2 Korẽnt‑rãmbã sebre 13
13
Yaoolem sagls la pʋʋsem
1 #
Tõ 17.6, 19.15 Mam wata yãmb nengẽ naoor a tãab-n-soaba.
Yɛlã fãa na n paama manegre,
ne neb a yiib bɩ a tãab kaseto.
2Mam sẽn dag n zĩnd yãmb nengẽ naoor a yiibẽ soabã, mam dag n zoee n togsa yãmb bõn-kãngã, la dũndã, mam sẽn ka be yãmb nengẽ wã, mam leb n deng n togsd-a-la neb nins sẽn maan yel-wẽnã wakat sẽn loogã, la neb a taabã fãa. Mam sã n lebg n wa yãmb nengẽ, m ka na n bas ned baa yembr ye. 3Bala, yãmb baooda bãnd sẽn wilgd tɩ Kiris tũnugda maam n gomda. Bãmb yaool n ka pãn-komsem soab yãmb yĩng ye, la b yaa pãn-kãseng soab yãmb sʋka. 4Bala, b kaa a Zeezi da-pɩk zug b pãn-komsem yĩnga, la bãmb vɩɩ ne Wẽnnaam pãnga. Tõnd me yaa pãn-komsem dãmb a Zeezi tũudmã pʋgẽ, la tõnd vɩɩ ne bãmba, n tʋmd yãmb yĩnga, ne Wẽnnaam pãnga.
5Fees-y y mens y toore, n ges yãmb sã n bee tẽebã pʋgẽ. Mak-y y mens y toor n gese. Yãmb ka mi t'a Zeezi Kiris bee yãmb pʋsẽ la? Sã n ka rẽ, dall makrã kɩtdame tɩ yãmb ka paamd tõogr ye. 6La mam tẽedame tɩ yãmb miime tɩ makrã ka kɩtd tɩ tõnd ka tõogdẽ ye. 7Baoosgo, tõnd pʋʋsda Wẽnnaam yãmb yĩng tɩ y kõn maan bũmb baa yembr sẽn yaa wẽng ye. Ka tɩ wilg tɩ tõnd tõogda makr pʋgẽ ye, la yaa tɩ yãmb na maan sẽn ya neere, baa sã n wẽnda wa tõnd ka paamd tõogr makr pʋgẽ. 8Bala, tõnd ka tar pãng n na n zab ne sɩd ye, tõnd sẽn tar pãng ningã yaa sẽn na n sõng sɩdã. 9Tõnd sẽn wat n maan sũ-noog d pãn-komsmã wakatã tɩ yãmb tara pãnga, la tõnd sẽn kot bũmb ningã d pʋʋsg pʋgẽ, yaa tɩ yãmb na zems zãnga. 10Yaa rẽ yĩng tɩ mam gʋlsd yãmb bõn-kãense, wakat ning mam sẽn ka be yãmb nengẽ wã, tɩ mam sã n wa n wa yãmb nengẽ, mam kõn yɩ nin-toaag ne yãmba, ne noor ning Zu-soabã sẽn kõ maam yãmb sõngr yĩnga, la ka y sãoong yĩngã ye.
Yaoolem pʋʋsem
11La sẽn keta, m ba-biisi, paam-y sũ-noogo, modg-y n zems-y zãnga. Sagl-y taaba, paam-y yam a yembre, zĩnd-y ne taab ne bãane. La Wẽnnaam sẽn yaa nonglem la laafɩ soabã na pa ne yãmba. 12Pʋʋs-y taab ne mokr sẽn yaa sõama. Wẽnnaam nebã fãa pʋʋsda yãmba. 13Bɩ Zu-soab a Zeezi barkã la Wẽnnaam nonglmã, la Sɩɩg-sõng lagem-n-taar zĩnd ne yãmb fãa.
Currently Selected:
2 Korẽnt‑rãmbã sebre 13: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
