2 Korẽnt‑rãmbã sebre 5
5
1Sɩd me, tõnd miime tɩ tõnd tẽng zug ka roogã sẽn yaa fu-roogã sã n wa n sãame, tõnd tara roog arzãn pʋga, sẽn yaa Wẽnnaam n me. Yaa roog sẽn paad wakat sẽn kõn sa, sẽn ka ninsaalb nus n me ye. 2La tõnd sidgda ro-kãng pʋg me n dat arzãn doogã n yeelg n yɩɩd a yembrã, 3tɩ tõnd sã n paam yeelgre, tõnd kõn yɩ bɛɛl ye. 4Bala, tõnd sẽn ket n be fu-ro-kãngã pʋgã, tõnd sidgdame n tar namsgo, la ka tɩ tõnd dat n yeega tẽng zug roogã ye, la yaa tɩ tõnd data arzãn doogã n yeelge, tɩ vɩɩmã vel yĩn-kiidgã. 5Yaa Wẽnnaam n maan tõnd tɩ d yɩ a woto, bãmb n kõ tõnd Sɩɩg-sõng tɩ yaa arzegs nins b sẽn bĩng tõndã reng-n-lɛmbga.
6Dẽ wã, daar fãa tõnd tara raood wʋsgo, la d miime tɩ tõnd sẽn be yĩn-kãngã pʋgẽ wã, tõnd zãra ne Zu-soabã. 7Bala, tõnd kẽnda ne tẽebo, la d ka yã n yaool n tẽed ye. 8Tõnd tara raood wʋsgo, la tõnd nongẽ lame n yi n bas yĩng‑kãngã n kẽng Zu-soabã nengẽ n yɩɩda. 9Yaa woto yĩng me tɩ tõnd maoodẽ, n dat n ta bãmb yam, tõnd sã n be yĩn-kãnga pʋga, wall d sã n wa n yi n bas-a. 10#Rom 14.10Bala, yaa tɩlɛ tɩ tõnd fãa yals Kiris bʋʋdã geer taoore, tɩ b keo ned kam fãa wa sẽn zems tʋʋm nins yẽ sẽn tʋmã yĩngã pʋgã. Sã n yaa tʋʋm-sõamyã wall tʋʋm-wẽnse.
Paasg tʋʋmde
11Tõnd sẽn mi Zu-soabã rabeem zoeesã, tõnd baoodame n sagl nebã n tõog tɩ b tẽ. Wẽnnaam mii tõnd sõama. La mam tẽedame tɩ yãmb sũyã pʋse, yãmb me mii maam. 12Tõnd ka leb n wilgd yãmb yɛs tɩ tõnd zemsame ye, la tõnd kõta yãmb weer tɩ y maan sũ-noog tõnd yĩnga, tɩ yãmb na tõog n leok neb nins sẽn waoogd b mens ne nin sẽn ne bũmb ninsã, la ka sẽn be sũurẽ wã. 13Sɩd me, sã n yaa tɩ tõnd yaa ka-yam dãmba, yaa Wẽnnaam yĩnga, la tõnd sã n tara yam, yaa yãmb sõngr yĩnga. 14Bala, Kiris nonglmã n so tõndo. Tõnd sẽn bãng vẽeneg n welg tɩ nin-yend n ki nebã fãa yĩnga, dẽ nebã fãa n ki. 15A Zeezi kii nebã fãa yĩnga, tɩ sẽn vɩ-bã kõn leb n vɩ b mens yĩng ye, la b na n vɩɩ sẽn ki-a bãmb yĩng n vʋʋg n bas kũumã yĩnga. 16Woto, sẽn sɩng ne moasã, tõnd ka leb n get ned wa sẽn zems ninsaal tagsg ye, la baa tõnd sã n dag n gesa Kiris wa sẽn zems ninsaal tagsgo, moasã, tõnd ka leb n get bãmb wa sẽn zems ninsaal tagsg yɛs ye. 17Ned sã n tũud Kirisi, yẽnda soab yaa nin-paalga. Bõn-kʋdã fãa loogame, bũmbã fãa lebga paalse. 18La yõwã fãa yita Wẽnnaam nengẽ. Kiris maasem yĩnga, Wẽnnaam yiisa yell ning sẽn da be tõnd ne bãmb sʋkã, n kõ tõnd zabr paasg tʋʋmde. 19Bala, yaa ne Kiris la Wẽnnaam yiis yell ning sẽn da be bãmb ne dũniyã sʋka, n ka leb n geelgd ninsaalbã beegrã ye. La b ninga zabr paasg koɛɛg togsg tõnd zutu. 20Dẽ, tõnd yaa Kiris tʋmtʋmdba, tɩ tõnd sẽn gomd ne yãmbã, yaa Wẽnnaam n tall tõnd n gomd ne yãmba: Tõnd kota yãmb ne Kiris yʋʋr tɩ y leb n paam lagem-n-taar ne Wẽnnaam! 21Wẽnnaam kɩtame tɩ Kiris sẽn ka maan yel-wẽnã lebg yel-wẽn tõnd yĩnga, tɩ tõnd tõe n lebg nin-tɩrs Kiris pʋg Wẽnnaam taoore.
Currently Selected:
2 Korẽnt‑rãmbã sebre 5: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
