Efɛɛs‑rãmba 2
2
Fãagr bark yĩnga
1 #
Kol 2.13
Yãmba, yãmb dag n yaa kũum y beegrã ne y yel-wẽnã yĩnga. 2Pĩnda, yãmb dag n kẽnda yel-wẽn kãens pʋgẽ wa sẽn zems dũni-kãngã sẽn kẽnd to-to wã, n sakd yĩngr pãng naabã, sɩɩg ning sẽn tʋmd wẽn-kɩɩsdbã pʋgẽ moasã wã. 3Tõnd fãa me rag n bee bãmb sʋka, la tõnd dag n vɩɩ wa sẽn zems tõnd yĩngã datem wẽnsã. Tõnd dag n tʋmda wa tõnd yĩngã sẽn date, la sẽn zems tõnd tagsdo, la tõnd dag n yaa neb sẽn na n paam Wẽnnaam sɩbgr wa neb a taabã. 4La Wẽnnaam sẽn tar nimbãan-zoeer wʋsgã, la bãmb sẽn nong tõnd ne nonglem kãsengã yĩnga, 5baa tõnd sẽn dag n yaa kũum d beegrã yĩngã, Wẽnnaam kõo tõnd vɩɩm Kiris pʋgẽ. Yaa Wẽnnaam barkã yĩng la yãmb paam fãagre. 6Wẽnnaam naaga tõnd ne Kirisã n vʋʋge, n kɩt tɩ tõnd naag ne bãmb n zĩnd arzãn pʋga, Kiris maasem yĩnga, 7tɩ wakat sẽn wate, bɩ bãmb tõe n wilg tõnd bãmb bark kãsengã, b sẽn kõ tõnd sõmblem Kiris maasem yĩngã. 8Sɩd me, yaa Wẽnnaam barkã yĩng la yãmb paam fãagr tẽeb yĩnga. Yãmb sẽn paam fãagrã, ka ne y mens pãng ye, yaa Wẽnnaam kũuni. 9Ka ne tʋʋm ye, tɩ ned baa a yembr da wa pẽg a meng ye. 10Bala, tõnd yaa Wẽnnaam bõn-naandse. B naana tõnd Kirisã maasem yĩnga, tɩ tõnd na maan tʋʋm‑sõama nins bãmb sẽn dag n pĩnd n segl tɩ tõnd wa maanã.
Da-pɩkã yiisa yell tõnd ne Wẽnnaam sʋka
11Dẽ wã, tẽeg-y tɩ wakat sẽn looge, yãmb dag n yaa bu-zẽms yĩng wɛɛngẽ, tɩ neb nins sẽn yet tɩ b yaa zũnsi, tɩ yaool n yaa bãong ninsaal nus sẽn kẽesã rãmb n dag n boond yãmb a bu-zẽmsã tɩ moose. 12Wakat-kãng tɩ yãmb dag n zãra ne Kirisã, la yãmb da ka tar noor tɩ lagem ne Israyɛll nebã ye. Sẽn paase, yãmb dag n zãra ne lagem-n-taar ning Wẽnnaam sẽn dag n kãabã, la y dag n ka tar tẽeb pidsg gũudum ye. Y dag n vɩɩ dũni pʋgẽ n ka tar Wẽnnaam ye. 13La moasã, Kiris pʋgẽ, yãmb sẽn dag n zãr wakat sẽn loogã, Kiris zɩɩmã maasem yĩnga, yãmb pẽnegame. 14Bala, yaa Kiris n yaa tõnd laafɩ. Bãmb n kɩt tɩ sẽn yaa-a Zʋɩf la sẽn ka-a Zʋɩf lebg buud a yembre, n wã welgr lalgã sẽn yaa beemã sẽn dag n be sʋkã. 15#Kol 2.14Kiris yiisa a Moyiis tõodã ne a noyã la a minindã, n na n kɩt tɩ buud a yiibã naag taab bãmb pʋgẽ n yɩ bu-paalg a yembre, n kɩt tɩ laafɩ zĩndi, 16#Kol 1.20la b yiis yell ning sẽn dag n be buud a yiibã ne Wẽnnaam sʋkã, n kɩt tɩ b lebg yĩng a yembre, la b kɩt tɩ beemã sa, da-pɩkã maasem yĩnga. 17#Eza 57.19Kiris waa
n moona yãmb dãmb sẽn da zãrã laafɩ koe-noogã,
la b moona neb nins sẽn da pẽ wã me.
18Bala, Kiris maasem yĩnga, tõnd ned kam fãa tara noor tɩ wa d ba wã nengẽ, Sɩɩg-sõng a yembr pʋgẽ. 19Dẽ wã yĩnga, yãmb ka leb n yaa sãamba, wall nin-loogds ye. Yãmb yaa buud a ye ne Wẽnnaam nebã, n ya Wẽnnaam zakã nebã. 20B mee yãmb yẽbgr ning tẽn-tʋmdbã ne Wẽnnaam no-rɛɛsdbã sẽn yẽbgã zugu, la yaa Kiris mengã n ya roogã pãng kugri. 21Kiris maasem yĩnga, roogã gill fãa naagda taab n yikdẽ, n lebgd ro-sõng Zu-soabã pʋgẽ. 22Yãmb sẽn be Kiris pʋgẽ wã, yãmb me naaga meebã pʋgẽ n lebg Wẽnnaam Sɩɩgã roogo.
Currently Selected:
Efɛɛs‑rãmba 2: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
