Tõodo 32
32
A Moyiis yɩɩlle
1Yĩngri, yok f tʋb tɩ m na n gomame!
Tẽnga, kelg goam nins sẽn yit m noorẽ wã!
2Bɩ mam bãngrã sig wa saag sẽn niida!
Bɩ m goamã rʋʋg wa meenem,
wa sa-luk sẽn madgd moogo,
wa koom sẽn tosd moog zugu!
3Bala, mam na n moona Sẽn-Ka-Saab yʋʋre!
Bãng-y tɩ tõnd Wẽnnaamã yaa kãsenga!
4Bãmb yaa Pĩiga!
Bãmb tʋʋmã zemsa zãnga!
Bãmb soayã fãa yaa tɩrse!
Bãmb tʋʋmã zemsa zãnga!
Bãmb yaa sɩd soab wakatã fãa!
Zãmb ka be bãmb pʋgẽ ye.
Bãmb yaa sɩda, la tɩrga.
5Israyɛll kambã sã n maand
wẽnga, ka Wẽnnaam yell ye.
Yaa Israyɛll kambã la b tog n paooge.
Bãmb zamaanã yaa zamaan-yoog
sẽn pid ne yel-kɛga.
6Yaa woto la yãmb lebsd Sẽn-Ka-Saabo?
Buud sẽn yaa yalemb n ka tar yam,
ka bãmb n yaa y ba n naan yãmb la?
Ka bãmb n naan yãmb la b
zĩndg yãmb tẽng zug la?
7Tẽeg-y kʋdemd wẽndẽ wã yelle.
Tẽeg-y zamaan nins sẽn loogã yelle.
Sok f ba t'a wilg-fu.
Sok f kãsem-dãmbã tɩ b togs-fo.
8 #
Tʋʋm 17.26
Wakat ning Sẽn-Ka-To sẽn kõ
bu-zẽmsã zĩisã, n welg ninsaalbã,
bãmb ninga soolmã tods wa
sẽn zems Israyɛll nebã sõore.
9Bala, Sẽn-Ka-Saab nebã yaa bãmb pʋɩɩre.
Bãmb dɩka a Zakoob yagensã n kõ b menga.
10Sẽn-Ka-Saab tɩ yãnda bãmb we-raoog pʋgẽ,
yaa we-raoog sẽn yaa koɛɛng
n pid ne we-rũms yãbre.
Sẽn-Ka-Saab gũbga bãmba.
Bãmb gesa b yelle.
Bãmb gũu bãmb wa b nin-beelle.
11Sẽn-Ka-Saab maana bãmb wa
sɩl-kẽeng sẽn nekd a kamb a tʋkẽ,
n zãmsd bãmb yɩgbo,
n yaool n tẽegd a pɩgs n kokd
bãmb tɩ b zao a pɩgsã zutu.
12Yaa Sẽn-Ka-Saab b yembr bal n tɛ bãmba,
Wẽn-sãang a to ka zĩnd ne bãmb ye.
13Sẽn-Ka-Saab zĩniga bãmb tẽngã tãms zutu,
tɩ b rɩt b pʋtã kood biisi.
B rag n kõta bãmb kugr zug sɩɩd tɩ b rɩtẽ,
la b kõt-b kaam sẽn yit pĩig zugu,
14la b kõt bãmb niig bĩis-gõeem
ne piis la bʋʋs bĩis-naare,
ne pe-bi kaam la Basan pe-raad
ne a boees nemdo, la zom bãanega!
Yãmb dag n yũuda reezẽ biis ko-miuugu,
yaa reezẽ rã-toaaga.
15Israyɛll nobame n lebg tõata.
Bãmb nobame n lebg bɛda.
La bãmb basa Wẽnnaam sẽn yaa b naandã,
n paoog pĩig ning sẽn fãagd bãmbã.
16Bãmb kɩtame tɩ sũ-kiir yõk Sẽn-Ka-Saabo.
Bãmb sẽn tũud wẽn-sãamsã yĩnga.
Bãmb kɩɩsda Sẽn-Ka-Saab ne yel-beed
nins b sẽn maandã.
