Loma 14
14
Yin da ja yi lieba buudi
1Yaa gaani mani yua n tadi li dandanli nni cangu, ki da nia leni o wan tama yaala po. #Kol 2.16. 2One tama ke o pia u sanu ki yaa di lan tie yaala kuli. One mo, yua n tadi li dandanli nni, cedi ti nandi ki ŋmani ti kpinfaadi bebe.#14.2 Li fidi ke li tie yaaba yaa pala siedi n den yie bi po ban da ŋmani nandi, kelima bi den yabi ki padi likuli i buli po. 3Lanwani, yua n tama ke o fidi ki je li bonla kuli, n da fali yua n kaa di jetianma. Yua n kaa di jetianma mo, n da jia yua n daani ke o baa fidi ki je li bonla kuli yeni buudi, kelima U Tienu tuo ki gaa omoko yaa cangu. 4A tie ŋme, fini yua n ja nitoa naacemo buudi? O yaa se bonŋanla leni o yaa baa, li tie o canbaa maame. Ama o baa yaa se, kelima o Diedo pia u paalu, ki baa teni wan yaa se.
5One nua ke daaliba gagidi ki cie liyali, one mo nua ke a dana kuli tie yenma. Nilo kuli n kpaagi ki bandi cain wan daani yaala. 6Yua n sua ke daaliba gagidi ki cie liyali, tieni yeni ki baa kpiagi o Diedo. Yua n di lan tie yaa jiema kuli, di ki baa kpiagi o Diedo, kelima o tuondi U Tienu o jiema po. Yua n kaa di jetianma moko tieni yeni, ki baa kpiagi o Diedo ki tuondi U Tienu. 7Ti siiga, oba kuli ki ye o yuceli po, yua kpe mo ki kpe o yuceli po, 8kelima ti yaa ye, ti ye o Diedo po, ti yaa kpe mo, ti kpe o Diedo po. Lanwani, ti yaa ye leni ti yaa kpe kuli, ti tie o Diedo yaaba. 9Kilisiti den kpe ki go faadi ki ye, ki baa yaa die yaaba n ye leni yaaba n kpe kuli. 10Lanwani, fini, be yaa po ke a ja a kpiilo buudi? Be yaa po ke a fali a kpiilo yeni? Tikuli baa sedi U Tienu bujiali kaanu kani, #2Kor 5.10. 11kelima li diani:
«O Diedo yedi: ‹N ye ki fo,
Dunli kuli baa gbaani n nintuali,
Lanbu kuli baa kpiagi U Tienu.› » #Esa 45.23.
12Lanwani, ti siiga yuakuli baa togidi U Tienu wan den tieni yaala kuli.
Da tua tingbali bonla a kpiilo po
13Lanwani, tin cedi ki da ja ti lieba buudi. Ama yin jagi mani ki bili ke yi kan tieni yaala n baa tua yi kpiilo po, tantuudikaali bi tingbali bonla. 14N daani ki go bani cain o Diedo Jesu nni, ke liba kuli ki joagini li yuli po. Ama o nilo yaa nua ke bonliba joagini, li joagini laa nilo yaa po. 15Ŋan di yaa jiema yaa yagini a kpiilo yama, ŋaa go cuoni leni mi buama. Da tuo ke ŋan di yaa jiema n teni a kpiilo, Kilisiti n kpe yua yaa po, n bodi. 16Da tuo mani ke yaala n ŋani yi po n pa bi niba u sanu, ban sugi la. 17U Tienu diema naa tie mi jiema leni li bonñokaala bebe ka. Ama, mi teginma, mi yanduanma leni li pamanli, U Tienu Fuoma Yua n teni ke ti pia yaala. 18Yua n tuuni Kilisiti po yeni, U Tienu pali baa yaa mani leni o, bi nisaaliba mo baa saa o po i moamoani.
19Lanwani, tin moandi ki yaa tiendi yaala n baa teni tin yaa mani leni ti lieba, ki go paagidi tiyaba pala U Tienu sanŋoadima nni. 20Ŋan da biidi U Tienu tuonli, kelima mi jiema po. Moamoani, mi jiema kuli ŋani, ama o nilo yaa dini yaa jiema n baa tua o kpiilo po tantuudikaali, o pia li po i tagili. 21Yaala n baa yaa ŋani tie ŋan cedi ki da ŋmani nandi, ki da ño duven, ki da tieni yaala n sieni ki baa tua a kpiilo po tingbali bonla mo. 22Ŋan pia yaa dandanli, kubi li a yuli po U Tienu nintuali. Li pamanli ye leni yua n ki buni ki cuo o yuli, wan saa yaala yaa po i moamoani nni. 23U Tienu bu leni yua yaa yama n lengidi kelima wan di yaala yaa po. Waa tieni nani o dandanli n waani o maama. Yaala n kaa ŋua li dandanli kuli, tie tuonbiadi.
Currently Selected:
Loma 14: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
