Galat‑rãmba 6
6
Maan-y taab neere
1M ba-biisi, yãmb sã n ling ned t'a beegdẽ, Wẽnnaam Sɩɩgã sẽn be ne yãmbã yĩnga, bɩ y sagl a soab ne sũ-bʋgsem, t'a tõe n leb n dɩk so-tɩrgã. Gũus f menga, tɩ fo me ra wa n paam makr ye. 2Tʋk-y taab zɩɩbo. Woto, Yãmb na n maana Kiris tõogã sẽn datã. 3Ned sã n tẽed t'a yaa bũmbu, n yaool n ka fɩ, a belgda a menga. 4Bɩ ned kam fãa ges a meng tʋʋmd sẽn yaa to-to, la woto, a na maan sũ-noog ne a meng tʋʋma, la a ka tog n makd a rẽndã ne neb a taabã rẽnd n maand sũ-noog ye. 5Bala, ned fãa na n tʋka a meng zɩɩbo.
6Ned sã n paam tɩ ned a to zãmsd-a Wẽnnaam goamã, bɩ a kɩt tɩ sẽn zãmsd-a yẽnda wã me paam pʋɩɩr ne bũmb nins yẽnda sẽn tarã.
7Da belg-y y mens ye: Wẽnnaam ka sẽn na paoog ye. Ned sẽn bʋd bũmb ningã la a na n tigs bala. 8Bala, ned ning sẽn bʋt-a yĩngã yĩnga, a na n tigsa yĩngã biis sẽn yaa sãoongo. La ned ning sẽn bʋt-a Wẽnnaam Sɩɩgã yĩng na n tigsa Sɩɩgã biis sẽn ya vɩɩm sẽn kõn sa. 9Bɩ d da yɛ ne tʋʋm‑sõama maaneg ye. Bala, wakat sã n ta, tõnd na n tigsame, a sã n yaa tɩ tõnd ka bas n vʋʋs ye. 10Woto yĩnga, tõnd sẽn paam weer ning fãa, bɩ d maan nebã fãa neere, la sẽn yɩɩd fãa yaa tẽeb pʋgẽ ba-biisã.
Yaoolem sagls la bark ningri
11Ges-y gʋls-biisã bedrem sẽn zem to-to! Maam n gʋlsd yãmb m toor moasã.
12Neb nins sẽn dat tɩ ne yĩngã yell bɩ b pẽg-bã modgda yãmb tɩ y kɩt tɩ b kẽes-y bãongo, la yaa sẽn na yɩlg bal n da paam namsg Kiris da-pɩkã yĩng ye. 13Bala, bãmb mensã sẽn yaa zũnsã, b ka sakd tõogã ye. La b ratame tɩ yãmb kɩt tɩ b kẽes-y bãongo, tɩ bãmb paam waoogr yãmb yĩn-neong yĩnga. 14La ne maam, yaa vẽeneg tɩ ka a woto ye. Mam ka na n waoog m meng ne bũmb a to tɩ ka ne tõnd Zu-soab a Zeezi Kiris da-pɩkã ye. Ne maam, da-pɩkã yĩnga dũni wã yaa wa kũum, la ne dũni wã, mam me yaa wa kũum. 15Bala, bũmb ning sẽn be yõodo, ka bãongo wall moonem ye, la yaa tɩ yɩ nin-paalga. 16Bɩ bark la laafɩ zĩnd ne neb nins sẽn na n sak-b no-kãnga wã, la ne Wẽnnaam Israyɛllã.#6.16 Wẽnnaam Israyɛllã: Yaa neb nins fãa sẽn sakd Wẽnnaamã. 17Yaoolem koɛɛg yaa tɩ ned baa a yembr da sãam mam sũur ye. Bala, nod-dãand nins mam sẽn tarã yaa bãnd tɩ mam yaa a Zeezi rẽnda.
18M ba-biisi, bɩ tõnd Zu-soab a Zeezi barkã zĩnd ne yãmba. Ãmina.
Currently Selected:
Galat‑rãmba 6: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