17 #
1Kor 10.20
Bãmb maana maand n kõ
zĩn-dãmb sẽn ka Wẽnnaam ye,
la wẽnnaam-dãmb bãmb sẽn ka
mi sẽn yaool n wa,
yãmb yaab-rãmb sẽn dag n ka waoogda.
18Yãmb basa pĩig ning sẽn dog-a yãmbã,
n yĩm Wẽnnaam ning sẽn wa-a
ne yãmb dũniyã pʋgẽ wã yelle.
19Sẽn-Ka-Saab yãnda yõwã,
la b sũur yika ne bãmb kom-dibli wã,
la b kom-pugli wã sẽn kɩɩsd bãmbã yĩnga.
20Bãmb yeelame: Mam na n solga
m meng ne bãmb n gese,
b na n maana wãna.
Bala, bãmb yaa nin-tõtse.
Bãmb yaa zamaan neb yam sẽn yuusda.
21 #
1Kor 10.22,
Rom 10.19
Bãmb tũu sẽn ka Wẽnnaam,
n kɩt tɩ sũ-kiir yõk maam.
Bãmb yika mam sũur ne b bõn-naandse.
Woto, mam na n kɩtame tɩ buud sẽn ka
buud meng-meng sũ-kiir yõk bãmba.
Mam na n kɩtame tɩ buud sẽn yaa yalem
yik bãmb sũyã.
22Bala, mam sũ-puugrã bugum widgame.
A na n dɩɩme hal n ta kɩɩm-kulgu.
A na n dɩɩ tẽngã ne a koodã fãa.
A na n dɩɩ n tãaga tãmsã yẽbgrẽ.
23Mam na n sama tood bãmb zutu.
Mam na n dɩka m pɛɛmã fãa n tão bãmba.
24Komã sã n wa yõk bãmb tɩ b faage,
tɩ b yĩnsã wɩng tɩ bã-longdsã rɩt bãmb wa bugum,
mam na n tʋma rũm-toos ne wag-toos
tɩ b wãb bãmba.
25Yɩnga, zabr sʋʋs n na n kʋ bãmb kambã,
la rotã pʋsẽ, na n yɩɩ rabeem.
B na n kʋʋ kom-bɩɩsã ne b pʋg-sadbã,
la nusẽ kambã ne nin-kẽembã.
26Mam dag n yeelame,
tɩ m na n sãam-b-la zãnga,
n kɩt tɩ b yʋʋr menem dũniyã,
27la mam zoee b bɛɛbã na n wa
paoog maam n tudg n yeel tɩ yaa bãmb
n tõoge,
la ka Sẽn-Ka-Saab n maan yõwã fãa ye.
28Bala, bãmb yaa buud sẽn ka tar saagr ye.
Bãmb ka mi baa fɩ ye.
29Bãmb sã n dag n tarẽ yam,
b rag n na n tagsẽ lame n bãng
bõn-kãng võore,
n tõog n gũus ne b beoog vɩɩmã yelle.
30Nin-yend na n yɩɩ wãn n dig neb tusri,
la neb a yiib na n yɩɩ wãn n dig
neb tus piiga,
tɩ sã n ka kugr ning bãmb sẽn teegã
n koos bãmba?
Yaa Sẽn-Ka-Saab n bas bãmba.
31Bala, bãmb fãagr kugrã ka
wẽnd tõnd fãagr pĩigã ye.
Tõnd bɛɛbã mens mii bõn-kãnga.
32Bala, bãmb reezẽ tɩɩsã yẽgr yita
Sodom ne Gomoor soolmã reezẽ tɩɩsã yẽgrẽ.
Bãmb reezẽ biisã tara zẽnem.
B reezẽ-gĩnã yaa toog liga.
33Bãmb reezẽ rãamã yaa wa
wag-bees zẽnem.
Yaa wa wag-toos zẽnem.
34Bõn-kãens solga mam nengẽ.
B bee mam laogã bĩngr zĩigẽ.
35 #
Rom 12.19, Ebr 10.30 Bãmb sã n saad n yuusdẽ,
sũ-dokr bee ne maam,
tɩ m na n dol ned kam fãa!
Bala, bãmb sãoong daar kolgame.
Bũmb ning sẽn segl bãmb yĩngã
wata tao-tao.
