Loma 12
12
Li dandanli yua n baa yaa ye maama
12.1—15.13
Li miapanli yema
1Lani yaa po, n kpiiba, n mia yi ki go tundi yi, kelima U Tienu ninñingbadima po, ke yin pa U Tienu yi yula nani yaa padili n fo, yaali n gagidi ki ŋani ki mani o po. Lani n tie lan pundi, yin yaa kpiagidi o maama. 2Da taani mani leni ŋanduna na niinni yaaba. Ama yi yantiana pandima n teni yin lebidi, ke yin fidi ki gagidi ki bandi U Tienu yanbuama. Lani n tie yaala n ŋani, ki mani o po, ki go dagidi cain.
3Min baa yaa ŋanbili paabu po, n yedi yikuli yendo yendo, yin da nua yi yula ke yi cie yin tie maama. Yin yaa pia li yumiinli, ki cuo ki dagini nani U Tienu n biigi ki puni yuakuli li dandanli yaa banlu. 4Nani tin pia i gbananbuoli ke i yabi gbananyendi nni maama, ke i gbananbuoli yeni ki taataa tuona, #1Kor 12.12. 5li go tie yeni leni tinba yaaba n ye Kilisiti nni. Ba ke ti yabi, tikuli tie gbananyendi ki tuugi leni tiyaba, nani i gbananbuoli n tuugi leni iyii maama. 6Ama tin pia yaa paabu ki taataa, nani U Tienu n puni yuakuli li ŋanbili maama. Lanwani, yua n pia saawali puama paabu, wan yaa wangi ma ke li ŋua leni li dandanli. #1Kor 12.4-11. 7Yua n pia o lieba todima paabu mo, wan yaa todi leni yantiayenli. Yua n pia mi bangima yaa paabu mo, wan yaa bangi ma. 8Yua mo n pia ki yaa paagidi o lieba pala yaa paabu, wan yaa paagidi bi pala. Yua n pia ki yaa puuni yaaba n luo bu paabu mo, wan yaa puuni ba leni ti bulicindi. Yua n baa mi gobidima yaa paabu mo, wan yaa gobidi leni li yankuali. Yua mo n baa mi ninñingbadima yaa paabu, wan yaa pia li pamanli li po.
9Yin da bua yi lieba mo leni palalie. Yin yaa nani yaala n bia, ki yaa kubi yaala n ŋani ke li pa. 10Yin yaa bua yiyaba nani yaaba n kpi yeni, ki yaa jigindi yiyaba. 11Yaa tuuni mani leni li yankuali, ki da pia kpadije, yi pala n yaa tuoni yi tuonli po, kelima yi tuuni o Diedo po. 12Yin yaa mangidi yi pala yin pia yaa suginma nni. Yin yaa pia li juunli fala nni. Yin yaa jaandi ki da cedi. 13Yin yaa todi mani bi nigagidiŋanba leni ban luo yaala, ki gaani bi canba cangu bonŋanla.
14Yaa gaaliti mani yaaba n wangi yi fala. Yeni de! Gaali ba mani, ki da soli ba. #Mat 5.44; Luk 6.28. 15Yin mangi yi pala leni yaaba n pia li pamanli, ki buudi leni yaaba n buudi. 16Yin yaa pia yantiayenli leni yiyaba. Yin da bua ki yaa tie niciama. Yin da fiini yi yula, ama yin cedi li yumiinli n diedi yi.#12.16 Yaa ka, da moandi ki yaa tuuni mani yaa tuonli n pia ti kpiagidi bebe, ama yin tuo ki yaa tiendi yaa tuonli n ki pia jigidi moko. Diidi Mi Kpanjama 3.7; Esayi 5.21. Da nua mani yi yula ke yi tie yanfuodanba.
17Yin da guani oba mi biadima, kelima wan tieni yi yaa biadima po. Yaa lingi mani yaala n ŋani bi niba kuli nintuali. 18Yin moandi mani yin fidi maama kuli, ke li yaa ŋua yinba, yin yaa ye leni mi yanduanma leni bi niba kuli. 19N buakaaba, da tuu mani mi biadima panpaani yi yula po. Ama yin cedi mani U Tienu pabienli daali n cua, kelima li diani: «Mini n tie o pantuulo, mini n baa tuu mi biadima panpaani,» #Tia 32.35. 20ki go yedi:
«Mi koma yaa gbadi a yibali,
Ŋan pa o wan je.
U ñuñuunu yaa gbadi o,
Ŋan pa o wan ño.
A yaa tieni yeni,
A dogini o yuli po a mukuanmoana.» #Kpa 25.21-22.
21Ŋan da tuo mi biadima n paadi a, ama ŋan paadi mi biadima, kelima mi ŋanma tienma po.
Currently Selected:
Loma 12: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
