Koloos‑rãmba 2
2
1Sɩd me, mam datame tɩ yãmb bãng zab-kãseng ning mam sẽn zabd yãmb yĩngã, la neb nins sẽn be Laodiise, la neb nins fãa sẽn nan ka yã mam nengã yĩnga. 2Mam maoodame tɩ b sũyã tõe n paam belsgo, tɩ b tõe n lagem taab nonglem pʋgẽ n paam yam n bãng sɩd-sɩda, n bãng Wẽnnaam yel-sõmdã sẽn yaa Kirisã. 3Yam vẽnegr ne bãngrã arzegsã fãa solga Kiris pʋgẽ.
4Mam togsda bõn-kãng tɩ ned da wa n belg yãmb ne sɩlem n tõog ye. 5Bala, baa mam yĩngã sã n zãr ne yãmba, mam yam bee ne yãmba, mam sũur yaa noog mam sẽn ne yel-manesem sõngã sẽn be yãmb sʋkã, la yãmb tẽebã sẽn ya kãenkãe Kiris pʋgẽ wã yĩnga. 6Woto yĩnga, yãmb sẽn deeg Zu-soab a Zeezi Kirisã, kẽn-y ne bãmba. 7Kɩ-y yẽga, n yals kãenkãe Kiris pʋga, n tall tẽeb kãenkãe wa sẽn zems zãmsg nins b sẽn dag n zãms yãmbã, la y pʋʋs bark wʋsgo.
Kiris vɩɩm sekda tõndo
8Gũus-y tɩ ned da belg yãmb ne zãmsg buudu, la ninsaalb minind n zãag ye, bõn-kãens yaa dũniyã yɛla, la a ka Kiris rẽnd ye. 9Bala, Wẽnnaam sẽn yaa bũmb ningã fãa, Kiris me yaa a woto b yĩngã pʋgẽ. 10La yãmb tara bũmb fãa bãmb pʋg tɩ seke, bãmb sẽn yaa nanambs fãa Naaba la noyã fãa Zu-soabã. 11Bãmb pʋgẽ me, b kẽesa yãmb bãongo, la ka bãong sẽn kẽes ne ninsaalb nus ye, rat n togs tɩ yaa Kiris bãong sẽn kɩt tɩ yãmb bas y yĩngã ratmã. 12#Rom 6.4Yãmb muma ne Kirisi, b sẽn lis yãmbã pʋgẽ, la b naaga yãmb bãmb pʋgẽ n vʋʋg n bas kũum, yãmb sẽn tẽ Wẽnnaam pãngã sẽn vʋʋg Kiris n bas kũumã yĩnga. 13#Efɛ 2.1-5Pĩnda, yãmb sẽn dag n yaa bɛɛgdb y kongrã ne y sẽn ka kẽ bãong y yĩngã pʋgẽ wã yĩngã, Wẽnnaam kõo yãmb vɩɩm ne Kiris n kõ tõnd beegrã fãa sugri. 14#Efɛ 2.15Bãmb yẽesa tõod nins b sẽn da gʋls n kaood tõnd bʋʋdã la sẽn da mongd tõnd bʋʋma Wẽnnaam menesa tõ-kãng wakat ning b sẽn ka a Zeezi da-pɩkã zugã. 15Kiris sãama pãens rãmba ne noyã pãnga, n wilg nebã fãa tɩ b tõog-b-la ne da-pɩkã.
16 #
Rom 14.1-6
Dẽ wã yĩnga, da sak-y tɩ ned kao yãmb bʋʋd ne yãmb sẽn dɩt bũmb ning wɛɛngẽ wall y sẽn yũud bũmb ninga, wall tigrã wall kiu-paalga wall vʋʋsg daar wɛɛngẽ ye. 17Bõn-kãens fãa yaa bũmb nins sẽn na n wa wã mamsg bala, la bũmba meng-meng yaa Kirisi. 18Da sak-y tɩ ned sẽn maand wa a yaa sik-m-meng soaba la sẽn pʋʋsd malegs belg yãmb wa a sẽn date, n kɩt tɩ y kong y zoeesa keoor ye. Ned a woto buud teegda yãab buud toay-toaya, t'a ninsaalem tagsdã kɩt t'a pid ne wuk-m-meng zaalem 19#Efɛ 4.16la a ka tongd a meng ne zug ning sẽn sõngd yĩngã tõrã ne a kõb-sũgdsã la a gĩina t'a bɩt bɩʋʋng sẽn yit Wẽnnaam nengẽ wã ye. 20Sã n yaa tɩ yãmb kii ne Kirisã, tɩ Kiris yols yãmb ne tẽeb buud toay-toayã yembdo, bõe tɩ yãmb bas tɩ b leb n modgd yãmb tɩ y sak tõod a woto sẽn ya: 21«Da rɩk-y ye! Da lemb-y ye! Da sɩɩs-y ye!» 22Bõn-kãens b sẽn tar n tʋmdẽ wã sãamdame. Bõn-kãens yaa yeelsem la zãmsg ninsaalb sẽn tar n zãmsd taaba. 23Yaa sɩd tɩ ned sã n get yeelsmã ne zãmsgã, b wẽnda wa b yaa yam tʋʋma, b sẽn wilgd wẽn-tũudum sẽn maand ne yamleoogo, la sik-m-menga, la tõog-m-menga. La b yaool n ka tar yõod n tõe n sõng ned t'a tõog a yĩngã ratem wẽng ye.
Currently Selected:
Koloos‑rãmba 2: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
