1 Korẽnt‑rãmbã 7
7
1Ne bũmb ning yãmb sẽn gʋls maam n gom a yellã, yaa sõama rao yĩng t'a ra sɩɩs pag ye. 2La sẽn na yɩl tɩ ned ra maan yoobo, bɩ ned fãa paam a paga, tɩ pag fãa paam a sɩda. 3Bɩ sɩdã kɩs pagã bũmb ning a sẽn tog n kis-a wã, la tɩ pagã me maan a woto ne a sɩdã. 4Pag ka tar noor ne a mengã yĩng ye, yaa a sɩdã n tar noor ne. Raoã me ka tar noor ne a mengã yĩng ye, yaa a pagã. 5Bɩ ned fãa ra mong a to, sã n ka tɩ y zemsa taab noore, wakat bilf yĩnga, tɩ y tõe n paam weer n pʋʋs Wẽnnaam. Rẽ sã n loog bɩ y leb n bao taaba, t'a Sʋtãan da wa n mak yãmba, y sẽn ka tõe y meng yĩng ye. 6Mam sẽn yet woto wã, ka tõog ye, yaa sore. 7Mam datẽ lame tɩ raopã fãa yɩẽ wa maam. La ned fãa deegda a kũun Wẽnnaam nengẽ, t'a zagl rẽnd ya woto, t'a zagl me rẽnd ya bũmb a to.
8Sã n yaa neb nins sẽn ka yi kãadmã, la pʋg‑kõapã, mam yet-b lame tɩ b sã n kell n pa wa mam sẽn yaa a soabã, yaa sõama. 9La b sã n ka tõe b mense, bɩ b kẽ kãadem. Bala, b sẽn na n kẽ kãadem n são b sẽn na n kẽnd tɩ yõogd‑ba.
10 #
Mat 5.32, 19.9, Mark 10.11,12, Luk 16.18 La neb nins sẽn kẽ kãadmã, mam yet-b lame (la ka maam n yet-b ye, yaa Zu-soabã) tɩ pag da yi n bas a sɩd ye. 11La a sã n yi n bas-a, bɩ a kell n zĩnd a yembre, wall a maneg a yell ne-a.
12La neb a taabã, m yet-b lame, ka Zu-soabã ye: D ba-biig sã n tar pag t'a ka tẽeda, n yaool n sak n na n zĩnd ne yẽnda, bɩ a ra rig-a ye. 13La pag sã n tar sɩd t'a ka tẽeda, n yaool n sak n na n zĩnd ne yẽnda, bɩ a da rig-a ye. 14Bala, pagã kɩtame t'a sɩdã sẽn ka tẽedã lebg nin-sõngo, la d ba-bi-raoogã me kɩtdame t'a pagã sẽn ka tẽedã lebg nin-sõngo. Sã n ka rẽ, yãmb kambã na n yɩɩ bõn-dẽgdo, tɩ b yaool n yaa nin-sõamyã. 15Sẽn ka tẽed-a wã sã n welge, bɩ a welge. Sã n yɩ a woto, bũmb ka loet ba-bi-raoogã bɩ ba-bi-poakã ne a to wã ye. Wẽnnaam boola tõnd tɩ d vɩɩmd laafɩ pʋgẽ. 16Sɩd me, paga, fo na n yɩɩ wãn n bãng f sã n na n fãaga f sɩda? Walla, sɩda, fo na n yɩɩ wãn n bãng f sã n na n fãaga f pagã? 17Sẽn be bala, bɩ ned fãa kẽn wa pʋɩɩr ning Wẽnnaam sẽn pʋɩ n kõ-a wã, la wa boolg ning a sẽn paam Wẽnnaam nengẽ wã. Yaa woto la mam yet wẽnd-dotã fãa pʋgẽ tɩ b maane. 18Wẽnnaam sẽn wa n bool yãmbã, sã n mikame tɩ y rag n yaa zũnga, bɩ y kell n yɩ zũnga. La sã n yaa tɩ y rag n yaa moaaga, bɩ y ra kɩt tɩ b kẽes-y bãong ye. 19Bãong kõom ka fɩ, la moonem me ka fɩ. Yaa Wẽnnaam noyã sakr la b geenda. 20Bɩ ned fãa kell n pa wa a sẽn dag n yaa to-to wakat ning a sẽn paam boolgã. 21Wẽnnaam sẽn wa n bool foomã, rẽ tɩ f yaa yamba? Da maan yɩɩr ye. La f sã n tõe n paam lohorem, da bas tɩ loog ye. 22Bala, yamb ning sẽn paam boolg Zu-soaba pʋgẽ, a lebga Zu-soaba burkĩna. Woto me, burkĩn ning b sẽn boolã yaa Kiris yamba. 23B lebs n daa yãmb toogo. Bɩ y da leb n lebg ninsaalb yembs ye. 24M ba-biisi, bɩ ned kam fãa kell n pa n sẽn dag n yaa to-to wakat ning b sẽn bool-a wã.
