2 Sãmwɛlle 21
21
Gabawõ nebã ne a Sayull roogã nebã
1A Davɩɩd wakatẽ wã, kom n zĩnd yʋʋm a tãabo. A Davɩɩd soka Sẽn-Ka-Saab n na n ges yaa a wãn tɩ komã yaa a woto? La Sẽn-Ka-Saab yeelame yaa: «Nin-kʋʋdbã yell bee a Sayull ne a roogã zugu, yẽnda sẽn kʋ Gabawõ nebã yĩnga.» 2#Zoz 9.3-15Gabawõ nebã yaa a Amoor buudã neb bilf ning sẽn dag n ketã. Bãmb dag n ka Israyɛll buud ye. Israyɛll nebã rag n wẽename n yeel tɩ bãmb ka na n maan Gabawõ nebã bũmb ye. La baoosgo, yẽnda a Sayull sãama bãmba, yẽnda sẽn dag n tar nonglem-kãseng Israyɛll ne Zʋʋda buudã yĩngã. Rĩm a Davɩɩd boola Gabawõ nebã n na n gom ne-ba. 3Yẽnda yeel-b lame yaa: «Yãmb datame tɩ mam maan bõe tɩ y ra leb n geelg Israyɛll nebã kongrã, la y ning b zut barka?» 4Gabawõ nebã yeelame: «Wanzuri ne sãnem ka tõe n maneg yell ning sẽn be tõnd ne a Sayull buudã sʋkã ye, la Israyɛll ned kũum me ka tõe n dol ye.» A Davɩɩd leokame: «Kos-y yãmb sẽn dat bũmb ning tɩ m maan n kõ-yã» 5Bãmb yeela rĩmã yaa: «A Sayull dag n kʋʋ tõnd nebã n dat n menes tõnd buudã zãnga, tɩ tõnd ned baa a ye da leb n kell Israyɛll tẽngã pʋgẽ ye. 6Tõnd kotame tɩ y yãk a Sayull yagensã sʋk neb a yopoe n kõ tõndo tɩ d luul-b Sẽn-Ka-Saab taoor Gibeya, Sẽn-Ka-Saab sẽn yãk a Sayull tẽng ningã pʋgẽ wã.» Rĩmã yeelame: «Mam na n yãk-b lame n kõ yãmba.»
7 #
1Sãm 20.15-17, 2Sãm 9.1-7 La rĩmã basa a Sayull biig a Zonatã biig a Mefibosɛt n ka kʋ, wẽeneg ning yẽnda sẽn dag n wẽen ne a Zonatã Sẽn-Ka-Saab taoorã yĩnga. 8#1Sãm 18.19Dẽ, ad neb a yopoe nins rĩmã sẽn yãk n kõ Gabawõ nebã tɩ b kʋ wã: Yaa a Armoni ne a Mefibosɛt sẽn yaa a Aya bi-pugl a Ritspa sẽn yaa a Sayull pʋg-rɩkdgã kambã, n paas a Sayull bi-pugl a Meraab#21.8 A Meraabe: Yaa bi-pugl ning b sẽn dag n pʋlem a Davɩɩdã. A yʋʋrã võor dat n yeelame tɩ ‹fɩɩgre.› sẽn yaa Mehola rao a Barzɩlayi biig a Adriyɛll pagã kamb a nu wã. 9A Davɩɩd rɩk-b lame n kõ Gabawõ nebã tɩ b luul-b Gibeya Sẽn-Ka-Saab taoore, tãngã zugu. Bãmb b yopoe wã fãa naaga taab n ki wakat yɛnga. B kʋʋ bãmb bõn-bɩʋʋng sɩngr wakate, oorzã kẽebg sasa. 10A Aya bi-pugl a Ritspa rɩka yolg n tɩʋ pĩiga zug n yegl kũumã, n zĩnd be bõn-bɩʋʋng sɩngr wakate, n pa be n tãag sigr saagã sẽn wa n pãb kũumã. La wĩntoogo, yẽnda ka bas tɩ bõn-yɩgdɩ rɩ-ba, la yʋng me, yẽnda ka bas tɩ we-rũms wa n dɩ-b ye. 11B tɩ togsa a Davɩɩd a Sayull pʋg-rɩkdg a Ritspa sẽn maan bũmb ningã.
