1 Pɩyɛɛre 4
4
Wẽnnaam kũun yel-gɛtba
1Dẽ wã yĩnga, Kiris sẽn nams b yĩnga pʋgẽ wã yĩnga, bɩ yãmb me paam tagsg a yembr ne bãmba. Bala, ned ning sẽn nams a yĩngã pʋg basa yel-wẽnã, 2tɩ wakat ning sẽn ket yẽnda sẽn na n vɩɩmd a yĩngã pʋgã, yẽnda kõn leb n vɩ wa sẽn zems ninsaal datem ye, la a na n vɩɩmda wa sẽn zems Wẽnnaam datem. 3Sɩd me, wakat sẽn looge, yãmb dag n maanda wa neb nins sẽn ka pʋʋsd Wẽnnaamã sẽn maandã. Yaa n sekame. Yãmb dag n kẽnda raglem pʋga, ratem wẽnse la yũ rãam n tuumdẽ wã pʋga, la rã-tɩgrã ne yão-beedã pʋga, la wẽn-naandsã pʋʋsg sẽn yaa bõn-wẽng wʋsgã pʋga. 4Yãmb sẽn ka leb n naagd neb nins sẽn ka pʋʋsd Wẽnnaamã n maand tʋʋm-dẽgd kãensã, a linga bãmb tɩ b kãnegd yãmba. 5Bãmb na n yals n togsa b yɛlã soab ning sẽn segl n sɛ n na n kao nin-vɩɩs la kũum bʋʋdã taoore. 6Sɩd me, yaa rẽ yĩng n kɩt tɩ b moon koe-noogã neb nins sẽn ki wã me, tɩ ninsaalbã sẽn kao bãmb bʋʋd wa sẽn zems yĩngã rẽndã, bɩ Wẽnnaam nifẽ bãmb na vɩ sɩɩg pʋgẽ. 7Bũmb fãa sɛɛb wakat kolgame.
Dẽ wã yĩnga, yɩ-y neb sẽn tar yam la gũus-m-mens-rãmba, n kẽng taoor ne pʋʋsgo. 8#Yel 10.12La sẽn deng bũmb fãa, nong-y taab daar fãa. Bala,
nonglem luta yel-wẽn wʋsgo.
9Maan-y taab sãando, tɩ yẽgeng kaẽ ye. 10Yãmb ned kam fãa sẽn deeg kũunã, rɩk-y-b n tʋm n sõng neb a taaba, wa Wẽnnaam barkã kũun toay-toayã yel-gɛtb sẽn yaa sõama. 11Ned sã n gomda, bɩ a gom wa sẽn zemsd Wẽnnaam goamã sẽn yetã. Ned sã n sõngdẽ, bɩ a sõng wa sẽn zemsd pãng ning Wẽnnaam sẽn kõ-a wã, tɩ Wẽnnaam sẽn so ziiri la pãng wakat sẽn kõn sa wã paam waoogr bũmba fãa pʋga, a Zeezi Kiris maasem yĩnga. Ãmina!
Namsgo, fo sẽn yaa Wẽnnaam nedã yĩnga
12Mam zo-nongdse, ra sak-y tɩ nams-toaag ning sẽn be yãmb sʋk n makd yãmbã yɩ lingr ne yãmba, tɩ yaa wa yaa yel-sãang n paamd yãmb ye. 13Ka tog n yɩ a woto ye, maan-y sũ-noogo, yãmb sẽn paam pʋɩɩr ne Kiris namsgã yĩnga, tɩ yãmb tõe n maan sũ-noog n kɩdem wakat ning bãmb ziirã sẽn na n pukã. 14Bark bee yãmb zugu, nebã sã n nams yãmb Kiris yʋʋrã yĩnga, bala, Sɩɩg ning sẽn be ziirã sẽn yaa Wẽnnaam Sɩɩgã bee yãmb zutu. 15Bɩ yãmb ned baa a yembr da paam namsg a sẽn yaa nin-kʋʋd yĩnga, wall wagdr yĩnga, wall tʋʋm-wẽns maand yĩnga, wall a sẽn yaa ned sẽn kẽed yɛl sẽn ka pak-a yĩng ye. 16La ned sã n paamd namsgo, a sẽn yaa Kiris tẽed yĩnga, bɩ a ra zoe yãnd ye, a pẽg Wẽnnaam, b sẽn boond yẽnda tɩ Kiris tẽedã yĩnga. 17Bala, moasã yaa wakat b sẽn na n sɩng bʋʋdã kaoob ne Wẽnnaam nebã. La sã n mikame tɩ yaa ne tõnd la b na n sɩng bʋʋdã kaoobo, neb nins sẽn ka sakd-b Wẽnnaam koe-noogã baoosg na yɩɩ a wãna? 18#Yel 11.31La sã n yaa tɩ nin-tɩrg fãagr paoong yaa toogo, dẽ ned ning sẽn yaa wẽn-kɩɩsd la yel-wẽn-maandã yell na n yɩɩ a wãna? 19Rẽ wã yĩnga, bɩ neb nins sẽn paamd namsg wa sẽn zems Wẽnnaam tʋlsmã rɩk b sɩɩsã n bas Wẽnnaam sẽn yaa naanda la sɩd soabã nugẽ, n kell n maan neere.
Currently Selected:
1 Pɩyɛɛre 4: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
