1 Kibayã 14
14
A Davɩɩd bee Zeruzalɛm
(2Sãm 5.11-16)
1Tɩɩr dĩm a Hiram tʋma neb a Davɩɩd nengẽ ne sɛɛdr daado, la a kɩt tɩ tãn-metb ne ra-wãadb kẽng n tɩ me zak n kõ a Davɩɩde. 2Woto, a Davɩɩd bãngame tɩ yaa Sẽn-Ka-Saab n yãk yẽnda n kɩt t'a lebg Israyɛll dĩma, la a rĩungã rag n paamda pãng n paasdẽ, Israyɛll sẽn yaa bãmb nebã maasem yĩnga.
3A Davɩɩd dɩka pagb a taab Zeruzalɛm, la b roga kom-dibli ne kom-pugli a taab n kõ-a. 4Kamb nins a Davɩɩd sẽn dog Zeruzalɛmã yʋy la woto: yaa a Simeya ne a Sobaabe, la a Natã ne a Salmo, 5A Yibaare, a Elisuwa, a Ɛlpelɛte, 6a Noga, a Nefɛɛge, a Yafiya, 7a Elisama, a Beeliyada, ne a Elifelɛte.
A Davɩɩd tõoga Filistẽ-dãmbã
(2Sãm 5.17-25)
8Filistẽ-dãmbã sẽn wʋm tɩ b pʋdga a Davɩɩd zug rĩung kaam t'a lebg Israyɛll soolmã fãa rĩmã, bãmb fãa kẽngame n tɩ baood-a n na n yõke. La a Davɩɩd bãngame n na n yi n seg bãmba. 9Filistẽ-dãmbã kẽng n tɩ sũu tãp Refayim longẽ wã. 10Dẽ, a Davɩɩd soka Wẽnnaam yaa: «Mam tog n kẽngame n tɩ zab ne Filistẽ-dãmbã bɩ? Yãmb na n kɩtame tɩ mam tõog Filistẽ nebã bɩ?» La Sẽn-Ka-Saab leoka yẽnda yaa: «Kẽng tɩ m na n kɩtame tɩ f tõog-ba.»
11Dẽ, Filistẽ-dãmbã kẽng n tɩ zaba ne a Davɩɩd nebã Baall-Peratsim, la a Davɩɩd tõoga bãmba. A Davɩɩd yeelame: Sẽn-Ka-Saab maana sor tɩ mam wẽdg m bɛɛbã n looge, wa koom sẽn kaoog bɛoongo. Yaa rẽ yĩng tɩ b boond zĩ-kãng tɩ Baall-Peratsim, sẽn dat n togs tɩ bɛoongã soaba. 12La Filistẽ-dãmbã zoeeme n bas b wẽn-naandsã beenẽ. La a Davɩɩd kɩtame tɩ b wʋk wẽn-naandsã n yõog bugum. 13Dẽ poore, Filistẽ-dãmbã leb n kẽng n tɩ sũu tãp longẽ wã. 14La a Davɩɩd leb n soka Wẽnnaam, la Wẽnnaam yeela yẽnda yaa: «Ra kẽng n tɩ seg-b ye. Gilg b poorẽ wã, n tɩ paam-b tɩɩsã neng taoore.» 15Fo sã n wa wʋm bʋrg sẽn yit tɩɩsã zut sẽn wẽnd neb sẽn kẽnd rãamde, bɩ f sɩng zabrã tɩ yaa Wẽnnaam n lʋɩt fo taoor n na n sõng foom n zab ne Filistẽ-dãmbã. 16Dẽ, a Davɩɩd maana wa Wẽnnaam sẽn yeel yẽnda wã. Yẽnda zaba ne Filistẽ-dãmbã, sẽn sɩng ne Gabawõ hal n tãag Gezɛɛre. 17A Davɩɩd yʋʋrã yii tẽmsã fãa pʋgẽ. La Wẽnnaam kɩtame tɩ buudã fãa zoe bãmb dabeem.
Currently Selected:
1 Kibayã 14: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