12 #
1Sãm 31.8-13
La a Davɩɩd kẽng n tɩ reega a Sayull ne a biig a Zonatã kõaba Yabɛɛs tẽngã sẽn be Galaad soolmẽ wã nebã nengẽ. Bala, wakat ning Filistẽ nebã sẽn wa n tõog a Sayull Gilboa wã, b lulga yẽnda ne a biigã kũum Bɛt-Sãn. Dẽ, Yabɛɛs tẽngã neb rag n kẽnga Bɛt-San tẽngã n tɩ zuk a Sayull ne biigã kũum n lebg n tɩ mum Zabɛɛse.#21.12 Zabɛɛse: Yaa tẽn-bil a yembr sẽn dag n be Galaad soolmã pʋga. Tɩ ges-y 1Sãm 31.11. 13A Davɩɩd tɩ wʋka a Sayull ne a biig a Zonatã kõabã, la a kɩt tɩ b wʋk neb a yopoe wã b sẽn dag n luulã me kõaba. 14B muma a Sayull ne a biig a Zonatã kõaba a Sayull ba a Kiis yaoogã pʋgẽ Sela tẽngã sẽn be Benzame soolmẽ wã. La b maana bũmb nins fãa rĩmã sẽn yeelã. Yõwã zugẽ, Wẽnnaam sũurã siga ne tẽngã.
Zabr yika Israyɛll ne Filistẽ-dãmbã sʋka
15Filistẽ nebã leb n yika zabr ne Israyɛll nebã. La a Davɩɩd ne a tãb-biisã kẽngame n tɩ zab ne Filistẽ nebã. La a Davɩɩd dag n yɛɛme. 16A Zisbi-Benoob rag n yaa nin-wobdã yageng a yembre, la a kãndã zɩslem dag yɩɩda zũud kɩlo a tãab la pʋɩ-sʋka, la a rag n tara sʋ-paalg sẽn be a sɛɛgẽ, yẽnda yeelame t'a na n kʋ a Davɩɩde. 17#1Rĩm 11.36, Yɩɩn 132.17La a Seruza biig a Abisayi sõnga a Davɩɩd n zab ne Filistẽ raoã n kʋ-a. A Davɩɩd nebã wẽename n yeel-a yaa: «Da leb-y n tũ-y tõnd n kẽng zabr yɛsa, n wa kɩt tɩ Israyɛll fɩtlã ki ye.»
18Bõn-kãng zugẽ, zabr leb n yika Israyɛll nebã ne Filistẽ nebã sʋk Goob tẽnga. La Husa tẽng rao a Sibekayi kʋʋ nin-wobdã yageng a Safe.
19Israyɛll nebã ne Filistẽ nebã leb n zaba ne taab Goobe. La Betlehɛm dao a Yare-Oregim biig a Ɛlkana kʋʋ Gat tẽng rao a Golyaate.#21.19 a Golyaate: Yaa nin-wobg a yembr sẽn dag n tar kãnd t'a raoogã taglem ta sʋn-wʋgdbã koeer-bõangã.
20Zabr leb n zĩnda Gat tẽnga. Nin-wobg a yembr n dag be beenẽ, n tar nug-bi a yoob-yoobe la nao-bi a yoob-yoobe. Yẽnda me rag n yaa nin-wobdã yagenga. 21Yẽnda tʋʋsa Israyɛll nebã, la a Davɩɩd kẽem a Simeyi biig a Zonatã kʋ-a lame.
22Nin-bãmb b naasã n dag n yaa Gat tẽng nin-wobdã yagense. A Davɩɩd ne a tʋmtʋmdbã kʋʋ bãmb fãa.
Currently Selected:
2 Sãmwɛlle 21: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
