Loma 15

Yin da lingi yi yucela ŋamu bebe

1Li pundi ke tinba yaaba n pa U Tienu sanŋoadima nni, n juuni leni yaaba n tadi lienni, ki yaa todi ba bi tadingu nni, ki da lingi yaala n mani tinba bebe yaa po. 2Li pundi ke ti siiga yendo yendo kuli, n yaa tiendi yaala n baa yaa mani o lielo po, ki tiendi o po yaala n baa todi o, wan suagi liiga U Tienu sanŋoadima nni. 3Kilisiti naa den lingi yaala n mani o, ama nani lan diani maama: «Ban den sugidi a yaa sugidi baa n yaa yuli po.» #Ps 69.10. 4Yaala n den kpa diani kuli den diani ke lan bangi ti, ke i Diani n puuni yaa juunli leni yaa baagi po, tin fidi ki baa mi suginma.

5U Tienu yua puuni li juunli leni li papaali, n teni yin yaa pia yantiayenli leni yiyaba, nani Jesu Kilisiti n bua maama. 6Lani n tie yin taani yanyenma leni ñoayenbu, ki yaa kpiagidi ti Diedo Jesu Kilisiti Tienu leni o Baa.

O Laabaaliŋamo tie i nibuoli kuli po

7Yin yaa gaani yiyaba cangu, nani Kilisiti n den gaa yi yaa cangu maama U Tienu yaa kpiagidi po. 8N waani yi ke Kilisiti den tua Isidayeli buolu#15.8 Isidayeli buolu: Gireki maama yedi: «Yaaba n kua ku koanciagu.» naacemo, ki baa doagidi ke U Tienu tie dugika, ki teni ban baa U Tienu n den niani bi yaajanba yaa ñoanianu, 9ki go teni ke bi nilanba moko n kpiagi U Tienu o ninñingbadima po. Nani lan diani maama:

«Lani yaa po, n baa pagi a

I nilanbuoli siiga,

N baa yiini ki kpiagi a yeli.» #2Sam 22.50; Ps 18.50.

10Li go diani:

«Yinba i nilanbuoli kuli,

Taani mani leni o buolu,

Ki yaa mangidi yi pala.» #Tia 32.43.

11Li go diani:

«Pagi mani o Diedo,

Yinba i nilanbuoli kuli,

Kpiagi o mani, yinba i nibuoli kuli.» #Ps 117.1.

12 Esayi moko yedi:

«Li benkpeli baa pudi Isayi#15.12 Isayi: Yeni de! N tie o badiciamo Davidi baa. Go diidi Esayi 11.1,10. jiinu nni,

Yua n baa fii ki diedi i nibuoli kuli.

I nibuoli baa bili bi suginma o yaa kani.»

13Mi suginma Tienu n gbieni yi pala leni li pamanli leni mi yanduanma li dandanli nni. U Tienu Fuoma Yua paalu n teni yin yaa pia mi suginma ki pugidi pugidi.

Mi majuodikaama leni i fuondi

15.14—16.27

Poli tuonli bi nilanba siiga

14N kpiiba, n bani ke yi pala gbie leni li ŋanbili, ke yi bani cain yin baa yaa tiendi yaala kuli, ki go baa fidi ki tundi yiyaba. 15Ba yeni, n diani yi po bonyenla yenla leni li papaali, ki bua ki tiadi yi yin bani yaala, kelima U Tienu n puni nni yaa ŋanbili po, 16ki teni ke n tua Jesu Kilisiti naacemo bi nilanba siiga. N tuuni yaa tuonli n gagidi ki wangi ba U Tienu Laabaaliŋamo. Lani n tie ke bani bi nilanba n tua nani U Tienu n baa tuo yaa padili ke li mani o, U Tienu Fuoma Yua n gagidi yaali wani U Tienu po.

17Lanwani, n baa fidi ki kpiagi n yuli Jesu Kilisiti nni, kelima n tuuni U Tienu po. 18Mii pia papaali ki maadi matoama kuli, kali Kilisiti n den taa nni, ke min yaa gobidi bi nilanba ban tuo ki ŋoadi U Tienu, kelima n maama leni n tuona po. 19N den baa U Tienu Fuoma paalu, ki tieni bi siiga sinankeeninba leni mi bancianma. N den cili ki wangi Kilisiti Laabaaliŋamo Jerusalemi, ki yuandi ki wangi o i kaani kuli, hali ki ban gaani ki pundi Iliri diema. 20N den bua ki tieni bonyenla, lani n tie ki yaa wangi Kilisiti Laabaaliŋamo yaaba n daa kpa gbadi o, ke min da ŋuani nitoa tanpuuli po, nani lan diani maama:

21«Ban ki den kpa waani yaaba

O maama fuuli, bani n baa le,

Bani yaaba n ki den kpa gbadi o maama,

Baa bandi ma.» #Esa 52.15.

Poli jagi ke o baa gedi Loma

22Lani n tie yaala n den lindi ki yiedi n po ke n daa cua yi kani. #Lom 1.13. 23Moala n soani n tuonli ki gbeni yaa dogi n lindi na kuli. Li pundi bina boncianla, ke n den bua ki cua yi kani. 24Lani yaa po, n sugini ke n yaa caa Esipañi diema, min tagi ki fuondi yi. N yaa mangi n pali leni yi danaba, n baa yaa sugini yin todi nni, min gedi lipo.

25Moala, n da baa fii ki gedi Jerusalemi bi nigagidiŋanba todima po. #1Kor 16.1-4. 26Kilisiti Nitaanli, yaali n ye Maseduani leni Akayi diema nni kuli, den sua ke li ŋani, ke ban taani mi todima, ki soani bi nigagidiŋanba siiga yaaba n tie luoda yo, ki ye Jerusalemi. 27Bi den tieni yeni bi yama po, li pundi ban tieni yeni moko. Bani bi nilanba yaa den taani leni Jufinba ki boagidi U Tienu seli, li pundi bi nilanba n boagidi bi yema bonbaakaala leni Jufinba. #1Kor 9.11. 28N yaa caa ba laa tondu, ki teni ba ban taani bi po yaa paabu ki dudi, n baa tagi yi kani ki gedi Esipañi diema nni. 29N bani ke n yaa cua yi kani, n baa gbie leni Kilisiti seli.

30N kpiiba, n mia yi kelima ti Diedo Jesu Kilisiti yaa po leni U Tienu Fuoma buama po, ke yin taani leni nni min moa yaa muali nni, ki yaa jaandi U Tienu ki miadi o n po leni li yankuali. 31Lani n tie min faabi leni yaaba n ye Jude diema po ki naa tuo ki daani. N go mia yi yin yaa miadi ke min baa gedini yaa todima Jerusalemi po, n mangi bi nigagidiŋanba pala lipo. 32Lanwani, U Tienu yaa bua, n baa pundi yi kani leni li pamanli ki go baa ki fuodi yi siiga waamu. 33Mi yanduanma Tienu n yaa ye leni yikuli. Amina!

Currently Selected:

Loma 15: BGP

Highlight

Compare

Copy