Sakari 7

Yaa ñoalolima n tiadi Jerusalemi bodima

1O bado Dariyusi bali binnaali, o Diedo den maadi leni nni. Li den tie ciyia ban yi yaa ŋmaalo Kisile danaali. 2Beteli yaaba den soani Saletiseli leni Legemi-Meleki leni nitoaba ke ban gedi o Diedo diegu nni, ki ban jaandi ki mia o Diedo seli 3ki go buali Li Miali Diedo diegu kopadicianba leni bi saawalipuaba yaa buali n tie ne: «Naani cimuu ŋmaalo yaa ñani, ti go yen baa mua, ki go loli bu ñoabu, nani tin den tiendi maama hali yogu?»

4Li Miali Diedo U Paalu Kuli Daano den maadi leni nni, ki yedi 5ke min waani mi diema niba kuli leni bi kopadicianba yaa maama n tie ne: «Yi den luo bu ñoabu ki go buudi cimuu leni cilele ŋmaali nni, hali bina piilele. Ama naani, moamoani, yi den luo laa ñoalolima mini yaa po yo? 6Yin den di ki go ñu yeni, laa den tie yi yula po ka?» 7Naani mii den kpa soani n saawalipuaba hali yogu, ke bi waani laa maama ka? Laa yogunu, Jerusalemi dogu leni u dobila da den kaa leni mi yanduanma, ke nuganu po diema leni Sefela mo da pia bi niba.

8O Diedo den maadi leni nni ki yedi yaa maama n tie ne: 9«Mini Li Miali Diedo U Paalu Kuli Daano den yedi: ‹Yaa ja mani ti buudi leni mi teginma, ki go yaa pia yiyaba po mi ŋanma leni mi ninñingbadima. 10Yin da mabindi a kpepuona, a kpienbila, bi canba leni a tadima. Yin da kpaagi yiyaba po yaala n bia.› 11Ama bi niba den yie kaa cengi. Bi buli bi nunmu, ki biini bi tuba kaa bua ki gbadi. 12Bi den juagi bi pala nani diama tanli yeni. Baa den cengi mini Li Miali Diedo U Paalu Kuli Daano bali maama leni min den kpa soani n saawalipuaba ke bi maadi n maama yaama leni n Fuoma. Lani, n pali den fii boncianla, 13ke n yedi: ‹Min den yini ba ke baa tuo yeni, n moko yie kaa guani ba, ban den yi nni ke mia nni mi todima yaa yogunu. 14N den teni ke bi yadi ba ban kaa den bani yaa nilanba siiga. Ban den gedi ki ŋaa mi diema, mi den tua diegbena, nilo n kaa go den tagi naani. Laa dieŋanma den tua fanpienma ke nilo ki go ye mi niinni.› »

Currently Selected:

Sakari 7: BGP

Highlight

Copy

Compare