36 #
Yɩɩn 135.14
N-yẽe! Sẽn-Ka-Saab n na n kao
b nebã bʋʋdo.
Bãmb sã n yãnd tɩ b nebã pãng sɛɛme,
tɩ yembs ne burkĩmb ka leb n beẽ,
bãmb na n zoee b tʋmtʋmdbã nimbãanega.
37Dẽ, bãmb na n sokame yaa:
Bãmb wẽnnaam-dãmbã bee yɛ?
Bãmb sẽn da teeg a soabã bee yɛ?
38Wẽnnaam-dãmb nins sẽn dag n dɩt
yãmb maand nemd kaamã la b
yũud y reezẽ rãamã bee yɛɛnẽ?
B yik moasã n sõng-yã.
B yik n kogl-yã!
39Moasã, bãng-y tɩ yaa maam,
Wẽnnaam a to ka be tɩ ka maam ye.
Yaa maam n kõt vɩɩm,
yaa maam n kʋʋde.
Yaa maam n pogende,
la maam n maagde.
Ned ka tõe n deeg bũmb mam nugẽ ye.
40Bala, mam zẽkda m nug yĩngri,
n yetẽ tɩ m vɩɩ wakat sẽn ka sɛta.
41Mam sã n saas m sʋʋgã n dat n maan sɩda,
mam sã n yãk m bʋʋdã daare,
mam na n doka m sũur ne m bɛɛbã,
la m sɩbg neb nins sẽn kis-b maamã.
42Mam na n kɩtame tɩ pɛɛmã monem ne zɩɩm,
la m tɩgs m zabr sʋʋgã ne b sẽn yõg-b
rãmb n kʋ wã nemdo, la b zɩɩm,
la ne zɩɩm sẽn yit bɛɛbã nanambs zutu.
43 #
Rom 15.10, Vẽn 19.2 Bu-zẽmse, pẽg-y bãmb nebã.
Bala, Sẽn-Ka-Saab rokda b
sũur b tʋmtʋmdbã zɩɩm daagr yĩnga.
Bãmb dokda b sũur ne b bɛɛbã.
La bãmb na n yɩlga b tẽngã ne b nebã.
44A Moyiis ne a Nun biig a Zozoe kẽngame n togs yɩɩn-kãngã goamã fãa Israyɛll nebã taoore. 45La a Moyiis sẽn togs Israyɛll nebã fãa gom-kãensã n sɛ, yẽnda yeela bãmb yaa: 46«Tags-y goam nins fãa mam sẽn togs yãmb dũndã wã yell neere, la y rɩk bãmb n wilg y kamba, tɩ b gũus b mens n sak tõ-kãensã fãa goamã. 47Bala, b yaa bõn-kãseng ne yãmba. B yaa yãmb vɩɩm. Yaa ne bãmb la yãmb na n vɩɩmd n kaoos tẽng ning yãmb sẽn na n dʋʋg Zʋrdẽ kʋɩlgã n tɩ soogã pʋgẽ.»
B togsa a Moyiis t'a na n kiime
48 #
Sõd 27.12-14, Tõ 3.23-27 Baraar bala, Sẽn-Ka-Saab yeela a Moyiis yaa: 49«Rʋ Nebo tãng ning sẽn be Abarim tãmsã sʋkã, Moaab tẽngã pʋgẽ n teesd Zeeriko wã n ges Kana tẽngã mam sẽn kõ Israyɛll nebã tɩ b soogã. 50Fo na n kii tãng ning fo sẽn na n dʋ wã zugu, n tɩ lagem f nebã sẽn ki wã, wa f kẽem a Aarõ sẽn da ki Hoor tãngã zug n tɩ lagem a nebã sẽn ki wã. 51Bala, fo beega maam Israyɛll nebã sʋk Kadɛɛs Meriba koomã zĩigẽ, Sĩn we-raoogã pʋgẽ, n ka wilg mam pʋ-peelmã Israyɛll nebã sʋk ye. 52Fo na n yãnda tẽngã sẽn be yɩɩga, tẽng ning mam sẽn kõ Israyɛll nebã, la fo ka na n kẽ beenẽ ye.»
Currently Selected:
Tõodo 32: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
