2 Sãmwɛlle 22
22
A Davɩɩd fãagr yɩɩlle
1Daar ning Sẽn-Ka-Saab sẽn fãag a Davɩɩd ne a bɛɛbã fãa wã, la b fãag-a a Sayull nugẽ wã, yẽnda goma ne Sẽn-Ka-Saabo.
2A yeelame yaa:
«Sẽn-Ka-Saab yaa mam pĩiga,
bãmb yaa mam pãng zĩiga,
la b yaa mam fãagda.
3Bãmb yaa mam Wẽnnaam,
la b yaa mam pĩiga.
Mam zĩ-soalgdg yaa bãmb nengẽ.
Bãmb yaa mam gãongo,
la pãng sẽn fãagd maam.
Mam pãng zĩiga, la m zĩ-soalgdga.
Yãmb n fãagd maam nen-keglem dãmbã nugẽ.
4Mam sã n zẽk m koɛɛg n yeele:
‹Bɩ Sẽn-Ka-Saab yʋʋr paam pẽgre›,
bãmb fãagda maam m bɛɛbã fãa nusẽ.
5Bala, kũum ko-wĩis rag n gũbga maam,
la sãoong ko-zoetem kẽes-m-la rabeem.
6Kɩɩm-kulg wĩy rag n vila maam,
kũum gãmbr dag n bee mam taoore.
7Mam sũ-sãangã pʋga, mam boola Sẽn-Ka-Saabo,
mam boola m Wẽnnaamã tɩ b sõng-ma.
Bãmb zĩnda b ro-sõngẽ wã n wʋm m boaalã.
Mam sẽn bool-b n kot sõngrã b wʋmame.
8Tẽn-gãongã rigimdame n miime,
la saasẽ yẽbgrã rĩmsame.
Wẽnnaam sũ-puugrã rĩmsa bãmba.
9Bug-zõos rag n yita bãmb yõyẽ wã n zẽkdẽ,
bug-witim n dag n yit bãmb noorẽ,
bug-pãrs me n dag n yit be.
10Sẽn-Ka-Saab zõnega sa-gãongã n tab n sigi,
bãmb taba sawad-taok n sigi.
11Bãmb zomba Serubẽ n yɩgda,
bãmb zomba sobg pɩgs n puki.
12Bãmb dɩka lik n maan fu-roog n gũbg b menga,
wa koom sẽn be sawad-lik pʋgẽ.
13Sa-yãgb ning sẽn deng bãmb taoorã pʋgẽ,
bug-pãrs n yit beenẽ.
14Sẽn-Ka-Saab zĩnda saasẽ n tãse.
Sẽn-Ka-To kɩtame tɩ b wʋm b koɛɛg rãamde.
15Bãmb tãoo pɛɛm n sãeeg b bɛɛbã,
la b tʋm sa-yãgb n kẽes bɛɛbã rabeem.
16Sẽn-Ka-Saab sẽn tãsã, ko-kãsengã tẽngr pukame,
b vʋʋsmã ne b yõ-bogdã pemsem kɩtame tɩ dũni wã yẽbgr puki.
17Sẽn-Ka-Saab zĩnda yĩngr n tẽeg
b nug n gãd maam n yiis ko-kãsemsã pʋga.
18Bãmb fãaga maam m bɛyã sẽn tar
pãngã nugẽ.
B fãag-m-la sẽn kis-b maam n tar pãng
n yɩɩd maamã nugẽ.
19Nin-bãmbã bẽda toogã sẽn paam
maamã daare, n na n zab ne maam,
la Sẽn-Ka-Saab wa n sõnga maam.
20Sẽn-Ka-Saab fãaga maam, n yols-ma.
B sẽn fãag-ma, yaa b sẽn nong-ma yĩnga.
21Sẽn-Ka-Saab maana maam wa
sẽn zems m tɩrlem.
Bãmb keoo maam wa sẽn zems
mam nus tʋʋm-sõamyã sẽn yaa to-to wã.
22Bala, mam saka Sẽn-Ka-Saab raabã,
n ka bʋdg n bas m Wẽnnaamã wa nin-wẽnsã ye.
23Mam tagsda Sẽn-Ka-Saab no-tũudsã fãa yelle.
La mam ka zãagd m meng ne bãmb tõodã ye.
24Mam maana burkĩnd ne bãmba,
n gũus m meng ne yel-wẽn buud fãa.
25Dẽ, Sẽn-Ka-Saab keoo maam
wa sẽn zems m tɩrlem,
wa sẽn zems m sẽn maan sõmblem
ning bãmb nifẽ wã.