Pa-kuil-n-dãmbã yelle
25Sã n yaa ne pa-kuil-n-dãmba yelle, mam ka tar sẽn yit Zu-soabã nengẽ ye. Maam, ned Wẽnnaam sẽn kɩt t'a maand sɩd bãmb nimbãan-zoeerã yĩngã n wilgd m tagsgo. 26Yɛl nins sẽn be moasã wã yĩnga, ad bũmb ning mam sẽn tẽed tɩ yaa sõama: Yaa sõama tɩ rao kell n yɩ a woto. 27Fo tara paga? Da bao tɩ welg ne-a ye. Fo ka tar paga? Da bao pag ye. 28Fo sã n yi kãadem, kõn yɩ yel-wẽnd ye. Pa-kuil sã n yi kãadem, kõn yɩ yel-wẽnd ye. La nin-bãmb na n paama yel-pakre, mam yaool n baooda yãmb sõngre. 29M ba-biisi, (ad bũmb ning m sẽn yeta), mam yetame yaa: Weerã yaa koɛɛga. Sẽn sɩng ne moasã, bɩ neb nins sẽn tar pagbã yɩ wa neb sẽn ka tar pagba, 30tɩ neb nins sẽn yãbd yɩ wa neb sẽn ka yãbdã, tɩ neb nins sẽn maand sũ-noogã yɩ wa neb sẽn ka maand sũ-noog ye, tɩ neb nins sẽn daad yɩ wa neb sẽn ka tar ye. 31La tɩ neb nins sẽn zaeegd ne dũni wã yɩ wa b sẽn sɩd ka zaeegd ne-a ye. Bala, dũni‑kãnga sẽn yaa to-to wã loogdame. 32Mam yaool n datame tɩ yãmb yɩ neb sẽn ka maand yɩɩr ye. Ned ning sẽn ka yi-a kãadem, Zu-soabã yell n pak-a, a sẽn na n maan to-to n ta Zu-soabã yam. 33Sẽn yi-a kãadem, dũni yɛl yell n pak-a, a sẽn na n maan to-to n ta a pagã yam. 34La a pʋɩɩ zĩis a yiibu. Woto me pag sẽn ka tar sɩda, la pa-kuili, yaa Zu-soabã yell n pak-ba, tɩ b tõe n yɩ nin-sõamyã b yĩngã pʋgẽ la b sɩɩgã pʋgẽ me. Sẽn kuil-a sɩda, dũni yɛl n pak-a, a sẽn na n maan to-to n ta a sɩda yam.
35Mam sẽn gomd woto wã, yaa yãmb sõngr yĩnga. Ka tɩ bẽd yãmb ye, yaa sẽn na yɩl la yãmb maan sẽn zemse, n na n sõng-y tɩ y loe y meng ne Zu-soabã tɩ tak-tɩ-m-tak ka beẽ ye.
36Ned sã n tags t'a pa-kuil sã n yõsg sɩd wakat yaa yãnde, n dat n kuils-a, bɩ a maan a sẽn data. Rẽ ka yel-wẽnd ye. Bɩ d yi kãadem. 37La sẽn yas-a kãenkãe, n mi a sẽn dat tɩ modgr kaẽ, yẽnda sã n yãk yam a sũurẽ t'a na n basa a biig a yiri, soab‑kãng maana neere. 38Woto, sẽn kõ-a a biig sɩd maana neere, sẽn ka kõ-a a biig sɩd maan-neer n yɩɩda.
39Pag loee ne a sɩda, a sɩdã vɩɩm tɛka. La a sɩdã sã n ki, a tara noor tɩ leb n kuil ned ning a sẽn data, la sẽn be, tog n yɩɩ Zu-soabã pʋgẽ. 40La ne maam, mam yetame t'a sã n kell n pa a woto, a sũur na yɩ noog n yɩɩda. Mam me yaool n tẽedame tɩ m tara Wẽnnaam Sɩɩgã.
Maoong nemdo
Currently Selected:
1 Korẽnt‑rãmbã 7: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
