Tõodo 33
33
A Moyiis ninga Israyɛll buudã barka
1Ad bark ning Wẽnnaam dao a Moyiis sẽn ning Israyɛll nebã, sẽn deng a kũumã. 2A Moyiis yeelame:
Sẽn-Ka-Saab yii Sinayi n wa.
Bãmb waa Seyɩɩr wa sõ-pukri,
n yãg Paarã tãngã zugu.
Bãmb waa b nebã sʋk ne malɛgs tus-kẽemã.
Bãmb tʋm-b-la b tõogã bugum ne b
nug-rɩtgo.
3N-yẽe, bãmb nonga nebã.
Bãmb pʋ-peelem dãmbã fãa bee bãmb nugẽ.
Bãmb yalsa yãmb sɛɛgẽ,
bãmb yaa yãmb koe-taasda.
4A Moyiis kõo tõnd tõodã,
tɩ yaa a Zakoob yagensã pʋɩɩre.
5Sẽn-Ka-Saab rag n yaa Israyɛll dĩm
wakat ning buudã nanambsã
sẽn tigimd ne Israyɛll nebã fãa.
6Wẽnd na kaoos a Rubɛn buudã,
t'a vɩɩmd n da ki ye.
Bɩ a nebã sõor kell n yɩ bilfu!
7Ad bũmb ning yẽnda sẽn yeel
a Zʋʋda buudã neb wɛɛngẽ:
«Sẽn-Ka-Saabo, kelg-y Zʋʋda buudã,
n lebg n tall-a n wa a nebẽ wã.
Tɩ b nusã zab n sõng-ba,
wa-y n sõng-y-ba,
la y fãag-b b bɛɛbã nugẽ.»
8 #
Yik 28.30,
Yik 17.7,
Yik 17.7, Sõd 20.13 Yẽnda goma a Leevi buudã wɛɛngẽ n yeele:
«Bãmb kõo yãmb Tumimã ne Urimã
ned ning sẽn maanã sɩd ne yãmbã.
Yaa yẽnda la yãmb mak Masa,
n bao zabr ne a Meriba koomã zĩigẽ.
9A Leevi goma a ba wã ne a ma wã
wɛɛngẽ n yeele:
«Mam ka get bãmb ye!»
Yẽnda ka leb n mi a ba-biiga,
a ka leb n mi a kamb ye.
Bala, bãmb sakda yãmb goamã
n zãad yãmb kaoolã.
10Bãmb zãmsda a Zakoob yagensã yãmb minindu,
la b zãmsd Israyɛll nebã yãmb tõodo.
Bãmb yõogda tɩdar t'a yũug kẽ yãmba,
la b yõogd maand y tẽn-kugrã zugu.
11Sẽn-Ka-Saabo, ning-y bãmb pãngã barka.
Reeg-y bãmb nus tʋʋmã.
Kao-y bãmb zabd-n-taasã,
ne neb nins sẽn kis bãmbã sees
tɩ b ra leb n yik ye.»
12Yẽnda goma a Benzame buudã
wɛɛngẽ n yeel yaa:
Bãmb yaa Sẽn-Ka-Saab nin-nongds
sẽn paad bãmb nengẽ ne bãane.
Sẽn-Ka-Saab gũuda bãmb daar fãa.
Bãmb zaoo Sẽn-Ka-Saab bãgdẽ n vʋʋsdẽ.
13Yẽnda goma a Zozɛf buudã wɛɛngẽ
n yeel yaa:
«Sẽn-Ka-Saab ninga bãmb tẽngã
barka,
t'a paam kũun sẽn yit yĩngri,
t'a paam meenem sẽn yaa sõama,
ne ko-bundum sẽn yit zĩ-zulums pʋsẽ,
14la a paam wĩndgã sẽn bɩɩsd koodã,
ne bũmb nins fãa sẽn bund n yit kiuug fãa wã,
15la a paam bi-sõama nins
kʋdem-wẽndẽ tãmsã sẽn kõtã,
kʋdem-wẽndẽ kunkubã sẽn kõt
bi-sõamã ninsã,
16la a paam bũmb nins sẽn yit
tẽn-gãongã zug n womd bi-sõama wã.
