2 Sãmwɛlle 23
23
A Davɩɩd yaoolem goamã
1Gom-kãensã yaa a Izayi biig a Davɩɩd yaoolem goamã.
Yaa a Zakoob Wẽnnaamã sẽn
yãk-a soab t'a yɩ Israyɛll rĩmã,
n kɩt t'a lebg nin-kãsengã n gomde.
A Davɩɩd dag n yaa Israyɛll yɩɩn-yɩɩnda.
2«Sẽn-Ka-Saab Sɩɩgã rɩka maam n gomda.
Bãmb goamã bee mam zelemdẽ.
3Israyɛll Wẽnnaamã gomame,
Israyɛll pĩig kugrã yeela maam yaa:
‹Ned sã n soog neb ne tɩrlem la Wẽnnaam rabeem zoeese,
4yẽnda soab wẽnda wa yibeoog sõor sẽn pukdi.
La a wẽnda wa wĩntoog sẽn kõt a vẽenem,
tɩ saag niid n kɩtdẽ tɩ mood yit dũni wã zugu.›
5N-yẽe! Mam doogã me na n yɩɩ woto Wẽnnaam taoore.
Bala, bãmb maana kaool sẽn kõn sɛ ne maam.
Bũmbã fãa manegame tɩ zemse.
Bãmb na n kɩtame tɩ m paam fãagre,
la bũmb ning fãa sẽn yaa sõama.
6La nin-yoodã sẽn paoogd-b Wẽnnaamã,
yaa wa gõos neb sẽn kɛɛd n lobda.
La ned ka tõe n dɩk-b ne b nus ye.
7La ned ka tõe n sɩɩs-b me ye.
Sã n ka tɩ b kãas-b n yõog bugum bala.»
A Davɩɩd gãndaado
8Ad a Davɩɩd gãndaadã yʋya: Takmoon dao a Yosɛɛb-Basebɛte, sẽn yaa gãndaadã sull a yembr ned a yembrã. Yaa yẽnda n tall kãnd zabr pʋgẽ n kʋ neb kobs nii zĩig pʋgẽ balã. B rag n boond-a lame me t'a Ɛsni tẽng rao a Adino.
9La sẽn pʋgd yẽnda, yaa a Akoki biig a Dodo biig a Eliyazaare. Yẽnda yaa gãndaad a tãabã nin-yende. Bãmb n dag n be ne a Davɩɩd wakat ning Filistẽ nebã sẽn wa n tigim taab n dat n zab ne a Davɩɩdã. Sasa-kãnga, Israyɛll nebã fãa rag n zoeeme n dʋ tãmsã zutu. 10A Eliyazaar yikame n kʋ Filistẽ nebã ne sʋʋg hal t'a nugã yɛ, n wa tabend ne a sʋʋgã. Badaare, Sẽn-Ka-Saab kɩtame t'a paam tõog-kãsenga. Israyɛll nebã lebg n wa tũu a Eliyazaar tɩ b tɩ wʋk neb nins sẽn ki wã teedo.
11Sẽn pʋgd yẽnda, yaa Haraar dao a Aage biig a Sama. Filistẽ nebã rag n tigma Leki tẽnga, la bɛng pʋʋg n dag n be beenẽ, Filistẽ nebã riga Israyɛll nebã tɩ b zoe. 12La a Sama tɩ yalsa pʋʋgã tẽn-sʋka n na n deeg pʋʋgã, la a zaba ne Filistẽ nebã, la Sẽn-Ka-Saab kõo bãmb nebã fãagr-kãsenga.
13Koodã tigsg wakate, nanambs pis-tã wã neb a tãab kẽnga a Davɩɩd nengẽ Adulam tãngã bok pʋgẽ wakat ning Filistẽ nebã tãb-bi-sull a ye sẽn dag n tilg b tãb-sikã Refayim longẽ wã. 14Wakat-kãng t'a Davɩɩd dag n ket n bee tãmsã pẽgsẽ, la Filistẽ tãb-biisã rag n tilga b sik zĩigã Betlehɛm.
