Loma 16
16
I fuondi
1N bua ki waani yi ke ti kpiilo Febe, Kilisiti Nitaanli Sankile dogu nni todika, tie yin baa fidi ki dugi yua yaa po. 2Yin gaa o cangu o Diedo nni, nani lan pundi bi nigagidiŋanba n yaa tiendi maama, ki todi o, wan bua yi todima yaala kuli nni. Wani o ba todi niba boncianla, ba leni mini moko.
3Yin fuondi Prisili leni Akilasi, yaaba n tie n tuonsoanlieba Jesu Kilisiti tuonli nni. #JTT 18.2. 4Bi den luni bi yula ki gaa n miali. Laa tie mini bebe n tuondi ba li po. Kilisiti Nitaana bi nilanba siiga kuli tuondi ba li po. 5Yin fuondi Kilisiti Nitaanli yaali n taagi bi diegu nni. Yin fuondi n buado Epayineti, yua n den kpa daani Jesu Asi diema nni, ki tie wani Kilisiti bonluonkakpiala likani. 6Yin fuondi Mariyama, yua n den soani ki todi yi boncianla. 7Yin fuondi n kpiiba Andronikusi leni Juniasi, mini leni yaaba n den taani ki ye li kpaadidieli nni. Jesu tondiba siiga, bi tie ban jigindi yaaba boncianla. Bi den daani Kilisiti hali ke mini daa daani o.
8Yin fuondi Anpiliatusi wani yua n tie n buado o Diedo nni. 9Yin fuondi Uriben, ti tuonsoanlielo Kilisiti nni leni n buado Sitakisi. 10Yin fuondi Apelesi, wani yua n doagidi ki se Kilisiti nni ke li pa. Yin fuondi Arisitobuli deni yaaba. 11Yin fuondi n kpiilo Herodion. Yin fuondi Narsisi deni yaaba, yaaba n tie o Diedo yaaba. 12Yin fuondi Tirifeni leni Tirifosi, yaa puoba n tuuni o Diedo tuonli boncianla. Yin fuondi Persidi n danlimoano, yua n soani o Diedo tuonli hali boncianla. 13Yin fuondi Rufusi o Diedo n gandi yua leni o naa yua n tie nmoko yaa naa. #Mrk 15.21. 14Yin fuondi Asinkiliti, Filegon, Hermesi, Patilobasi, Hermasi leni ti kpiiba yaaba n ye leni ba. 15Yin fuondi Filologi, Julia, Nere leni o naataanpuoga Olinpa leni yaa nigagidiŋanba n ye leni ba kuli.
16Yin fuondi yiyaba ki gobini yiyaba leni mi buamoanma. Kilisiti Nitaana kuli fuondi yi.
I tundijuodike
17N kpiiba, n tundi yi, ke yin fangi yi yula leni yaaba n fiindi mi paadima, ki go tie tingbali bonla yi siiga, ki naa ŋua yin den baa yaa bangima. Yin foagidi leni ba. 18Laa nibuolu naa tuuni ti Diedo Kilisiti po ka, bi tuuni bi tugidi po yo. Bi maadi mi madingima leni mi mamanma, ki boandi yaaba n ki fani. 19Ama yinba wani, bi niba kuli bandi yi tuoma. Lani yaa po, n mangi n pali yi po. N bua yin yaa fani yaala n ŋani tienma po, ki da pia tagiliba kuli yaala n bia yaa tienma nni. 20Li kan waagi ke mi yanduanma Tienu baa paadi Sutaani, ki midi o yi taana tiipo.
Ti Diedo Jesu yaa ŋanbili n yaa ye leni yi.
21N tuonsoanlielo Timote fuondi yi. N kpiiba Lusiwusi, Jason leni Sosipateeri moko fuondi yi. #JTT 16.1.
22Mini Tertiyusi yua n diani li naa tili#16.22 Tertiyusi yeni n den tie Poli tidianlo. o Diedo nni, nmo fuondi yi.
23Min cani yua, Gayusi, Kilisiti Nitaanli n taagi yua yaa diegu nni, fuondi yi. Erasiti, yua n tie u naa dogu ligikubilo fuondi yi, wani leni ti kpiilo Kalitusi kuli. #JTT 19.29; 1Kor 1.14; 2Tim 4.20.
[ 24Ti Diedo Jesu Kilisiti ŋanbili n yaa ye leni yikuli. Amina!]
Ti pagijuodikaadi
25Tin yaa kpiagidi U Tienu, wani yua n baa fidi ki teni yin yaa se ke li pa o sanŋoadima nni, nani min wangi yaa Laabaaliŋamo, ki doagidi Jesu Kilisiti, n yedi maama. N wangi o nani U Tienu bondoaginkaala, yaala n den duagi ŋasiili nni hali yogu. Laa bondoaginkaala doagidi moala. 26U Tienu yua n ye yogunu kuli ñani o ñoamabonli, ki yedi ke o bondoaginkaala n doagidi i nibuoli kuli po, kelima o saawalipuaba n diani yaa tila po. U Tienu tieni yeni ki bua ke i nibuoli kuli n tuo li dandanli. 27Jesu Kilisiti po, tin yaa kpiagidi U Tienu, kelima wani bebe n pia mi yanfuoma kuli. Tin yaa kpiagidi o hali yaa yogu n tuu yaa yogu. Amina!
Currently Selected:
Loma 16: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
