2 Korẽnt‑rãmbã sebre 11
11
1Mam nongẽ‑la yãmb sã n da tõe n sakẽ mam yalemdã bilfu! La yãmb sakdame. 2Bala, mam maanda sũ-kiir yãmb yĩnga, la yaa sũ-kiir sẽn yit Wẽnnaam nengẽ, tɩ bõe mam sẽn dɩk yãmb n kõ sɩd a yembr tãa wã yĩnga. Tɩ mam tõe n tall yãmb n kẽng Kiris nengẽ wa pʋg-sad sẽn ka sãam ye. 3#Sɩng 3.1-5,13La baoosgo, a wa waafã sẽn maan sɩlem n zãmb a Awa wã, mam yɛɛsdame tɩ yãmb yam na n wa wẽnemd n lebg wẽng n kɩt tɩ y bas y sõmblmã ne y pʋ-peelmã y sẽn tar Kiris yĩngã ye. 4Bala, ned a to sã n yɩ pipi n wa moon yãmb Zeezi a to, tɩ ka Zeezi ningã tõnd sẽn da moon yãmbã, wall yãmb sã n deeg sɩɩg a to sẽn ka Sɩɩg ningã yãmb sẽn dag n deegã, wall koe-noog a to tɩ ka yãmb sẽn da reeg pĩndã, yãmb sakda yẽnda soab sõama. 5La mam yaool n tẽedame tɩ m ka yɩ poorẽ soab bũmb baa a fʋɩ pʋgẽ, ne tẽn-tʋmdb nins sẽn yet b mens tɩ b yaa tẽn-tʋmd-kãsemsã ye. 6Baa mam sã n ka gom minim-soaba, mam ka ned sẽn ka tar bãngr ye. La tõnd wilga bõn-kãng vẽeneg yãmb sʋk wakat fãa, bũmb fãa pʋga.
7Bɩ Mam sẽn moon yãmb Wẽnnaam koe-noogã zaalma, n sik m meng n zẽk yãmbã, m maana yel-wẽnde? 8Mam fãa Kiris tẽedbã sẽn be zĩis a taabã, mam sẽn sak tɩ bãmb yao maam tɩ m sõng yãmbã yĩnga. La mam sẽn da wa n be yãmb nengẽ n dat sõngrã, mam ka yɩ zɩɩb ned baa a ye yĩng ye. 9#Fili 4.15-18Bala, ba-biis nins sẽn yi Masedoan n wa wã kõo maam bũmb ning sẽn da paoog maamã. Bũmba fãa pʋgẽ, mam gũusa m menga, n da wa n yɩ zɩɩb yãmb yĩng ye, la mam na n kell n gũusa m menga ne bõn-kãngã. 10Ne Kiris sɩdã sẽn be mam sũurẽ wã, mam yetame tɩ ned ka tõe n gɩdg maam tɩ m ka pẽg m meng bõn-kãng wɛɛngẽ Akayi soolmã pʋgẽ ye. 11Bõe yĩng tɩ m yet a woto? Yaa mam sẽn ka nong yãmb yĩng bɩ? Wẽnnaam menga miime tɩ mam nonga yãmba.
12Mam sẽn maand bũmb ninga, mam na n kell n maan-a lame yɛsa, tɩ gɩdg neb nins sẽn baood weer n dat n pẽg b mens n yeel tɩ bãmb sẽn tʋmdã ne tõnd sẽn tʋmdã yaa a yembrã. 13Nin-bãmbã rãmb yaa zãmb tẽn-tʋmdbã, la belgr tẽn-tʋmdbã, n toeemd b mens n yaa wa Kiris tẽn-tʋmdbã. 14La yõwã ka bõn-lingdg ye. Bala, Sʋtãanã meng toeemda a meng n lebg wa malɛɛk sẽn tar vẽenem. 15Dẽ wã, yẽnda tʋmtʋmdbã me sã n toeemd b mens n lebgd wa tɩrlem tʋmtʋmdba, ka bõn-yɛɛsdg ye. Bãmb baoosg na n yɩɩ wa b tʋʋmã sẽn yaa to-to wã.
