A Ezekɩyɛlle 18

Wẽnnaam n kaood ned kam fãa bʋʋdo

1Sẽn-Ka-Saab goma ne maam n yeele:

2 # Zer 31.29 «Bõe yĩng tɩ yãmb wẽed yel-bũn-kãngã Israyɛll pʋgẽ n yetẽ:

‹Ba-rãmbã n dɩ reezẽ-kãse,

tɩ kambã yẽn deeg n zãabe.›

3Maam a Sẽn-Ka-Saab sẽn vɩ wã wẽendame n yetẽ: «Yãmb kõn leb n wẽ yel-bũn-kãngã Israyɛll pʋgẽ ye. 4Ninsaalbã fãa yaa maam n so. Ba-rãmbã ne kambã fãa yaa maam n so. Yaa ned ning sẽn maan-a yel-wẽnã n na n ki.

5Ned sã n yaa nin-tɩrga, n maand wa sẽn zemse, la a maand tɩrlem, 6n ka rɩt tãms zut maand rɩɩbo, la a ka waoogd Israyɛll nebã wẽn-naandsã, la a ka maand rẽgd ne a to paga, la a ka kẽed ne pag sẽn yãnd a kiuugu, 7la a ka kɩtd tɩ ned tʋm a tʋʋmd t'a ka yao-a, la a lebsd bũmb ning b sẽn gãneg ne yẽnda n deeg bũmbu, la a ka baood n wẽg neda, la a yãkd a rɩɩb n kõt kom sẽn tar-a soaba, la a kõt sẽn ka tar-a fuug fuugu, 8la a ka pengd ned n baood yõod wall roaglenga, la a ka maand sẽn ka tɩrga, la a kaood neb a yiib sẽn tar yell ne taab bʋʋd wa sẽn zemse, 9#Mk 18.5la a kẽnd wa sẽn zems mam noyã ne m no-tũudsã, la a maand sɩda, nin-kãng yaa tɩrga, la a na n vɩɩmdame. Maam a Zu-soab a Sẽn-Ka-Saab n yeele.»

10«Nin-kãng sã n dog biig t'a yaa fãad la nin-kʋʋd n maand yel-wẽn-kãensã buud a yembr n beeg a ba-biiga, 11baa yẽnda ba wã sã n zɩ n maan yel-wẽn-kãens ba a yembre, biigã sã n dɩ tãms zut maand rɩɩbo, la a maan rẽgd ne a to paga, 12la a kɩt tɩ naong soab ne nimbãan-ned tʋm a tʋʋmd t'a ka yao-ba, la a maand wẽgbo, la a ka lebsd bũmb ning b sẽn gãneg ne yẽnda n deeg bũmbu, la a waoogd wẽn-naandse, la a tʋmd tʋʋm-beedo, 13la a pengd neb n baood yõodo, wall roaglenga, bi-kãng na vɩɩmd sɩda? Ayo! A ka na n vɩɩmd ye. A sẽn maan yel-be-kãensã wã yĩnga, b na n kʋ-a lame. Bɩ yẽnda zɩɩm zĩnd a meng zugu.

14La nin-kãng soab sã n tar biig sẽn yãnd yel-wẽn nins fãa a ba wã sẽn maanã, t'a neẽ, la a ka maan wa a ba wã, 15n ka rɩ tãms zut maand rɩɩbo, la a ka waoog Israyɛll buudã wẽn-naandse, n ka maan dẽgd ne a to paga, 16la a ka kɩtd tɩ ned tʋm a tʋʋmd t'a ka yao-a, la a ka baood tɩ b gãneg bũmb ne-a, n ka baood n wẽg neda, la a kõt kom sẽn tar-a soab rɩɩbo, ne sẽn ka tar-a fuug fuugu, 17n ka maand naong soab pãnga, la a ka pengd ned n baood yõod wall roaglenga, n kẽnd wa sẽn zems mam noyã ne m no-tũudsã, nin-kãng soab ka na n ki a ba wã kongr yĩng ye. A na n vɩɩmdame. 18Yaa yẽnda ba wã n maan a saam-biig pãnga, la a wẽg-a, n maan sẽn ka neer a meng nebã sʋka. Yaa yẽnda n na n ki a kongrã yĩnga.»

