2 Korẽnt‑rãmbã sebre 12
12
Yĩng gõaaga
1Yaa tɩlɛ tɩ m pẽg m menga? Bõn-kãng ka tar yõod ye. Baoosgo, mam na n togsa mam sẽn yã yãab ninsi, la vẽnegr nins Zu-soabã sẽn kõ maamã. 2Yʋʋm piig la a naas sẽn looge, mam bãnga Kiris tẽed a yembr sẽn paam zẽkr n ta saas a tãab soabã. Mam ka mi yẽnda soab sã n da bee a yĩngã pʋga, wall a sã n da ka be a yĩng pʋgẽ ye, la Wẽnnaam miime. 3Rao-kãngã sã n da bee a yĩngã pʋga, wall a ka be, mam ka mi ye, la Wẽnnaam miime, la mam sẽn mi yaa tɩ 4rao-kãngã zẽkame n kẽng Paraadi, la a wʋma goamã, ned sẽn ka tõe n togs ye, la b sẽn ka kõ ninsaal noor t'a gom-a ye. 5Mam na n pẽga m meng rao-kãngã wɛɛngẽ, la mam mengã wɛɛngẽ, mam ka na n pẽg mmeng ye. Sã n ka m pẽg m meng pãn-komsem bala. 6La mam sã n dat n pẽg m menga, mam ka na n maan yalemd ye, bala mam na n togsa sɩda. La mam gũusda m meng tɩ ned da wa n yãnd mam sẽn maandã, la a wʋm mam sẽn gomdã n tags tɩ maam n yɩɩd ye. 7La sẽn na n yɩl tɩ mam da wuk m meng vẽneg-kãsen‑kãensã yĩnga, b ninga gõaag mam yĩnga pʋgẽ, sẽn yaa sʋtãan tʋmtʋmd t'a namsd maam, tɩ mam da wa n pid ne wuk‑m‑meng ye. 8Mam kosa Zu-soabã naoor a tãab tɩ b kɩt tɩ bõn-kãng loog n bas maam. 9La b yeela maam yaa: «Mam barka sekda foom. Bala, yaa pãn-komsmã pʋg la mam pãngã maand a tʋʋmde.» Dẽnd mam na n maana sũ-noog m pãn-komsmã pʋga, tɩ Kiris pãngã zĩnd mam zugu. 10Yaa woto yĩng tɩ mam maand sũ-noog pãn-komsmã pʋgẽ, paoogrã pʋgẽ, yel‑pakrã pʋgẽ, namsgã pʋgẽ, la tood mam sẽn sak Kiris yĩngã pʋgẽ. Bala yaa mam pãn-komsmã wakat la mam tar pãnga.
11Yãmb modga maam tɩ m yɩ yalma. Sɩd me, yaa yãmb n da tog n gom n sõng maam. Bala, b sẽn boond-b rãmb tɩ tẽn-tʋmd-kãsemsã pʋs n ka yɩɩd maam ye, baa ne mam sẽn ka baa fɩ wã. 12Bãn nins sẽn yaa toor n wilgdẽ tɩ mam yaa tẽn-tʋmdã maana yãmb sʋk tɩ nebã yã, yɩɩ ne sũ-mare, makrã fãa pʋgẽ, la ne bãnã, la bõn-yɛɛsdse, la ne bõn-bãnã. 13Yaa bõe la yãmb paam-y tɩ ka ta a Zeezi tẽedbã a taabã sẽn tarã, sã n ka mam sẽn ka sak tɩ y ges mam yellã bala? Kõ-y-m sugr ne kong‑kãngã.
A Poll dat n kẽnga Korẽnt naoor a tãab soaba
14Ade, mam seglame n sɛ n na n wa yãmb nengẽ naoor a tãab-n-soaba, la yãmb ka na n ges mam yell ye. Bala, mam ka baood yãmb bũmb ye, la yaa yãmb mensã la m baooda. Sɩd me, ka kamb n tog tigs paoong b ba-rãmb yĩng ye, la yaa ba-rãmbã n tog n tigs paoong b kamb yĩnga. 15Ne maam, mam na n kɩsa bũmb fãa ne yamleoogo, la m kɩs m mengã fãa yãmb mensã yĩnga. Mam sẽn nong yãmb wʋsgã kɩtame tɩ yãmb ka leb n nong maam wʋsg la?
16Baa sã n yaa a woto, mam ka yɩ zɩɩb yãmb yĩng ye la nina na n tagsame tɩ mam maana sɩlem n paam yãmba. 17Rẽ yĩnga, mam sẽn tʋm neb nins yãmb nengẽ wã, m tũnuga bãmb ned a bõe n belg yãmb n deeg bũmbu? 18Mam sagla a Tit t'a wa yãmb nengẽ, la m tʋma ba-biig a yembr t'a tũ yẽnda. Rẽ yĩnga, a Tit belga yãmb n deeg bũmbu? Yẽnda tagsgã ne mam dẽndã ka a yembr sɩda? Tõnd tʋʋm tʋmdɩ wã ka a yembr sɩda?
19Hal daar zãra, yãmb da tagsame tɩ tõnd dat n baoo bʋʋm yãmb taoore, la ka a woto ye. Yaa Wẽnnaam taoore, Kiris tũudmã pʋgẽ la tõnd gomda. M zo-nongdse, bõn-kãensã fãa yaa yãmb tẽebã bɩɩsg yĩnga. 20Bala, mam zoeta m na n wa wa n mik tɩ yãmb ka ya wa mam sẽn datã ye, la tɩ yãmb da mik tɩ mam mengã ka ya wa yãmb sẽn datã ye. Mam yɛɛsdame tɩ welgre, la sũ-kiiri, la kis-taaba, la geesem-geesem, la wɩdga, la paoog-taaba, la wuk-m-meng la zũnglug na n wa zĩnd yãmb sʋka. 21Mam zoeta m na n wa wa yãmb nengẽ, tɩ mam Wẽnnaamã leb n ning maam yãnd yãmb yĩnga, la tɩ mam da wa n yãbe, neb wʋsg sẽn dag n maan yel-wẽn n ka tek yam n kos sugr yĩnga, la b tʋʋm-dẽgdã la b yoobã yĩnga, la tʋʋm beedã b sẽn maanã yĩng ye.
Currently Selected:
2 Korẽnt‑rãmbã sebre 12: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
