Efɛɛs‑rãmba 1
1
Pʋʋsem
1 #
Tʋʋm 18.19-21, 19.1 Maam a Poll sẽn yaa a Zeezi Kiris tẽn-tʋmd wa sẽn zems Wẽnnaam tʋlsmã n tʋmd seb-kãngã Wẽnnaam nebã ne neb nins sẽn be Efɛɛs n tũud a Zeezi Kirisã. 2Bɩ tõnd ba a Wẽnnaam ne tõnd Zu-soab a Zeezi Kiris kõ yãmb b barkã la b laafɩ wã.
Sɩɩg-sõng barka, Kiris maasem yĩnga
3Pẽgr Wẽnnaam sẽn yaa tõnd Zu-soab a Zeezi Kiris ba wã! Bãmb sẽn kõ tõnd Sɩɩg-sõng bark buud fãa sẽn yit yĩngri, Kiris maasem yĩngã. 4Wẽnnaam yãka tõnd Kiris maasem yĩng sẽn deng dũni naanego, tɩ tõnd yɩ neb sẽn yell bãmb taoor ye. Wẽnnaam nonglmã pʋga, 5bãmb da pĩnd n yãka yam tɩ tõnd na n yɩɩ bãmb kamba, a Zeezi maasem yĩnga, a wa sẽn zems bãmb daabo, la sẽn noom bãmba. 6Bõn-kãng yaa tɩ tõnd na zẽk bãmb barkã ziir b sẽn kõ tõnd bãmb Bi-riblã maasem yĩngã. 7#Kol 1.14Yaa Kiris zɩɩmã maasem yĩng la tõnd paam fãagre, fãagr ning sẽn yaa yel-wẽnã sugr kũuni, sẽn zems Wẽnnaam barkã sẽn waoog wʋsgã, 8bark ning Wẽnnaam sẽn kõ tõnd hal wʋsgo, n paas yam fãa ne bãngrã. 9Wẽnnaam kɩtame tɩ tõnd bãng bãmb datmã yel-solemde, a wa sẽn zems yam-yãkr ning b sẽn da pĩnd n yãk Kiris pʋgẽ wã. 10Wakatã sã n pidi, Wẽnnaam na n pidsa b yam-yãk-kãense. Bãmb na n tigsa bũmb nins fãa sẽn be yĩngri la sẽn be tẽng zugã tɩ b sak naab a yembre: Kirisã. 11Kiris maasem yĩnga, Wẽnnaam yãka tõnd n bĩng toore. Bãmb sẽn maand bũmb fãa wa b yamã sẽn yãke la wa b sẽn datã, bãmb pĩnd n tʋlsa tõndo, 12tɩ tõnd sẽn da pĩnd n tẽed Kirisã, tõnd na tʋm n kɩt tɩ nebã bãng bãmb ziirã. 13Kiris maasem yĩnga, yãmb me sẽn wʋm sɩd koɛɛgã, yãmb fãagrã koe-noogã, yãmb tẽe bãmba, la b ning-y la bãnd sẽn yaa Sɩɩg-sõng b sẽn dag n kãabã. 14Sɩɩg-sõng yaa kaset sẽn wilgd tɩ tõnd na n paama d pʋɩɩrã, sẽn yaa tɩ Wẽnnaam sẽn da neb ninsã na n dɩɩ naam tɩ yɩ Wẽnnaam ziiri.
Pʋʋsg yam la yam-vẽnegr yĩnga
15Yaa woto yĩnga, mam me sẽn wʋm tɩ b gomd yãmb tẽeb ne Zu-soab a Zeezi wã yelle, la nonglem ning yãmb sẽn tar Wẽnnaam nebã fãa yĩngã yelle, 16mam pʋʋsda Wẽnnaam bark yãmb yĩng n ka basdẽ ye. Mam tẽegda yãmb yell m pʋʋsg pʋgẽ. 17Mam pʋʋsdame n kot tõnd Zu-soab a Zeezi Kiris Wẽnnaamã sẽn yaa Ba sẽn tar ziirã tɩ b na kõ yãmb yam la vẽnegr sɩɩga, n kɩt tɩ y bãng bãmba. 18Mam pʋʋsdame tɩ Wẽnnaam na puk yãmb pʋ-tẽer ninã tɩ y bãng bõn-neer ning b sẽn bool yãmb tɩ ka tar paamã, la y bãng bãmb pʋɩɩr ning sẽn yaa arzegs sẽn be ziirã, Wẽnnaam nin-tũusdsã sẽn tarã. 19Mam pʋʋsdame tɩ yãmb na bãng bãmb pãn kãsengã sẽn zem to-to, la a sẽn tʋmd tõnd sẽn yaa Kiris tẽedbã pʋsẽ, wa sẽn zems bãmb naamã pãng sẽn tʋmdã. 20#Yɩɩn 110.1Wẽnnaam wilga b pãn-kãsengã Kiris pʋgẽ, n vʋʋg-b tɩ b yi kũum sʋka, n kɩt tɩ b zĩ bãmb dɩtg Arzãn pʋga. 21Wẽnnaam kɩtame tɩ Kiris yɩɩd rĩm-dãmba fãa la noyã fãa la pãensã fãa la naam fãa, la b yʋʋrã yɩɩda yʋyã fãa sẽn pʋtã, la ka dũndã zamaanã pʋg bal ye, la yaa ne zamaan ning sẽn watã me pʋgẽ. 22#Yɩɩn 8.7, Kol 1.18Wẽnnaam kɩtame tɩ Kirisã so bũmb fãa, la b kɩt tɩ bãmb yɩ b tẽedbã fãa Zu-soab ne bũmb fãa. 23Kiris tẽedbã yaa Kirisã yĩnga. Kiris yalẽ wã fãa bee b nebã pʋgẽ, la b pida bũmb fãa ned fãa pʋgẽ.
Currently Selected:
Efɛɛs‑rãmba 1: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
