nebã yãnde. La mam laka m meng ne-a, wa m sẽn lak n bas a tão-poakã. 19Yẽnda yɩlma a koos-m-mengã n tẽeg a pʋg-sademdẽ koos-m-mengã a sẽn dag n maand Ezɩptã. 20Yẽnda yamã rag n kẽe yoaadb sẽn tar yo-bɛd wa bõense, n dʋʋt wa wiidã. 21Fo leb n sɩnga f pʋg-sademdẽ wakatẽ yãn-tʋʋmã maanego, wakat ning Ezɩpt nebã sẽn dag n saagd f yãoogã, tɩ f pʋg-sadem-bĩisã yamleoog yõk-bã.

Zeruzalɛm sɩbgre

22Woto yĩnga, Oholiba, Zu-soab a Sẽn-Ka-Saab yetame: «Gese, mam na n kɩtame tɩ f rolsen-dãmb nins fo sẽn basã zab ne foom. Mam na n kɩtame tɩ b yi zĩig zãng n wa zab ne foom. 23Yaa Babilond nebã, ne Kalde nebã fãa, la Pekood ne Soa la Koa nebã, n paas Asiiri nebã fãa sẽn naag bãmba, b kom-poal sẽn tar da-sãnde, n yaa gʋvɛrneer-dãmbã ne bʋ-kaoodb gilli, la nanambse, tɩ b fãa zao wiidi. 24Bãmb na n waa ne zab-teed sẽn yaa saar-dãmb la ne zab-teed sẽn bilimdi, la ne neb kʋʋng wʋsgo, n wa zab ne foom. Bãmb na n yii zĩig zãng n wa zab ne foom ne gãn-bɛd la gãn-bi ne kut pugli. Mam basa bʋ-kaoorã ne bãmba, la bãmb na n kaoo fo bʋʋd wa sẽn zems bãmb tõodã. 25M na n basame tɩ m nonglmã sũ-kĩir dɩ foom. Bãmb na n namsa foom ne sũ-puugri. Bãmb na n wõrga f yõorã la b wõrs f tʋbã, la fo yagensã na n paa tãpẽ. Bãmb na n yõga fo kom-pugli wã ne f kom-dibli wã, la bugum n na n dɩ fo yagensã. 26Bãmb na n fãa f futã la b wʋk f fãn-teedã. 27M na n kɩtame tɩ f yãn-tʋʋmã ne f yoobã tʋʋm f sẽn sɩng n maand hal Ezɩptã sɛ. Fo kõn leb n tõog n doog f neng n ges bãmba, fo kõn leb n tẽeg Ezɩpt yell ye.»

28Bala, Zu-soab a Sẽn-Ka-Saab yetame: «Ade, mam na n basa foom neb nins fo sẽn kisã nugẽ, neb nins fo sẽn basã. 29Bãmb na n kisga foom n nams-fo, bãmb na n deesa bũmb nins fo sẽn tʋm n paamã n bas-f zaalem fasɩ. B na n yeesa f futã n bas-f f zaala, f tʋʋm-dẽgdã ne f yãn-tʋʋmã, la f koos-m-mengã tʋʋm yĩnga. 30B na n maana foom a woto, fo sẽn koos f meng ne buud a taabã yĩnga, la f sẽn dẽgem f meng ne bãmb wẽn-naandsã yĩnga. 31Fo rɩka f tão-poakã naoore. Sɩbgr wamd ning mam sẽn kõ yẽnda wã, mam na n dɩk-a lame n kõ foom.» 32Zu-soab a Sẽn-Ka-Saab yetame:

«Fo na n yũu bõn-yũudlã sẽn be wamd

ning f tão-poakã sẽn tall n yũ wã.

Wamdã yalmame la a zulmame,

la a poorẽ, b na n laa foom la b yaal foom.

Bũmb nins sẽn be a pʋgẽ wã yaa wʋsgo.

33Fo na n yũume tɩ f neng yilim

tɩ sũ-sãang yõk-fo.

