A Ezekɩyɛlle 19
19
Wiisg Israyɛll dĩm-dãmbã yĩnga
1Foom, pʋd sũ-sãang yɩɩll Israyɛll nanambsã yĩnga. 2Yeel yaa:
«Yãmb ma wã rag n yaa bõe?
Yẽnda rag n yaa gɩgem-yãanga,
yẽnda rag n gãee gɩgmã sʋka.
Yaa gɩgem-poalã sʋk la yẽnda wub a kambã.
3Yẽnda wuba a biig a yembr t'a bɩ
n lebg gɩgem-polle,
n zãms zendengo, la a wãba ninsaalba.
4Buud a taabã wʋmame tɩ b gomd a yelle,
la yẽnda lʋɩ b bokã pʋgẽ tɩ b yõk-a.
Bãmb ninga a yõorã bãng n tall-a n kẽng Ezɩpti.
5La gɩgem-yãangã sẽn yã t'a gũubã
yaa zaalem,
t'a sẽn dag n tẽed bũmb ningã ka na n yɩ wã,
a leb n yãka a biig a to a kambã sʋka,
n wub t'a lebg gɩgem-polle.
6Yẽnda rag n kẽnda gɩgma wã sʋka,
n tol n lebg gɩgem-polle.
La a zãmsa zendengo, la a wãba ninsaalba.
7Yẽnda yõga pʋg-kõap n gãand ne pãnga,
la a luba b pãng zĩisã n kɩt tɩ b tẽmsã
lebg zĩ-vɩɩdo.
Yẽnda kɛlengã kɩtame tɩ tẽngã ne bũmb
nins fãa sẽn be a pʋgẽ wã sãame.
8Bu-zẽms nins sẽn dag n karg n gũbg
yẽnda wã yii zĩig zãng n wa zab ne yẽnda.
Bãmb loba yẽnda gãmbr n na n yõke,
la yẽnda lʋɩ b bokã pʋgẽ tɩ b yõk-a.
9Bu-zẽmsã gaaga yẽnda ne bãng
n ning yʋk pʋga.
B talla yẽnda n kẽng Babilond dĩmã nengẽ.
B tall-a lame n tɩ pag pãng zĩis pʋga,
tɩ b ra leb n tol n wʋm yẽnda koɛɛg Israyɛll
tãmsã zut ye.»
Wiisg reezẽ tɩɩgã yĩnga
10Fo ma wã rag n wẽnda wa reezẽ tɩɩg wa foom.
B rag n sela yẽnda koom noore,
t'a rag n womd sõama, n tar wil wʋsgo,
koomã sẽn waoogã yĩnga.
11Yẽnda rag n tara wil sẽn tar pãnga,
tɩ b tõe n tall-b n maan naam dasaba.
A woglmã rag n zʋʋga tɩɩsã fãa.
A sẽn dag n yaa wokã yĩnga,
la a wilã sẽn yaa wʋsgã kɩtame tɩ b ne-a.
12Bãmb võog-a-la ne sũ-yikr n lub tẽnga,
la yaang sob-tʋʋlg n wa n kʋɩɩs a biisã
tɩ b sʋʋge.
B kʋʋsa a wil nins sẽn tar pãngã n bas-b
tɩ b kʋɩ, la bugum dɩ-b lame.
13La moasã, b tɩ sel-a-la we-raoogẽ wã,
tẽng sẽn kʋɩ tɩ koom ka be a pʋgẽ ye.
14Bugum n yi a wilẽ wã,
n dɩ a wil-tobendã ne a biisã.
La a ka leb n tar wil sẽn tar pãnga,
tɩ b tõe n dɩk n maan naam dasab ye.
Woto yaa sũ-sãang yɩɩlle, b yɩɩnd-a-la ne sũ-sãanga.
Currently Selected:
A Ezekɩyɛlle 19: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
