Tõodo 3

Basan naab a Oog lʋɩɩse

1Dẽ, tõnd dɩka sor n tees Basan. La Basan rĩm a Oog ne a nebã fãa yiime n na n seg tõnd Edreyi n zab ne tõndo. 2La Sẽn-Ka-Saab yeela maam yaa: «Ra zoe-a ye. Bala, mam dɩka yẽnda ne a nebã fãa la a tẽngã n ning yãmb nugẽ. La fo na n maana yẽnda wa fo sẽn maan Amoor-dãmbã rĩm a Sihon sẽn be Hɛsbõ wã.» 3Sẽn-Ka-Saab sẽn yaa tõnd Wẽnnaamã rɩka Basan naab a Oog me ne a nebã fãa n ning tõnd nugẽ. Dẽ, tõnd kʋʋ bãmb zãng n ka tol n bas ned baa a yembr t'a põs ye. 4Tõnd deega yẽnda tẽmsã fãa wakat-kãnga. Bãmb tẽng baa a yembr ka be tõnd sẽn ka reeg ye. Yaa Basan rĩm a Oog soolmã tẽms pis-yoob sẽn be Argoob tẽngã pʋgẽ. 5Tẽn-bãmb fãa rag n tara pãnga la b tara lal-bɛd ne kʋɩlems sẽn pagde. La tẽn-bãooneg wʋsg me n dag n be n ka tar lals ye. 6Tõnd maana bãmb wa tõnd sẽn dag n maan Ɛsbon rĩm a Sihon n kʋ a tẽmsã raopã ne pagbã, la kambã fãa wã. 7La tõnd wʋka rũmsã ne laog nins sẽn dag n be-a tẽmsã pʋsẽ wã fãa.

Galaad soolmã pʋɩɩbo

8Yaa woto la tõnd deeg Amoor-dãmbã rĩm-dãmb a yiibã tẽms sẽn dag n be Zʋrdẽ kʋɩlgã rʋʋnd wakat-kãnga, sẽn sɩng ne Arno longã hal tɩ ta Hɛrmo tãngã. 9Yaa Hɛrmo tãngã la Sidõ nebã sẽn boond tɩ Siriyõ wã, tɩ Hamoor-dãmbã boondẽ tɩ Seniirã. 10Tõnd deesa tẽms nins fãa sẽn be tẽn-nabdrẽ wã ne Galaad fãa la Basan fãa hal tɩ ta Salka la Edreyi sẽn yaa tẽms sẽn be Basan rĩm a Oog soolmẽ wã. 11Refayim nebã sʋka, yaa Basan rĩm a Oog a yembr bal n kelle. Yẽnda gãagã rag n yaa kutu, n be Amo nebã tẽng ning sẽn boond tɩ Raba wã. A woglmã yaa kãntɩɩg a wɛ, la a yalmã yaa kãntɩɩg a naase, wa sẽn tat nin-bedr kãntɩɩga.