19La yãmb sokame: «Bõe yĩng tɩ ba kongr ka lʋɩt biig zugu? Yaa tɩ biigã maana sẽn zemse, la sẽn yaa tɩrga. Yaa t'a kẽna wa sẽn zems mam noyã fãa la a sak-ba. Dẽ, a na n vɩɩmdame. 20#Tõ 24.16Yaa ned ning sẽn maan-a yel-wẽnã n na n ki. Ba kongr ka lʋɩt biig zug ye, la biig kongr ka lʋɩt ba zug ye. Nin-tɩrg tɩrlem n pʋgd-a, la nin-wẽng wẽnemã n pʋgd-a.»

Yel-manesem-sõng sẽn wat ne bũmb ninga

21Nin-wẽng sã n bas yel-wẽn nins fãa a sẽn dag n maanã n sak m noyã fãa, n maan wa sẽn zemse, la sẽn yaa tɩrga, a na n vɩɩmdame, a ka na n ki ye. 22B kõn leb n tẽeg beegr nins fãa a sẽn dag n maanã yell ye. Yẽnda sẽn maan tɩrlmã yĩnga, a na n vɩɩmdame. 23Maam a Zu-soab a Sẽn-Ka-Saab sokdame: «Dẽ yĩnga, mam sɩd ratame tɩ nin-wẽng ki sɩda? Bɩ mam datame t'a bas a manesmã n paam n vɩɩmde? 24Nin-tɩrg sã n bas a tɩrlmã n maan sẽn ka tɩrga, a sã n maan tʋʋm-beed nins fãa nin-wẽng sẽn maanã, a na vɩɩmd sɩda? B kõn tol n leb n tẽeg a tɩrlem tʋʋm nins fãa yẽnda sẽn maanã ba a yembr yell ye. Yẽnda sẽn maan sẽn kisã, la a sẽn maan yel-wẽnã yĩnga, a na n kiime.

25Yãmb yetame: ‹Zu-soabã manesmã ka zems ye.› Israyɛll buudu, m kotame tɩ y kelge! Dẽ yĩnga, yaa mam manesmã n ka zemse? Ka yãmb manesmã n ka zems sɩda? 26Nin-tɩrg sã n bas a tɩrlmã n maan sẽn ka tɩrg n ki bõn-kãng yĩnga, a ki a sẽn ka maan sẽn yaa tɩrgã yĩnga. 27La nin-wẽng sã n bas wẽnemã a sẽn dag n maandã n maan sẽn zemse, la sẽn yaa tɩrga, a na n fãaga a vɩɩm. 28Yẽnda sã n bao yam n kõ a menga, n bas a beegr nins fãa a sẽn dag n maanã, a na n vɩɩmdame. A ka na n ki ye.

29Israyɛll buudã yetame: ‹Zu-soabã manesmã ka zems ye.› La rẽ yĩnga, Israyɛll buudu, yaa mam manesmã n ka zems sɩda? Ka yãmb manesmã n ka zemse? 30Israyɛll buudu, yaa rẽ n kɩt tɩ mam na n kao yãmb ned kam fãa bʋʋd wa sẽn zems a tʋʋmã. Maam a Zu-soab a Sẽn-Ka-Saab n yeele. Tek-y yam n bas kɩɩsgã fãa, tɩ kug-lakdg ra wa zĩndi, n kɩt tɩ y kong ye. 31Zãag-y mens ne kɩɩsg nins fãa y sẽn kɩɩsã. Palm-y y sũyã, la y paam yam-paalga. Israyɛll buudu, bõe yĩng tɩ y na n ki? 32Mam daab yaa tɩ yãmb ned ba a yembr da ki ye. Dẽ wã, tek-y yam n paam n vɩɩmde. Maam a Zu-soab a Sẽn-Ka-Saab n yeele.»

Currently Selected:

A Ezekɩyɛlle 18: MPBU

Highlight

Copy

Compare