26Sẽn maand-a pʋ-peelem,
yãmb maanda pʋ-peelem ne-a,
sẽn yaa-a gãndaoog n yaa burkĩna,
yãmb wilgda a soab y burkĩndlim.
27Sẽn maand-a sõmblem,
yãmb wilgda a soab tɩ y yaa sõmblem soaba.
La ned ning sẽn wilgd t'a tara yam,
yãmb wilgd-a lame tɩ yãmb yam n yɩɩde.
28Yãmb fãagda nimbãan-dãmbã,
la y sã n ges wuk-m-mens rãmbã,
b sikda b mense.
29Yãmb a Sẽn-Ka-Saab n yaa mam vẽenem.
Sẽn-Ka-Saab vẽnegda maam lik bida pʋgẽ.
30Ne yãmb pãnga, mam zoet n
segda tãb-bi-sulli,
ne mam Wẽnnaamã pãnga,
mam gãndgda lalse.
31Wẽnnaam soayã zemsa zãnga,
Sẽn-Ka-Saab goamã yaa sɩda,
la b yaa gãongo, neb nins fãa sẽn
soonded bãmb nengẽ wã yĩnga.
32Sã n ka Sẽn-Ka-Saabo, Wẽnnaam a to bee yɛɛnẽ?
La ãndã n yaa pĩig kugri, sã n ka tõnd Wẽnnaamã?
33Wẽnnaam-kãng n yaa mam pãng zĩiga,
la bãmb n manegd mam sore, tɩ zems zãnga.
34 #
Hab 3.19
Bãmb n kɩtd tɩ mam naoã
yaa faasg wa walg nao,
la b sõngd maam tɩ m dʋʋd zĩ-zãongls zutu.
35Bãmb n zãmsd maam zabr sẽn zabd to-to,
la b sõngd maam tɩ m yãagd zũud tãpo.
36Yãmb kõta maam y fãagrã tɩ
yaa m gãongo,
yãmb sẽn leokd maamã bɩɩsda maam.
37Yãmb sõngda maam tɩ m zoet n ka yɛɛdẽ ye.
La m nao-sẽbã yaa kãenkãe tɩ m ka lagsdẽ ye.
38Mam digda m bɛɛbã, n tɩ sãam-ba,
mam ka lebgd n ka sãam-b zãng ye.
39Mam sãamd-b lame, m kɛɛd-b lame n pase,
tɩ b ka leb n tõe n yik ye.
Bãmb lʋɩta tẽng tɩ m tabda.
40Yãmb kõta maam pãng tɩ m tõe n zabe,
yãmb kɩtdame tɩ mam tõog m bɛɛbã.
41Yãmb kɩtdame tɩ mam bɛɛbã zoet
mam taoore,
la m na n menesa sẽn kis-b maamã zãnga.
42Bãmb yong n getame,
la ned ka be n na n fãag-b ye.
B boonda Sẽn-Ka-Saabo, la b ka leokd-b ye.
43Mam neema bãmb wa tẽng tom, mam bedsd-b lame,
n tabd-b wa sor zug begdo.
44Yãmb fãagda maam ne m nebã zabã,
la y lʋɩɩs-m bu-zẽms taoore,
n kɩt tɩ m soog buud m sẽn dag n ka mi.
45Bu-zẽmsã belemda maam,
mam sã n gom bala, b sakdame.
46Bu-zẽmsã pãng sɛɛme,
b yita b zĩ-solgdsẽ wã, n digda.
47Bɩ Sẽn-Ka-Saab paam pẽgre,
bɩ mam pĩigã paam barka!
Bɩ Wẽnnaam sẽn yaa pĩig sẽn
fãagd maamã paam waoogre.
48Wẽnnaam-kãng n dokd m sũur n kõt-ma,
n kɩtdẽ tɩ m soogd bu-zẽmse.
49Bãmb n sõngd maam tɩ m põs m bɛɛbã!
Yãmb zẽkda maam tɩ m yɩɩg m zabd-n-taasã,
yãmb fãagda maam nin-toaag nugẽ.
50 #
Rom 15.9
Rẽ n kɩt yaa Sẽn-Ka-Saabo,
tɩ mam na n pẽg yãmb bu-zẽmsã sʋka,
la m yɩɩl n pẽg yãmb yʋʋrã.
51Sẽn-Ka-Saab maanda tʋʋm-kãsems n fãagd b rĩmã,
bãmb wilgda b nonglem ne b nin-tũusdgã.
Bãmb wilga b nonglem ne a Davɩɩde,
la ne a Davɩɩd yagensã, wakat sẽn kõn sa yĩnga.»
Currently Selected:
2 Sãmwɛlle 22: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
