A Ezekɩyɛlle 17

Pa-nand-tugr ne reezẽ tɩɩg yel-bũndi

1Sẽn-Ka-Saab goma ne maam n yeele:

2«Ninsaala, wẽ Israyɛll nebã yel-bũnd n togs-b kibare.» 3Yeel bãmb tɩ maam a Zu-soab a Sẽn-Ka-Saab yetame:

«Pa-nand-tug-kẽengã sẽn tar pɩg-bɛd kõbd

sẽn yaa wogdã,

t'a kõbgã yaa neerã, yɩkame n ta Libã,

n yãk sɛɛdr tɩɩgã wil-gelengɛɛgã.

4Yẽnda kaooga a will ning sẽn sãd

n yɩɩd a taabã,

n tall n kẽng toandbã tẽngẽ,

n tɩ sela lɛɛbdbã tẽngẽ.

5Yẽnda yãka tẽngã tɩ-tobeng a yembre,

n tɩ ning tɩɩs bõeeb zĩigẽ.

Yẽnda tɩ sel-a-la ko-kãseng noore,

a sel-a-la wa yɩlga.

6Tɩ-tobengã yiime n lebg reezẽ tɩ-kẽenga,

la a rag n yaa pãare.

A wilã rag n tãoome n tees

pa-nand-tug-kẽengã sẽnẽ,

t'a yẽgã sud n kẽ tẽngã.

Tɩ-toabengã lebga reezẽ tɩɩga,

n pus n maan wila.

7Pa-nand-tugr a to me n dag n be

n yaa bedre,

n tar pɩg-bɛd t'a kõbdã yaa wʋsgo.

Reezẽ tɩɩgã kɩ a yẽgã ne yão-beed zĩig

ning b sẽn dag n sel-a wã

n tão a yẽgã n tees pa-nand-tugrã sẽnẽ,

la a wilã wẽnemd n tees-a lame n

dat t'a kõ-a koom.

8La b rag n sel-a-la zĩ-sõngẽ koom

sẽn yaa wʋsg noore,

t'a tõe n tão wil n wom biisi,

n lebg reezẽ tɩɩg sẽn tar da-sãnde.»

9Yeel bãmb tɩ maam a Zu-soab a

Sẽn-Ka-Saab sokdame yaa:

«Dẽ yĩnga, tɩ-kãngã na n yẽegame sɩda?

Pipi pa-nand-tugrã ka na n võ a yẽgã

la a yor a biisã n bas-a t'a kʋɩ,

t'a wil-tobendã fãa wãk sɩda?

A võogr ka baood pãnga,

wall neb wʋsg ye.

10B sẽn sel-a wã, a na n yẽegame sɩda?

Sob-tʋʋlg sã n yi yaang n wa wẽ-a,

a ka na n kʋɩ sɩda?

A na n paa zĩig ning a sẽn yiẽ wã n kʋɩ.»

Yel-bũndã bilgri

11Sẽn-Ka-Saab goma ne maam n yeele:

12 # 2Rĩm 24.15-20, 2Kib 36.10-13 «Mam kotame tɩ f sok buud ning sẽn yaa tõatã n gese, b wʋmda yel-bũn-kãngã võor bɩ? Yeel-b tɩ Babilond dĩmã kẽnga Zeruzalɛm n tɩ yõk rĩmã ne a nanambsã n tall n kẽng Babilonde. 13La a yãka na-biig a yembr rĩmã pendẽ, n maan kaool ne-a n kɩt t'a wẽene. La a tall tẽngã nin-kãsemsã n looge, 14sẽn na n yɩlẽ tɩ rĩungã ra tol n yẽege, la b ra tol n zẽk b zugu, la b sak a kaoolã n tõog n vɩɩmde. 15La rĩmã tõdgame n kɩɩs-a, la a tʋm neb Ezɩpt tɩ b tɩ kos wiidi, ne tãb-biis wʋsg n wa kõ-a. Ned ning sẽn maand a woto wã na n tõogame sɩda? A na n tõog n põsame? Yẽnda ka tõe n sãam kaoolã n tõog n põs ye! 16Maam a Zu-soab a Sẽn-Ka-Saab sẽn vɩ wã wẽendame n yetẽ: «Hakɩɩka! Yaa rĩm ning sẽn kɩt tɩ yẽnda lebg rĩmã tẽngẽ, soab ning wẽeneg yẽnda sẽn sãbse, n sãam kaoolã, yaa nin-kãng nẽngẽ Babilond la a na n ki. 17B sã n wa Zeruzalɛm n wa zam tom-dʋy la b tu bogd n na n menes neb wʋsg zabrã wakate, Faarõ ne a tãb-bi-kʋʋngã la a neb wʋsgã ka na n tõog n zab n sõng-b ye. 18Yẽnda sẽn sãam kaoolã, a sãbsa wẽenegã. Yẽnda rag n dɩka sard n maan bõn-kãensã fãa. Yẽnda ka na n põs ye!» 19Woto yĩnga, maam a Zu-soab a Sẽn-Ka-Saab sẽn vɩ wã wẽendame n yetẽ: «Hakɩɩka! Yaa mam wẽenegã la Israyɛll dĩmã sẽn sãbsã, yaa mam kaoolã la a sẽn sãamã. Mam na n kɩtame tɩ bõn-kãngã taal zĩnd a zugu. 20Mam na n loba m gãmbr n tilg-a, la m bẽdgã na n yõk-a lame. Mam na n talla yẽnda n kẽng Babilonde, la beenẽ, mam na n bʋ ne yẽnda sẽn maan sẽn kis n beeg maamã yĩnga. 21Yẽnda tãb-bi-sulã neb nins fãa sẽn zoe wã na n paa tãpẽ. La tãb-biis nins sẽn na n kell-bã na n sãeega zĩig zãnga. Woto la y na n bãng tɩ yaa maam a Sẽn-Ka-Saab n gome.»

22Ad Zu-soab a Sẽn-Ka-Saab sẽn yeta: «Mam na n yãka sɛɛdr tɩ-wok wil-gelengɛɛg n sele. Mam na n yãka wil-poll yẽnda wil nins sẽn sãdã zut n tɩ sel tãn-lug-lug zug m toore. 23Mam na n tɩ sel-a-la Israyɛll tãng ning sẽn lug n yɩɩd a taabã zugu. Yẽnda na n tãoo wil n wom biisi, la yẽnda na n lebga sɛɛdr tɩɩg sẽn tar da-sãnde. Liuuli buud fãa na n zĩnda yẽnda tẽngre, a wilã maasmẽ. 24Woto, weoogã tɩɩs fãa na n bãngame tɩ yaa maam la Sẽn-Ka-Saabo, la yaa maam n sik tɩɩg ning b sẽn dag n zẽkã, la m zẽk tɩɩg ning b sẽn dag n sikã, la yaa maam n kʋɩɩs tɩ-maasrã, la m kɩt tɩ tɩ-koɛɛngã ning puudu. Yaa maam a Sẽn-Ka-Saab n gome, la m na n maan-a lame.»

Currently Selected:

A Ezekɩyɛlle 17: MPBU

Highlight

Copy

Compare