Sakari 8
8
O Diedo niani o niba li guoli leni mi yanduanma
1Li Miali Diedo U Paalu Kuli Daano den maadi leni nni, ki yedi yaa maama n tie ne: 2«Mini Li Miali Diedo U Paaciamu Kuli Daano, n bua Siyon yaaba hali boncianla. N bua ba leni n pali kuli. 3N baa lebidi ki guani Siyon, ki yaa ye Jerusalemi yaaba siiga. Bi niba baa yaa yi Jerusalemi dogu: “Yaa dogu yaaba n bua U Tienu, ki tuo ki ŋua o.” Bi baa yaa yi Li Miali Diedo U Paaciamu Kuli Daano juali mo: “Mi gagidiŋanma juali.”»
4Li Miali Diedo U Paaciamu Kuli Daano yedi:
«Yaa jakpela leni yaa puociana n podi
Hali ki ñiigi i gbiami,
Kelima bi binciama po,
Go baa yaa ka Jerusalemi nitaankaani nni.
5U dogu sani go baa gbie a bonjala leni a bonpola
Ke bi tiini ki jeli.
6Isidayeli yaaba, yaaba n sieni,
Nua ke laa bonla kan tuo ki tieni.
Ama naani mini Li Miali Diedo,
U Paaciamu Kuli Daano moko
Baa nuali la ke li tie yaala n kan tuo ki tieni?
7N baa faabi n niba yaaba n ye ti yonbidi,
Puoli leni nintuali diema nni.
8N baa ñani ba lipo,
Ban kpeni ki kali Jerusalemi.
Bi baa yaa tie n niba,
Nmo baa yaa tie bi Tienu,
N baa yaa die ba,
Ki gobidi ba i moamoani leni mi teginma nni.»
9Li Miali Diedo U Paalu Kuli Daano
N yedi yaa maama n tie ne:
«Paagi mani yi pala,
Yinba yaaba n gba u naa yogunu,
N saawalipuaba n den waani yaa ñoaniani,
Ban den puu li tanpuuli,
Ki baa guani ki maa n Diegu yaa yogunu.
10Hali ke laa dana daa cua,
Bi niba leni ti yandi tuonli
Ki den baadi panpaani,
Nilo kan den fii ki gedi kaanu ki go guani,
Kaa baa kadi leni yibalinba,
Kelima n den teni ke bi niba
Koani bi ŋmiali nni.
11Ama moala, n kan go tieni n niba
Yaaba n ciadi yeni laa bonla,
Nani min den tiendi ba maama hali yogu.
Mini Li Miali Diedo U Paalu Kuli Daano n yedi yeni.
12N baa teni mi yanduanma n tieni ki tinga po:
Duven tiidi baa luoni,
Ki tinga baa teni ti kpaandi n tieni,
Ki taaga baa mi boncianla.
N baa pa laa bonla kuli n niba yaaba n sieni.
13Yinba Juda leni Isidayeli diema yaaba,
Nani yaala n den baa yi n den tua
Solindi makpanjama i nilanbuoli siiga maama,
N go baa faabi yi, ki teni yin tua
Li seli makpanjama bi siiga yene.
Yin da go jie mani, paagi mani yi pala!»
14Li Miali Diedo U Paalu Kuli Daano
Yedi yaa maama n tie ne:
«Nani yi yaajanba n den fiini n pali
Ke n jagi ke n baa waani ba fala,
Kaa lebidi n yanjagili maama,
15N go jagi ke n baa tieni
Yinba Jerusalemi yaaba leni Juda diema
Yaaba kuli po yaala n ŋani yene.
Yin da go jie mani!
16Yin baa yaa tiendi yaala tie line:
Yuakuli n yaa maadi o lielo i moamoani.
Yi bujiakaani kani, yin yaa ja yaa buudi n tiegi
Ki kpendinni mi yanduanma. #Efe 4.25.
17Yin da kpaagi yiyaba po yaala n bia.
Yin da pua mi faama ki polini,
Kelima laa tuona kuli tie mini
O Diedo n nani yaala.»
Mi ñoalolima dana baa tua jaanma dana
18Li Miali Diedo U Paalu Kuli Daano den waani nni yaa maama n tie ne: 19«Yi luo bu ñoabu Cinaa, cimuu, cilele leni cipiiga. Moala, laa ŋmaali baa tua yinba Juda yaaba po jaancianma, yaama n pia yi po li pamancianli. Ama yin yaa bua i moamoani leni mi yanduanma.»
20Li Miali Diedo U Paaciamu Kuli Daano yedi:
«I nilanbuoli, i dogi boncianla niba
Baa tigibi Jerusalemi.
21Dogu niba baa cua ki yedi dotogu yaa niba:
‹Ti caa ki baa n kpiagi Li Miali Diedo U Paaciamu Kuli Daano,
Ki mia o seli yo.
Cua mani tin gedi!›
Laa niba baa guani ki yedi ba:
‹Timoko baa yegi leni yi.›
22I nibuoli boncianla leni
Yaa nilanbuoli n pia u paalu
Baa cua Jerusalemi ki bua ki kpiagi nni,
Ki go jaandi ki mia n seli.
23Lanyogunu, nilanba piiga,
Yaaba n ki taa mabuolu
Baa taani ki muubi Jufiyendo liadili
Ki yedi o: ‹Ti bua ki yegi leni a ki gedi,
Kelima ti gbadi ke U Tienu ye leni yi.› »
Mini Li Miali Diedo n yedi yeni.
Currently Selected:
Sakari 8: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