A Poll namsg a tʋʋmdã yĩnga
16Mam leb n yetame: Bɩ ned da ges maam wa yalem ye, wall y sã n get maam wa yalmã, bɩ y sak n deeg maam wa yalmã, tɩ mam me tõe n pẽg m meng bilfu. 17Mam sẽn gomd bũmb ningã, ka Zu-soabã n yet tɩ m gom ye. La mam gomda ne pɛl-kɛgenga, wa m yaa yalma, n pẽg m meng bõn-kãng pʋgẽ. 18Neb wʋsg sẽn pẽgd b mens ne dũni yɛlã, mam me na n pẽga m menga. 19Yãmb sẽn yaa yam dãmb n yaool n sakd n deegd yalemb ne yamleoogo! 20Sɩd me, yãmb sakdame tɩ b kẽesd yãmb yembdo, tɩ b rɩt yãmba, tɩ b fãad yãmba, tɩ b ka nand yãmba, la b pãbd yãmb pegse. 21Mam yetame tɩ yaa yãnde. Tõnd maana pãn-komsem n ka tõog n maan a woto ye. Baoosgo, ne bũmb ning fãa ned sẽn tar raood tɩ pẽg a menga, mam me tara raoodo, mam gomda wa yalma. 22Bãmb yaa Ebre rãmba? Mam me yaa Ebre. Bãmb yaa Israyɛll buudu? Mam me yaa Israyɛll neda. B yaa a Abrahaam yagense? Mam me yaa a Abrahaam yagenga. 23#Tʋʋm 16.23Bãmb yaa Kiris tʋmtʋmdba? Maam n leb n yɩɩda. Mam gomda wa m zugã ka be ye. Sã n yaa ne tʋʋmã, maam n yɩɩd-ba, ne bi-bees roog kõom, maam n yɩɩd-ba, ne pãbr deegre, maam n leb n yɩɩd-ba, la mam kolga kũum naoor wʋsgo. 24#Tõ 25.3Zʋɩf-rãmbã pãba maam ne kalwaase, a yembr n ka pis-naase, naoor a nu. 25#Tʋʋm 16.22, Tʋʋm 14.19B pãba maam ne rasab naoor a tã, b loba maam kug vugri, koom-kogend sãama naoor a tã tɩ mam be b pʋse. Mam paa koom zug daar tõre la yʋng tõre. 26#Tʋʋm 9.23, Tʋʋm 14.5Kʋɩls rag n na n dɩɩ maam wakat kẽere, m kẽna pʋse. Fãadb rag n na n fãa maam. Mam tẽngẽ neb baoo n na n sãama maam. Neb nins sẽn ka Zʋɩf buudã baoo n na n sãama maam, mam paama tood tẽms pʋsẽ, mam dag n na n kii wetẽ. Mam dag n na n kii ko-kãsengã zugu, zãmb ba-biis rag n na n kʋʋ maam. 27Mam tʋma tʋʋm-kegemse, mam namsame. Wakat kẽere, mam ka gũs ye. Kom la ko-yũud yõka maam. Mam gãanda kom wakat kẽere. Wakat kẽere, waood yõka maam la fut paooga maam, 28tɩ m ka gomd bũmb nins sẽn ketã ye. Mam tara zɩɩb daar fãa, Kiris tẽedbã fãa yɛl sẽn pak maamã yĩnga. 29Ãndã pãng n boog tɩ mam dẽnd ka booge? Ãndã n lʋɩ yel-wẽnd pʋgẽ tɩ mam sũur ka sãame? 30Pẽg-m-meng sã n noomẽ, mam na pẽg m pãng-komsem. 31Wẽnnaam sẽn yaa tõnd Zu-soab a Zeezi Ba wã, sẽn tar-a bark wakat sẽn kõn sa wã miime tɩ mam ka yagd zĩrẽ ye! 32#Tʋʋm 9.23-25Mam sẽn wa n be Damaasã, rĩm a Areta Gʋvɛrneerã ra kɩtdame tɩ b gũud Damaas tẽngã noy n dat n yõk maam. 33La b kẽesa maam peoogẽ n tũnug roog fẽnetr n sik maam lalgã poor tɩ mam põse, t'a ka paam maam ye.
Currently Selected:
2 Korẽnt‑rãmbã sebre 11: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
