Loma 4
4
Abalahama dandanli maama fuuli
1Ti baa yedi lede Abalahama po, wani yua n tie ti yaaja ti gbanandi nni? O den baa be ti gbanandi po? 2Li yaa tie ke o den baa li moamoansaali kelima o tuona po, o den baa fidi ki kpiagi o yuli. Ama o kan kpiagi o yuli U Tienu kani. 3Lani yaa po, i Diani mo yedi lede? Li yedi: «Abalahama den daani U Tienu ke U Tienu den coadi o po la ke li tie teginma.» #Cil 15.6; Gal 3.6. 4Yua n soani li tuonli kuli baa baa o panpaani. O kan yaa nua ke o panpaani yeni tie paabu, yi tie pani yo. 5Ama, yua n ki soani tuona, ki nan daani U Tienu yua n saagi i moamoani ti tuonbiadi daano po, U Tienu baa coadi o po o dandanli yeni, ke li tie teginme. 6Yeni moko, Davidi doagidi yaa pamanli n ye leni U Tienu n coadi yaaba yaa teginma, ke laa ŋoadi a tuona po, ki yedi:
7Li pamanli ye leni yaaba
N baa sugili bi biadima po,
Leni U Tienu n piini yaaba yaa tuonbiadi.#Ps 32.1-2.
8Li pamanli ye leni o Diedo n kan go tiadi
Yaa nilo tuonbiadi po.
9Naani laa pamanli baa yaa ye yaaba n kua ku koanciagu bebe yaa po, bi li baa yaa ye yaaba n ki kua moko yaa po yo? Ti yedi moala ne: «Abalahama den daani U Tienu, ke wani U Tienu den coadi o po la ke li tie teginma.»#4.9 Ŋan lebidi ki guani puoli po ki diidi 4.3. 10Abalahama den tie lede, U Tienu n den coadi o po la yaa yogunu? O den kua ku koanciagu, bi o daa den kua? O daa den kua. 11O den baa ku koanciagu ke lan tua mi maalima ke o baa li moamoansaali, kelima o dandanli yaa po. Li yogunu sua ke o da tie jifolo yo. Lanwani, Abalahama tie yaaba n daani kuli yaa baa, ba ke bi tie jifola, ke U Tienu n coadi bani moko yaa po bi teginma. #Cil 17.10. 12O go tie a junga moko yaa baa, bani yaaba n ki sedi leni ku koanciagu bebe ka, ama bimoko ŋua Abalahama dandanli fuuli, hali ke o daa kua koanciagu.
Abalahama den baa u ñoanianu kelima li dandanli po
13Li naa tie kelima li bali maama kubima po ka ke U Tienu den niani Abalahama leni o buolu kuli, ke o baa teni ban diedi ŋanduna. Ama li tie wan den baa yaa moamoansaali, kelima li dandanli yaa po. #Cil 17.4-6; 22.17-18; Gal 3.29. 14Li yaa tie li bali maama kubili yaa po yo ke bi tua bi faajieba, lanwani li dandanli tie fanma, U Tienu ñoanianu mo naa pia mayuli. #Gal 3.18. 15U Tienu bali maama baa cuani U Tienu pabienli cuonu. Li bali maama yàá ye, li bali maama miidima moko ki ye.
16Lanwani, yaaba n baa baa U Tienu n den niani yaa ñoanianu baa baa u, kelima li dandanli yaa po. U Tienu bua ban baa u ñoanianu kelima o ŋanbili paabu po bebe. O bili ke o ñoanianu baa yaa ye Abalahama puoliŋuani kuli po. Laa tie yaaba n pia li bali maama bebe yaa po ka, ama yaaba n daani U Tienu nani Abalahama n den daani maama. Wani Abalahama tie tikuli yaaja. Nani lan diani maama: #Gal 3.7. 17«N teni ke a tua nibuoli boncianla baa.» U Tienu, Abalahama n den daani yua yeni, nua wani Abalahama yua n tie tikuli baa, wani U Tienu yua n teni ke bi tinkpiba go ye ki fo, ki go teni ke yaa bonla n ki ye n tua yaala n ye. #Cil 17.5. 18Abalahama den daani U Tienu ki pia mi suginma, ba ke o dugidi naa go den pia tin baa fidi ki sedi naani. Lani yaa po, o den tua i nibuoli boncianla baa, nani U Tienu n den maadi o maama ki yedi: «A puoliŋuani baa yaa yabi yene.»#4.18 Diidi Mi Cilima 15.5, li yedi likani ke Abalahama puoliŋuani coali baa yaa yabi nani a ŋmabila yeni. 19Abalahama den bua ki pundi bina kobiga, ama o dandanli ki den tadigi, ba ke o laa ke o gbanandi tie nani ti kpe yeni, ke Sala mo pendi ti madi. #Cil 17.17. 20Ba yeni, o yama ki den lengidi ke o luo li dandanli U Tienu po, ki nua ke o kan kuani wan den niani yaa ñoanianu. Ama o dandanli den paagi o, ke o kpiagi U Tienu. 21O den daani ki go bani cain ke U Tienu n niani yaala, o go pia li fidu ki baa kuani o ñoanianu. 22Lani yaa po, U Tienu den coadi la o po ke li tie teginma.
23Laa tie Abalahama bebe yaa po ka ke li diani: «U Tienu den coadi o po la.» 24Ama li diani tinba yaa po moko, U Tienu n baa coadi yaaba yaa po ke li tie teginma, tinba yaaba n daani U Tienu, wani yua n den fiini ti Diedo Jesu bi tinkpiba siiga. 25Bi den cuo o kelima ti yaa tagili po, ke o go fii bi tinkpiba siiga ke tin baa li moamoansaali.#Esa 53.4-5.
Currently Selected:
Loma 4: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
