1 Korẽnt‑rãmbã 8
8
Yi-kãadem yelle
1Sã n yaa ne maand nins sẽn kʋ tẽn-kugã nemdã yelle, tõnd fãa miime tɩ d tara bãngre. (Bãngr wata ne wuk-m-menga, la nonglem sõngdame. 2Ned sã n tagsd t'a mii bũmbu, a ket n ka mi tɩ sek ye. 3La ned sã n nong Wẽnnaam, Wẽnnaam mi-a lame). 4Sã n yaa ne maandã b sẽn kʋ wẽn-naandsã nemd wãbr yelle, tõnd miime tɩ wẽn-naandg ka be dũni ye, la tɩ Wẽnnaam a yembr bal n be. 5Bala, baa ne bũmb nins sẽn be yĩngr wall tẽng zug tɩ b boond tɩ wẽnnaam-dãmbã (la wẽnnaam-dãmbã ne zu-soben-dãmba sõor waooga). 6Ne tõndo, Wẽnnaam a yembr bal n be, n yaa ba. Bũmb fãa yita bãmb nengẽ, tõnd yaa bãmb dẽnda. La zu-soab a yembr tãa n be, a Zeezi Kirisi, soab ning maasem yĩng bũmb fãa sẽn be, la tõnd sẽn be.
7La ka nebã fãa n mi bõn-kãng ye. Sɩd me, neb kẽer yam sẽn ket n togl wẽn-naandsã wãbda nem-kãens sẽn yɩ maoongã. La bũmb‑kãng rẽgemda bãmb sũ-bãngrã sẽn ka pãngã. 8Ka rɩɩb n na n pẽneg tõnd ne Wẽnnaam ye: Tõnd sã n ka rɩt-a, bũmb ka paoog tõnd ye. La tõnd sã n dɩt-a, a ka paasd tõnd fʋɩ. 9Baoosgo, bɩ y gũus tɩ yãmb lohormã da wa n lebg kug-lakdg neb nins sẽn ka pãnga yĩng ye. 10Bala, ned sã n yãnd foom a tar bãngrã tɩ f zĩ wẽn-naandg karen-doogẽ n dɩtẽ, rẽ yĩnga, a sũ-bãngrã sẽn ka pãngã ka na n kɩt t'a me wãb maand sẽn kʋ wẽn-naandsã nemdo? 11Woto, fo bãngrã kɩtame tɩ ka pãng soabã, ba-biig ning Kiris sẽn ki a yĩngã sãame. 12Fo sã n maan yel-wẽnd a woto n beeg f ba-biisã, tɩ b sũ-bãngrã sẽn ka pãngã lak foom, fo beega Kirisi. 13Yaa woto n kɩt tɩ rɩɩb sã n yaa kug-lakdg m ba-biig yĩnga, mam kõn leb n wãb nemd lae-lae, tɩ m da wa n kɩt tɩ m ba-biig lʋɩ ye.
Currently Selected:
1 Korẽnt‑rãmbã 8: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