Bɩ sẽn zĩnd-a tuugã pʋgẽ wã bark
zĩnd a Zozɛf b sẽn welg toor a ba-biisã
sʋkã zugu.
17Yẽnda yaa wa nag-sadg bi-rẽeng
sẽn yaa lull n tar ziiri,
t'a yɩɩlã yaa wa we-naaf yɩɩla.
Yaa ne yɩɩn-bãmb la a tar n tãad buud
a taabã fãa sẽn be zĩigã fãa tẽng zugã.
A Efrayiim nebã tus-kẽemã yaa woto.
La a Manaase nebã tus-kẽemã wã
me yaa woto.»
18Yẽnda goma Zabulõ buudã wɛɛngẽ
n yeel yaa:
«Zabulõ nebã, maan-y sũ-noog y yiib wakate!
Izakaar nebã, maan-y sũ-noog y fu-rotã pʋse!
19Bãmb na n boola buud a taabã
tɩ b wa tãngã zugu.
Yaa beenẽ la b na n maan tɩrlem maando.
Bala, bãmb na n dɩɩ bõn-sõama nins
sẽn be ko-kãsemsã pʋgẽ wã yõodo,
la b na n sooga laog ning sẽn solg bĩisrẽ wã.»
20Yẽnda goma a Gaad buudã wɛɛngẽ
n yeel yaa:
«Bɩ sẽn sõng-a a Gaad buudã paam pẽgre.
A Gaad wũunduda wa gɩgem-yãanga,
n zendemd kangã ne zugã.
21Yaa bãmb n yãk tẽngã zĩig
sẽn welg toor n kõ b mense,
bala, b yãka zĩig beenẽ tãb-biis naab yĩnga.
Yẽnda n lʋɩ Israyɛll nebã taoore,
yẽnda maana sẽn zems Sẽn-Ka-Saab tɩrlmã,
a maana wa sẽn zemse, Israyɛll nebã yĩnga.»
22Yẽnda goma a Dan buudã wɛɛngẽ
n yeel yaa:
«A Dan yaa wa gɩgem-poll sẽn fõt
n yit Basan tẽngã n watẽ.»
23Yẽnda goma a Neftali buudã
wɛɛngẽ n yeel yaa:
«Sẽn-Ka-Saab tɩgsa a Neftali ne kũuni,
b ning-a-la bark hal tɩ seke.
Yẽnda reega nin-taoor la nug-goabg
soolmã n sooge.»
24Yẽnda goma a Azɛɛr buudã wɛɛngẽ
n yeel yaa:
«Bɩ a Azɛɛr paam bark n yɩɩd a Israyɛll
kamb a taabã fãa.
Bɩ a ba-biisã sũy yɩ noog ne-a,
la bɩ a sagla a nao kaamẽ.
25Bɩ fo kʋɩlemsã yɩ kut la zũudu.
La bɩ fo pãng sek foom f yõor tɛka.
26Israyɛll nebã, ned ka be n yɩɩd
Wẽnnaam sẽn zao saasẽ n pɩʋʋgd yĩngr
ne naamã, n wat n na n sõng yãmbã ye.
27Hal kʋdem-wẽndẽ, Wẽnnaam yaa
yãmb zĩ-soalgdga,
bãmb n dig y bɛɛbã n yetẽ: ‹Sãam-y-a.›
28Israyɛll nebã zĩi b zĩigẽ ne bãane.
A Zakoob ko-bundgã bee toore,
tẽng sẽn tar kood ne reezẽ rãam pʋgẽ.
N-yẽe! Meenem yita yĩngri,
n sigd yẽnda zugu.
29Israyɛll nebã, yãmb tara sũ-noogo.
Ãnda n yaa wa yãmba?
Buud Sẽn-Ka-Saab sẽn fãage,
bãmb yaa yãmb sõngr gãongo.
Bãmb yaa yãmb naam zabr sʋʋg sẽn tõogde.
Yãmb bɛɛbã na n wõgemda yãmb
taoore,
la yãmb na n taba b maoong kʋʋb zĩisã.»
Currently Selected:
Tõodo 33: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