12Wakat-kãnga, tõnd deega tẽn-kãng n sooge. Mam kõo a Rubɛn yagensã ne a Gaad yagensã tẽng ning sẽn sɩng Arowɛɛr n tũud Arno ko-soogã noorã, ne Galaad soolem ning sẽn be tãms sʋkã pʋɩ-sʋka, ne a tẽmsã. 13La mam dɩka Galaad tẽngã sẽn ketã n kõ Manaase buudã pʋɩ-sʋkã, la Basan, ne Argoob tẽmsã fãa sẽn yaa a Oog soolem b sẽn boond tɩ Refayim nebã tẽngã. 14A Manaase yageng a Zayɩɩr deega Argoob tẽngã fãa hal tɩ ta Gesuur nebã, ne Maaka nebã tẽngã toadgã, la a rɩka a meng yʋʋr n pʋd Basan tẽn-bãoonegã tɩ b boond bãmb t'a Yayɩɩr tẽms hal tɩ ta rũndã. 15Mam dɩka Galaad soolmã n kõ a Makɩɩre. 16Mam kõ a Rubɛn yagensã ne a Gaad yagensã Galaad tẽngã pʋɩ-sʋka, hal n tãag Arno ko-soogã, la hal tɩ ta Yabok ko-soogã sẽn yaa Amo nebã toadgã. 17La tẽn-nabd-koɛɛngã sẽn dɩk Zʋrdẽ kʋɩlgã foollã sẽn sɩng ne Kenerɛt hal tɩ ta yamsem ko-kãsengã sẽn be Pisga tãngã sɛɛga sẽn be yaangã. 18#Zoz 1.12-15Wakat-kãnga, mam yeela yãmb tɩ Sẽn-Ka-Saab sẽn yaa yãmb Wẽnnaamã kõo yãmb tẽngã tɩ y sooge. Mam yeela yãmb tãb-biisã fãa tɩ b sũ tãp n lʋɩ b saam-biisã sẽn yaa Israyɛll nebã taoore. 19Yaa yãmb pagbã ne y kambã ne y rũmsã sẽn yaa wʋsgã bal n na n pa tẽms nins mam sẽn kõ yãmbã pʋsẽ, 20hal tɩ Sẽn-Ka-Saab wa kõ yãmb saam-biisã zĩig wa b sẽn kõ yãmbã, tɩ b soog tẽng ning Sẽn-Ka-Saab sẽn yaa yãmb Wẽnnaamã sẽn na n kõ bãmb Zʋrdẽ kʋɩlgã rʋʋndã. Dẽ poore, yãmb ned kam fãa tõe n lebg n waa zĩig ning mam sẽn kõ yãmbã.

21Wakat-kãnga, mam kõ a Zozoe noor n yeel-a: «Fo yãnda bũmb nins fãa Sẽn-Ka-Saab sẽn yaa yãmb Wẽnnaamã sẽn dag n maan nanambs a yiibã. Bãng tɩ yaa woto la bãmb na n maan soolem nins fãa fo sẽn na n pɩʋʋgã. 22Bɩ y ra zoe bãmb ye: bala, yaa Sẽn-Ka-Saab sẽn yaa yãmb Wẽnnaamã n na n zab n kõ yãmba.»

A Moyiis ka na n kẽ Kana ye

23 # Sõd 27.12-14, Tõ 32.48-52 Wakat-kãnga, mam bõosa Sẽn-Ka-Saab n yeele: 24Sẽn-Ka-Saab sẽn yaa mam Wẽnnaam, yãmb sɩngame n na n wilg mam sẽn yaa yãmb tʋmtʋmdã y ziirã la y pãnga. Wẽnnaam a to ka be tẽng zugu, wall yĩngri, n tõe n maan tʋʋm-kãsems nins yãmb sẽn maanã ye. 25Mam kotame tɩ y bas maam tɩ m kẽng n tɩ ges tẽn-noog ning sẽn be Zʋrdẽ kʋɩlgã rʋʋndã, tẽn-neerã sẽn be tãms sʋkã, la ne Libã tẽngã. 26La Sẽn-Ka-Saab sũur dag n yika ne maam yãmb yĩnga, tɩ b ka sak n kelg maam ye. Bãmb yeela maam yaa: Sekame, ra leb n gom yell-kãng yell ne maam yɛs ye. 27La bɩ f rʋ Pisga tãngã n zẽk f neng n ges tẽngã nin-taoor ne a goabga, la a rɩtgo, ne a yaanga. Bala, fo ka na n dʋʋg Zʋrdẽ kʋɩlgã ye. 28Wilg a Zozoe bũmb nins yẽnda sẽn tog n maanã, la f kɩt t'a paam pãng la raoodo. Bala, yaa yẽnda n na n tall nebã n dʋʋg Zʋrdẽ kʋɩlgã n kɩt tɩ b tɩ soog tẽng ning fo sẽn na n yãndã. 29Dẽ, tõnd paa longẽ wã, zĩig ning sẽn tot Bɛt-Pewoorã.

Currently Selected:

Tõodo 3: MPBU

Highlight

Copy

Compare