1 Kibayã 15

A Davɩɩd segend n na n toeema kaoolã koglgã zĩiga

1A Davɩɩd kɩtame tɩ b me rot a mengã yĩnga, a Davɩɩd tẽngã pʋga. Yẽnda kɩtame tɩ b maneg zĩig n ti fu-roog Wẽnnaam kaoolã koglgã yĩnga. 2#Tõ 10.8La a yeelame: «Yaa Leevi nebã bal n tog n tʋkd Wẽnnaam kaoolã koglgã, bala, yaa bãmb la Sẽn-Ka-Saab yãk yã, tɩ b na n tʋkd Wẽnnaam kaoolã koglgã la b get a yell wakat fãa.»

3Dẽ, a Davɩɩd tigma Israyɛll nebã fãa Zeruzalɛm, n na n kɩt tɩ b rɩk Sẽn-Ka-Saab kaoolã koglgã n kẽng zĩig ning yẽnda sẽn dag n segl a yĩngã. 4A Davɩɩd tigma a Aarõ kom-dibli wã ne Leevi nebã.

5A Kehat kom-dibli wã ne b naab a Uriyɛll la a saam-biisã yaa neb koabg la pisi.

6A Azaya kom-dibli wã ne b naab a Meraari la a saam-biisã yaa neb kobessi la pisi.

7A Gersom kom-dibli wã ne b naab a Zowɛll la a saam-biisã yaa neb koabg la pis-tã.

8A Elitsafã kom-dibli wã ne b naab a Semaya la a ba-biisã sõor yaa neb kobessi.

9A Ebrõ kom-dibli wã ne b naab a Eliyɛll la a ba-biisã sõor yaa neb pis-nii.

10A Uziyɛll kom-dibli wã ne b naab a Aminadaab la a ba-biisã sõor yaa neb koabg la piig la a yiibu.

11A Davɩɩd boola maan-kʋʋdb a Sadok ne a Abiyataare, n paas Leevi buudã neb a Uriyɛlle, a Aazaya, a Zowɛlle, a Semaya, a Eliyɛlle, ne a Aminadaabe, 12n yeel-b yaa: «Yãmb sẽn yaa Leevi buudã nanambsã, bɩ y yɩlg y mense, la y rɩk Sẽn-Ka-Saab sẽn yaa Israyɛll Wẽnnaamã kaoolã koglgã, n tall n kẽng zĩig ning mam sẽn segl a yĩngã. 13Yãmb sẽn dag n ka zĩnd kaanẽ pĩndã yĩnga, Sẽn-Ka-Saab sẽn yaa tõnd Wẽnnaamã sãama neb wʋsg tõnd sʋkã, tõnd sẽn ka rɩk kaoolã koglgã wa sẽn zems tõogã yĩnga.»

14Dẽ, maan-kʋʋdbã ne Leevi buudã yɩlga b mense, n na n tɩ rɩk Sẽn-Ka-Saab sẽn yaa Israyɛll Wẽnnaamã kaoolã koglgã. 15#Yik 25.14Leevi nebã palga Wẽnnaamã kaoolã koglgã b bãgdẽ ne ra-tuiidsi, wa sẽn zems Sẽn-Ka-Saab sẽn dag n wilg a Moyiis t'a yeelã.

16A Davɩɩd yeela Leevi buudã nanambsã, tɩ b kɩt tɩ b saam-biisã sẽn yaa yɩɩn-yɩɩndbã wa ne yʋʋm-teed sẽn yaa kʋla, pendse, la kɛma, n yɩɩl n kaas ne sũ-noogo. 17Dẽ, Leevi nebã yãka a Zowɛll biig a Eman, ne a saam-biig a Azaf sẽn yaa a Meraari kom-dibli wã sʋk ned a yembrã, la a Kusaya biig a Etan sẽn yaa a Meraari kom-dibli wã sʋk ned a yembre. 18Bãmb saam-biis nins sẽn yaa sull a yiibẽ soab n dag n sõngd bãmbã yaa a Zakari, a Bɛn, a Yahaziyɛlle, a Semiramote, a Yekiyɛlle, a Uni, a Eliyaabe, a Benaya, a Maseya, a Matitiya, a Eliflewu, a Mikneya, a Obɛɛd-Edom, n paas a Yeyiyɛlle. Nin-bãmb n dag n yaa rigno-gũudbã. 19Yɩɩn-yɩɩndb a Eman ne a Azaf la a Etan dag n wẽeda zũud kɛma. 20A Zakari, a Aziyɛlle, a Semiramote, a Yekiyɛlle, a Uni, a Eliyaabe, la a Maaseya ne a Benaya rag n wẽeda kʋl sẽn tar bi-yãanse.

21A Matitiya ne a Eliflewu la a Mikneya ne a Obɛɛd-Edom la a Yeyiyɛll ne a Azaziya rag n wẽeda pends sẽn tar bi-raase.

22Leevi buudã ned a Kenaniya n dag n yaa koglgã tʋkdb taoor soaba. Bala, a rag n mi a tʋʋmde. 23A Berekɩya ne a Ɛlkana n dag n gũud koglgã.

24Maan-kʋʋdb a Sebaniya, a Zozafate, a Netaneyɛlle, a Amasayi, a Zakari, la a Benaya ne Eliyezɛɛre, n dag n peebd tãntãadã Wẽnnaam kaoolã koglgã taoore. A Obɛɛd-Edom ne a Yehiya n dag n gũud kaoolã koglgã.

B talla kaoolã koglgã n kẽng Zeruzalɛm

(2Sãm 6.12-23)

25Dẽ poore, a Davɩɩd ne Israyɛll kãsem-dãmbã la tãb-biis nanambsã rɩka sor n na n kẽng a Obɛɛd-Edom zakẽ wã, n tɩ rɩk Sẽn-Ka-Saab kaoolã koglgã ne sũ-noogo. 26Wẽnnaam sõnga Leevi nebã tɩ b tɩ rɩk Sẽn-Ka-Saab kaoolã koglgã n tall n wa. Dẽ, bãmb kʋʋ lols a yopoe ne pe-ribli a yopoe n maan maoongo.

27A Davɩɩd dag n yera fuug sẽn wʋg ne gĩs-bãanega. La Leevi buudã neb nins fãa sẽn dag n tʋkd koglgã, ne yɩɩn-yɩɩndbã, la a Kenaniya sẽn yaa koglgã tʋkdb taoor soabã, nin-bãmb fãa me rag n yera fut sẽn wʋg ne gĩs-bãanega. La a Davɩɩd dag n yeelga maan-kʋʋr fuug sẽn wʋg ne gĩs-bãaneg n paase. 28Dẽ, Israyɛll nebã fãa rɩka Sẽn-Ka-Saab kaoolã koglgã la b yɩɩnd n kaasdẽ, la b wẽed nug-poaka, n peebd tãntãado, la b wẽed kɛma, ne kʋl la pendse.

29Wakat ning Sẽn-Ka-Saab kaoolã koglgã sẽn wa n kẽed a Davɩɩd tẽngã pʋgã, a Sayull bi-pugl a Mikall lɩka roog võorẽ n yãnd a Davɩɩd sẽn saood la a kɩdemdẽ. La yẽnda paooga a Davɩɩd a sũurẽ.

Currently Selected:

1 Kibayã 15: MPBU

Highlight

Copy

Compare