15Ko-yũud n wa n yõk a Davɩɩd t'a yeele: «Yaa ãndã n na n sõng maam tɩ m paam bulgã sẽn be Betlehɛm tẽngã noorã koom n yũ?» 16La gãndaad a tãabã modgame n pɩʋʋg Filistẽ nebã tãb-sikã sʋka, n tɩ toog koomã Betlehɛm tẽngã noor bulgã pʋgẽ n wa kõ a Davɩɩde. La yẽnda ka sak n yũ koomã ye. Yẽnda raaga koomã Sẽn-Ka-Saab taoore, 17n yeele: «Sẽn-Ka-Saabo, mam ka tõe n sak n maan a woto ye. Bala, a na n yɩɩ wa mam sẽn yũud neb nins sẽn gẽneg b yõy n kẽngã zɩɩm.» La yẽnda ka yũ koomã ye. Gãnda-kãens a tãabã me sẽn leb n tʋm la woto.
18A Zoaab sẽn yaa a Seruya biiga yao a Abisayi talla kãnd n kʋ neb kobs-tã zĩig pʋgẽ. La yẽnda me yʋʋrã yii wa gãndaad a tãabã sullã. 19Yẽnda yʋʋrã yiime n yɩɩd neb pis-tã wã fãa. Yẽnda yaa bãmb naaba, la yẽnda ka ta pipi gãndaad a tãabã ye.
20A Zehozada biig a Benaya rag n yaa gãndaoog sẽn paam tõogr wʋsgo. Yẽnda rag n yaa Kabseyɛll neda. Yaa yẽnda n kʋ Moaab gãndaad a yiibã. La daar a yembre, wao-kãseng wakate, yẽnda kẽe bokẽ n kʋ gɩgemde. 21Leb n yaa a Benaya n kʋ Ezɩpt nin-daoog a yembrã. Ezɩpt nin-daoogã rag n zãada kãnd n segd a Benaya, la a Benaya rag n zãada dasaare. A Benaya reega Ezɩpt nedã kãndã n wẽneg n kõs-a n kʋ. 22A Zehozada biig a Benaya maana a woto t'a yʋʋrã yi wa gãndaad a tãabã. 23Gãndaad pis-tã wã fãa sʋka, yẽnda me yɩɩ ned yʋʋr sẽn yi n yɩɩda. La yẽnda rag n ka be pipi gãndaad a tãabã sʋk ye. La a Davɩɩd yãka yẽnda t'a lebg a gũudbã naaba.
24Ad neb pis-tã wã sull neb a taabã yʋya:
A Zoaab yao a Azayɛll yaa
gãndaad pis-tã wã ned
a yembre, ne Betlehɛm dao
a Dodo biig a Ɛlkana,
25la Harood daop a Sama ne a Elika,
26la Pelɛt dao a Helɛs ne Tekoa rao a Ikɛs biig a Iira.
27La Anatot rao a Abiyezɛɛr ne Husa rao a Mebunayi,
28la Akoki rao a Salmon ne Netofa rao a Maharayi,
29la Netofa tẽng rao a Baana biig a Helɛɛbe,
ne Gibeya sẽn be Benzame soolmẽ wã rao a Ribayi biig a Itayi.
30La Piraton tẽng rao a Benaya ne Gaas ko-soogẽ dao a Hidayi,
31la Araba tẽn-nabd-koɛɛngẽ dao a Abi-Albon,
ne Bahurim rao a Azmavɛte,
32la Salbon tẽng rao a Eliyakba ne a Bene-Yasɛm,
la a Zonatã,
33ne Haraar dao a Sama,
la Araar dao a Saraar biig a Akiyam,
34ne Maaka rao a Akasbayi biig a Elifelɛte,
la Gilo rao a Ayitofɛll biig a Eliyam,
35ne Karmell dao a Hɛsrayi,
la Araab rao a Parayi
36ne Soba rao a Natã biig a Yigyalle,
la Gaad buudã rao a Bani,
37ne Amo rao a Selɛke,
la Beerot rao a Naharayi sẽn
dag n zãad a Seruya biig
a Zoaab zab-teedã.
38N paas Yetɛɛr raop a Iira ne a Garɛɛbe,
39la Hɛt dao a Uuri.
Bãmbã fãa sõorã yaa neb pis-tã la a yopoe.
Currently Selected:
2 Sãmwɛlle 23: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