Fo tão-poak a Samaari wamdã

yaa rabeem ne sãoong wamde,

34Fo na n yũ-a lame,

f na n yũ-a-la zãnga,

fo na n pãb-a lame n wã.

Fo na n bõoda f bĩisã.

Yaa maam a Zu-soab a Sẽn-Ka-Saab n yeele.»

35Woto yĩnga, Zu-soab a Sẽn-Ka-Saab yetame: «Fo sẽn yĩm mam yellã, fo sẽn zãgs maam n tud maam f kudgã yĩnga, bɩ yãn-tʋʋmã ne f koos-m-mengã tʋʋm me leb-fo.»

36Sẽn-Ka-Saab yeela maam yaa: «Ninsaala, fo na n kao a Ohola ne a Oholiba bʋʋd bɩ? Bilg bãmb b yel-beedã sẽn yaa to-to. 37Bala, bãmb kẽesa b mens yoob pʋgẽ, la b nusã pida ne zɩɩm. Bãmb maana yoob ne b wẽn-naandsã. La sẽn paase, bãmb sẽn dag n dɩk b kom-dibli nins n kõ maamã, bãmb lebg n dɩk-b n lame n kɩt tɩ b lebg wẽn-naandsã rɩɩbo. 38Ad b sẽn leb n maan maam bũmb ninga: Badaar bala, bãmb dẽgma mam zĩig ning sẽn welg toorã, la b rẽgem m vʋʋsg rayã. 39Bãmb dɩka b kom-dibli n maan maoong n kõ b wẽn-naandsã, la badaar bala, bãmb kẽng n tɩ rẽgma mam zĩig ning sẽn welg toorã. Yaa a woto la bãmb maan mam doogã pʋga. 40La sẽn paas rẽndã, b tʋma neb tɩ b tɩ bool raop tɩ b yi zĩ-zãrsẽ n wa. La yaa bãmb yĩng la fo yik n so koom n ning f nin kɩrʋ, la f maneg n ning fan-teedo. 41Fo rag n zĩi gãag sẽn tar ziir zugu, tɩ taabl dag dɩg f taoore, la fo rag n dogla m wisdã ne m kaamã a zugu. 42La b rag n wʋmda Saabe-rãmb neb wʋsg sẽn be ne-a wã sũ-noog koeese. Raop nins sẽn yi we-raoogã kɩremsã fãa n wa wã ninga bi-puglã ne a yao wã nus zũyã, la b fõgen-b maanf sẽn yaa neere.»

43La mam yeela m meng yaa: «Baa ne sẽn maan-a yoob n kʋʋlã ket n pʋgda raopa! 44Raopã kẽnda bãmb nengẽ, b wata a Ohola la a Oholiba sẽn yaa yoaadbã nengẽ wa b sẽn kẽnd pʋg-yoaadb nengẽ. 45La nin-tɩrs n na n kao pʋg-bãmbã bʋʋd wa b sẽn kaood yoaadbã la neb sẽn daag zɩɩm bʋʋdã. Bala, bãmb yoome, la b raag zɩɩm.» 46Ad maam a Zu-soab a Sẽn-Ka-Saab sẽn yeta: «Tigim neb kʋʋng tɩ b wa zab ne-ba, n kẽes-b rabeem-kãseng la b fã-ba.» 47Bɩ kʋʋn-kãng lob-b ne kug la b kʋ-b ne zabr sʋʋse. Bɩ b kʋ b kom-dibli wã ne b kom-pugli wã, la b ning b rotã bugum. 48Woto, m na kɩt tɩ b yoobã fãa sɛ tẽngã pʋga. La pagba fãa na n dɩka yam n da leb n maan yoob ning yãmb sẽn maanã ye. 49La m na n kɩtame tɩ y yoobã sɩbgr sig y zugu, la y na n tʋka y wẽn-naandsã pʋʋsg sɩbgre. Mam yaa Zu-soab a Sẽn-Ka-Saabo, yaa maam n yeele.

Currently Selected:

A Ezekɩyɛlle 23: MPBU

Highlight

Copy

Compare